འཚོ་བྱེད་རྒྱལ་བོའི་གཟི་བྱིན།

དཔལ་སྐྱང་སྤྲུལ་དྲི་མེད་འོད་ཟེར་རིན་པོ་ཆེ་དགུང་གྲངས་བརྒྱད་ཅུར་བཞེས་པའི་རྟེན་འབྲེལ་དུ།

དྲི་མེད་ཕྱི་ནང་གསང་གསུམ་བོན་གྱི་སྒོར། །

ལེགས་པར་འཇུག་པའི་ཤེས་རབ་གོ་ཆ་བརྩན། །

འགྲོ་ལ་རྣམ་བརྩེའི་འོད་ཟེར་བྱེ་བ་འབུམ། །

ཕྱོགས་མེད་སྤྲོ་བའི་དཔལ་མགོན་སྤྱི་བོས་མཆོད། །

སྔོན་ཚེ་སྲས་མཆོག་དཔྱད་བུ་ཁྲི་ཤེས་ཀྱིས། །

སྟོན་པའི་ཐུགས་བཅུད་མདོ་དགུ་འབུམ་བཞིར་བསྡུས། །

འགྲོ་ལ་བདེ་ཆེན་དཔལ་སྦྱིན་སྙིགས་དུས་འདིར། །

སྐྱང་ཚང་འཚོ་བྱེད་རྒྱལ་པོའི་འཕྲིན་ལས་མཚར། །

དྲི་མེད་ངུར་སྨུག་གོས་ཆེན་ལེགས་གསོལ་ནས། །

རྣམ་དག་འདུལ་བའི་བཅུད་བཟང་ངོམ་མེད་རོལ། །

མཁྱེན་པའི་མཁའ་ལ་བྱིན་རླབས་འོད་ཟེར་འབར། །

གདུལ་བྱ་འདབ་བརྒྱའི་ལང་ཚོ་འཛུམ་བག་རྒོད། །

བཞི་བརྒྱ་རྩ་བཞིའི་ནད་གདོན་འདུལ་སླད་དུ། །

འཚོ་བྱེད་ལྷ་རྗེའི་སྤྲུལ་བའི་གར་ལ་རོལ། །

བརྩེ་ཆེན་འོད་སྣང་འབར་བའི་བྱིན་རླབས་ཀྱིས། །

འགྲོ་རྣམས་བདེ་ཆེན་ལམ་ལ་ཡང་དག་བཀོད། །

རྨད་བྱུང་གསང་ཆེན་ཐེག་པའི་ལམ་ཡངས་ལས། །

རྩ་རླུང་ཐིག་ལེའི་འཕྲུལ་འཁོར་རབ་བསྐོར་ཞིང་། །

སྒྱུ་ལུས་འོད་གསལ་གཉུག་མའི་རང་མདངས་གསལ། །

དུས་མཐའི་མགོན་པོ་ཁྱེད་ལ་གུས་གསོལ་འདེབས། །

གང་གི་ཐུགས་རྗེས་ཉི་མའི་འོད་སྣང་གིས། །

ཁམས་གསུམ་མུན་པའི་དཔུང་ཚོགས་བཅོམས་ནས་ཀྱང་། །

གདུལ་བྱའི་ཚོགས་རྣམས་འདྲེན་པའི་དཔུང་གཉེན་དུ། །

བསྐལ་བརྒྱའི་བར་དུ་བཞུགས་མཛོད་མགོན་པོ་ཀྱེ། །

2013/11/27ཉིན།