ཁ་བ་སྙིང་ལྕགས།

མཚོ་ཆེན་ཁྲི་ཤོར་རྒྱལ་མོའི། །

ནང་བཅུད་གསེར་ཉ་སྲུང་ཆེད། །

རང་སྲོག་ཕུལ་བའི་རྒྱལ་སྲས། །

སུ་དང་གང་ཡིན་ཨེ་ཤེས། །

གཞན་ཕན་སྤྱོད་པ་གཙང་ཞིང་། །

ལྷ་སེམས་དུང་ལྟར་དཀར་བའི། །

གངས་ཅན་བོད་ཀྱི་སྟག་ཤར། །

ཁ་བ་སྙིང་ལྕགས་ཁོང་རེད། །

དམར་ཆུང་སྙིང་གི་དབུས་ནས། །

ཁ་བའི་བདེ་སྡུག་གླེང་བཞིན། །

བསིལ་ལྡན་ལྗོངས་ལ་གཅེས་མཁན། །

སུ་དང་གང་ཡིན་ཨེ་ཤེས། །

ཡ་ཆུང་གངས་དཀར་སེམས་ནས། །

གདོང་དམར་བོད་པའི་སྐྱིད་སྡུག །

དཔེ་ལ་སྦྱར་ནས་གསུང་མཁན། །

ཁ་བ་སྙིང་ལྕགས་ཁོང་རེད། །

བཅོས་མིན་ལྷག་བསམ་དཀར་པོས། །

གངས་ཅན་བོད་པའི་ཁོར་ཡུག །

གཅེས་སྲུང་བྱེད་པའི་དཔའ་བོ།།

སུ་དང་གང་ཡིན་ཨེ་ཤེས། །

མགོ་ནག་བོད་པའི་བླ་མཚོ། །

མཚོ་མོ་ཁྲི་ཤོར་རྒྱལ་མོའི། །

གསེར་ཉའི་ཚེ་སྲོག་སྲུང་མཁན། །

ཁ་བ་སྙིང་ལྕགས་ཁོང་རེད། །