སློབ་གྲོགས་དྲན་པའི་གདུངས་དབྱངས།

དགུ་བཅུ་རྩ་བཞིའི་ལོ་འཁོར་དེ་ལ། །

ལས་དབང་ཕྲ་མོས་འབོད་འགུགས་བྱས་སོང་། །

དགའ་སྐྱོ་འདྲེས་མའི་ཟློས་གར་དེ་ཡིས། །

སྙིང་ལ་མཛའ་བརྩེའི་རྟགས་ཐམ་བཀོད་ཡོད། །

གོ་བདུན་ལོ་ཡི་དབྱར་གཞུང་དུས་ལ། །

རང་རང་སོ་སོར་གྱེས་དགོས་བྱུང་སོང་། །

གྱེས་རུང་བརྩེ་སེམས་དར་གྱི་མདུད་པ། །

ནམ་ཡང་ལྷོད་མེད་སྙིང་ལ་བཅངས་ཡོད། །

 ཕྱི་ཚུལ་ཤ་རྒྱགས་སྟོབས་ཀྱིས་ཁེངས་ཡོད། །

ནང་སེམས་བྱམས་དང་སྙིང་རྗེས་ཟིན་ཡོད། །

ཀུ་རེའི་གཏམ་དང་དགོད་འཛུམ་དྲོན་མོ། །

བརྗེད་མེད་སྙིང་གི་དྲན་ཤིང་ཡིན་སོང་། །

ཁྱེད་ལུས་སྐུ་ཤ་རྒྱས་པའི་ཚུལ་དེས། །

ཁྱེད་སྐུ་བདེ་ཐང་ཡིན་སོང་བསམ་ཡོད། །

སླད་མའི་དགྱེས་འཛོམས་བྱུང་དུས་ཤིག་ལ། །

སྐྱིད་པའི་སྙིང་གཏམ་གླེང་ན་བསམ་ཡོད། །

ཀྱེ་མ་ཀྱེ་ཧུད་འཆི་བདག་བདུད་པོ། །

འདི་ལྟར་གློ་བུར་སླེབས་ཡོང་མ་བསམ། །

ཕྱི་མའི་འཕྲང་རིང་འགྲིམས་པའི་དུས་ལ། །

ཞེན་ཆགས་སྡུག་བསྔལ་མེད་པའི་སྐྱབས་འཇུག །