དགའ་སྐྱོ་འདྲེས་མའི་རེ་འབོད།

ཀ་གདུང་ཚོན་མདོག་མཛེས་པའི་འབྲོག་ཁྱིམ་ཞིག་ནས།།

ཁ་བ་སྒང་དྲུག་ཡོངས་ལ་ཞེན་ཆགས་བཙན་པོ། །

ག་ལེར་མདུན་ལམ་འཚོལ་བའི་སྙིང་སྟོབས་དེ་ཡིས། །

ང་ཚོ་སློབ་གྲྭར་འགྲོ་བ་རང་གི་འོས་འགན། །

ཅ་ཅོ་དོན་མེད་ཚིག་གིས་དུས་ཚོད་ཀླག་བཞིན། །

ཆ་ལུགས་རྒྱ་མ་བོད་ཀྱི་ལྭ་བ་གྱོན་བཞིན། །

ཇ་ཁང་ཨར་ཁང་ནང་དུ་གོམ་ཁ་བསྒྱུར་བཞིན། །

ཉ་བྱ་གསོན་ཟོས་བྱེད་སོགས་འོས་འགན་མ་ཡིན། །

ཏ་ཐ་ག་ཏའི་བསྟན་ལ་མོས་འདུན་ཞིག་གམ། །

ཐ་མལ་འགྲོ་ཀུན་བརྩེ་བའི་ངང་གཤིས་དེ་ཡིས། །

ད་ལྟ་མི་ཡུལ་འགྲིམ་པའི་དོན་ཆེན་སྒྲུབ་བཞིན། །

ན་ཆུང་ཤེས་རིག་སློབ་རྒྱུ་ང་ཚོའི་འོས་འགན། །

པ་ཏྲའི་རི་མི་བྲིས་འདྲའི་རྒྱ་གྲོང་གསེང་ན། །

ཕ་མ་དགྲ་རུ་འཛིན་པའི་མཛད་ངན་རེ་རེས། །

བ་ལང་ཁྱི་སྤྱང་ལྟ་བུའི་ལས་བྱ་དེ་དག། །

མ་སྲུ་སྨན་ཆུང་ཁྱེད་ཚོའི་འོས་འགན་མ་ཡིན། །

ཙ་རི་ཀོང་པོ་ལ་སོགས་གནས་ཆེན་ཀུན་ཏུ། །

ཚ་གྲངས་དཀའ་སྤྱད་མཛད་པའི་ཨུ་ཚུག་ཞིག་དང་། །

ཛ་ཡ་རྒྱལ་གཤེན་བསྟན་ལ་བསམ་བཟང་འཆང་འདི། །

ཝ་བཞིན་མི་འཁྱམས་ང་ཚོའི་འོས་འགན་ཡིན་ངེས། །

ཞྭ་དཀར་བསྟན་ལ་མི་དད་ལོགས་སྤྱོད་རེ་རེས། །

ཟ་ཉལ་འགྲོ་འདུག་བར་ན་ནང་དམེ་སོགས་ཏེ། །

འ་ཅག་ཆོལ་གསུམ་པ་ཡི་ལས་དབང་རླགས་འདི། །

ཡ་མེས་གངས་རིའི་བུ་ཡི་འོས་འགན་མ་ཡིན། །

ར་བ་གངས་ཀྱིས་བསྐོར་བའི་ཡུལ་གྲུ་འདི་ཡི། །

ལ་ལུང་ཆུ་བཞི་སྒང་སོགས་དལ་གྱིས་འགྲིམས་སྟེ། །

ཤ་རུས་ཁྲག་རྩ་གཅིག་པའི་གཏམ་རྒྱུད་གླེང་བཞིན། །

ས་སྟེང་མི་རིགས་མཐུན་འབྲེལ་ང་ཚོའི་འོས་འགན། །

ཧ་ཧ་རྩེ་འཚར་ཞིག་གི་རྒོད་སྒྲ་རིང་མོ། །

ཨ་རོགས་གཙང་བུ་ང་ཡི་སྙིང་གཏམ་དང་མ། །

ཧ་ལམ་བདེན་པའི་གཏམ་ཞིག་ཡིན་ཡང་ཆོགས་མིན། །

ཨ་བུ་ཨ་ཞེ་མིང་སྲིང་ཁྱེད་ཚོས་སེམས་དང་། །          

                                                     ༢༠༡༡ ༥ ༡༢ཉིན་སྦྲ་ཆེན་ནས།