མི་ཚེ།

སྐྱབས་གནས་གཡུང་དྲུང་གནས་བཞི།། རྣམ་དག་སེམས་ཀྱིས་མཆོད་ན།།
མགོན་མེད་གཤེན་གྱི་བུ་ལོར།། སྤྱན་གཟིགས་ཡང་ཡང་གནང་རོགས།།

མ་རིག་མུན་ལྟར་འཐིབས་པས།། ཕྱི་ཡི་སྣང་བའི་ངོ་ལ།།
འཇིག་རྟེན་སྒྱུ་མའི་གྲོང་འདི།། སྐྱིད་པའི་ཞིང་དུ་མཐོང་བྱུང༌།།

སྐྱིད་སྐྱིད་འདྲ་བའི་ཞིང་ནས།།  སྐྱེ་རྒ་ན་འཆིའི་འདུ་འཛི།།
གཡོལ་མེད་རེས་སུ་འཁོར་བས།།  འཇིགས་པའི་འོ་དོད་ཤོར་སོང༌།།

དང་པོ་སྐྱེས་པའི་དུས་སུ།།  གང་ཡང་བསམ་རྒྱུ་མེད་པས།།
འཛུམ་དང་ངུ་ངག་ཙམ་གྱིས།།  རེ་འདོད་བརྡ་རུ་བསྟན་ཆོག །

བར་དུ་ན་རྒས་སྡུག་བསྔལ།།  ཆར་རླུང་བཞིན་དུ་བྱུང་ན།།
སྐྱོ་ངལ་འཇིགས་སྐྲག་བློ་ཡིས།།  སྐད་ཅིག་བདེ་བ་མ་རྙེད།།

ཐ་མ་འཆི་བདག་ཞགས་པས།།  རང་ལུས་དམ་དུ་བཀྱིགས་ཚེ།།
གཉེན་དང་ལོངས་སྤྱོད་མོད་ཀྱང།།  གཅིག་པུར་འཁྱམས་དགོས་བྱུང་འགྲོ །

འཇིག་རྟེན་འཁོར་བའི་གྲོང་ནས།། རང་རང་འཚོ་བའི་ཆེད་དུ།།
གང་སར་འདུར་རྒྱུགས་ལས་ཀྱིས།། ན་སོ་རྒས་པ་མ་ཚོར།།

འཇིག་རྟེན་འདི་ཡི་འདུན་མ།། འགྲུབ་རྒྱུ་ལོས་ཡོད་སྙམ་ནས།།
ཤ་ཟད་རུས་ལ་ཐུག་ཀྱང༌།། བསྐྱུར་འདོད་བློ་ལ་མ་འཆར།།

བསམ་དོན་འགྲུབ་སྙམ་བྱུང་ན།། དགའ་བའི་གླུ་ངག་གྱེར་འདོད།།
མི་འདོད་སྡུག་གིས་བཙུར་ན།། སྨེ་ངག་ངང་གིས་འཆོར་འགྲོ།།

ཁེ་དང་རྒྱལ་ཁ་བྱུང་ན།། ཐམས་ཅད་གྲོགས་སུ་མཐོང་ཡོང༌།།
གྱོང་དང་ཕམ་ཁ་ཉོས་ཚེ།། ཡོད་ཚད་དགྲ་རུ་མཐོང་འགྲོ །

ཚེ་འདིའི་ཁེ་གྲགས་ཀློང་ནས།། རང་སེམས་རང་གིས་མ་ཐུབ།།
བརྣབ་སེམས་གནོད་སེམས་ལས་འདི།། རྩྭ་རྩི་བཞིན་དུ་སྐྱེས་ཡོང༌།།

དགེ་བ་བློ་ལ་འཆར་ཡང༌།། ལག་ནས་བསྒྲུབ་ཁོམ་མ་བྱུང༌།།
སྡིག་ལ་འཛེམ་དགོས་འདོད་ཀྱང༌།། མ་སྐུལ་ངང་གིས་བསགས་ཡོང༌།།  

                                                  2007-5-17