དེ་རིང་མགྲོན་པོའི་ངོ་སོ་བསྟོད།

གངས་ཅན་སཱ་ལའི་སྨན་ལྗོངས་ཕྱུག་མོ་ན།།
གཡང་ར་སྒོ་བཞིའི་འཕེལ་ཁ་རླབས་ལྟར་འཕྱུར།།
ཤ་མར་ཟས་ཀྱི་ལོངས་སྤྱོད་ཕུན་སུམ་ཚོགས།།
དེ་རིང་མགྲོན་པོའི་ངོ་སོ་ཟས་ཀྱིས་བསྟོད།།

ཨེ་མ་གངས་ལྗོངས་གཡང་ར་ཕྱུག་མོ་ན།།
སྒྱུ་རྩལ་སྣ་རྒུའི་ཡོ་ལང་མེ་ལྟར་འབར།།
སྙན་མོ་གླུ་ཡི་འགྱུར་ཁུག་ངོ་མཚར་ཆེ།།
དེ་རིང་མགྲོན་པོའི་ངོ་སོ་གླུ་ཡིས་བསྟོད།།

འཛམ་གླིང་ཡང་རྩེ་གངས་ལྗོངས་ཕྱུག་མོ་ན།།
མདོ་སྔགས་བསྟན་པའི་མངའ་ཐང་དགུང་ལ་རེག །
སྙིང་རྗེའི་སེམས་ཀྱི་འོད་སྣང་ཕྱོགས་བཅུར་འཕྲོ།།
དེ་རིང་མགྲོན་པོའི་ངོ་སོ་ཆོས་ཀྱིས་བསྟོད།།

མདོ་དབུས་ཁམས་གསུམ་བོད་ཀྱི་ཞིང་ཁམས་ན།།
ཚན་རྩལ་རིག་གནས་ཡར་ངོའི་ཟླ་ལྟར་འཕེལ།།
གངས་ལྗོངས་སྤུན་ཟླའི་བརྩེ་སེམས་འོ་མའི་མདངས།།
དེ་རིང་མགྲོན་པོའི་ངོ་སོ་འཛུམ་གྱིས་བསྟོད།།