སེམས་ཀྱི་གཅོང་ནད་འཇོམས་པའི་བདུད་རྩི།

༄༅།།རྒྱལ་བ་ཀུན་གྱི་དགོངས་པ་གཅིག་བསྡུས་ཏེ། །

འཛམ་གླིང་ཟླུམ་པོའི་མཁའ་ལ་འཕགས་ནས་ཀྱང་། །

བཤད་སྒྲུབ་སྒོམ་པའི་རྒྱལ་མཚན་མཐོར་སྒྲེང་པའི། །

བོན་བརྒྱ་ཡབ་སྲས་ཟུང་གིས་ཐུགས་རྗེས་དགོངས། །

གང་ཞིག་དུས་ངན་སྙིགས་མའི་ཐ་མ་འདིར། །

མ་རིག་ལོག་རྟོག་འཁྲུལ་བའི་སེམས་ཅན་འགའ། །

ཡང་དག་བདེན་པའི་དོན་ལ་རབ་རྨོངས་ཏེ། །

སྲིན་བྱའི་ཧབ་རྒོད་ཇི་བཞིན་ཨག་སྐོར་བྱེད། །

རང་གི་ཕ་མེས་གང་ཡིན་མི་ཤེས་ཤིང་། །

ཤེས་ཀྱང་ཁྲེལ་དགོད་སྨོད་ལ་ཕེ་འདེབས་བཞིན། །

རིག་པའི་གནས་ལ་ཕྱོགས་ཞེན་ཆེར་བཟུང་ནས།

ངའོ་སྙམ་པའི་བློ་དེ་སྙིང་རེ་རྗེ། །

ཡོན་ཏན་མེད་ན་ཁྱེད་ཀྱང་ཁག་མེད་ལ། །

བྱིས་པའི་གཏམ་ནི་ཁྱི་རྒན་བབ་ཅོལ་བཞིན། །

ཡོད་པར་འདོད་ན་མེས་པོར་དམའ་འབེབས་པ། །

ཆགས་སྡང་ཀུན་སློང་ཡིན་པས་དམྱལ་བའི་རྒྱུ། །

དམྱལ་བའི་རྒྱུན་ཐག་གཅོད་བྱེད་དག་སྣང་ཡིན། །

ཐམས་ཅད་དག་སྣང་འདྲེན་པ་ཀུན་གྱི་གཙོ། །

མ་དག་པ་ལ་ཐར་བའི་སྐབས་མེད་པས། །

ཆགས་སྡང་དུག་གི་སེམས་འདི་དོར་བྱ་ཉིད། །

གཟུགས་མེད་སེམས་འདི་མི་རྒོད་རླུང་བཞོན་བཞིན། །

ལེགས་ཉེས་གང་ལའང་འཇུག་པར་ཐེ་ཚོམ་མེད། །

སེམས་འདི་དག་པའི་ལམ་ལ་ཞུགས་གྱུར་ན། །

རང་གཞན་གང་ཡང་དགའ་བདེའི་དཔལ་ཐོབ་འགྱུར། །

རང་གིས་གཞན་ལ་མ་སྨོད་ཀུན་མཐུན་གྱིས། །

གཞན་ལ་སྨོད་པ་རང་ཉིད་ཕུང་བའི་རྒྱུ། །

ཕུང་བའི་སྡུག་བསྔལ་ཀུན་གྱིས་མི་འདོད་དེ། །

མི་འདོད་བཞིན་དུ་བཙན་གྱིས་བླུ་དོན་ཅི། །

རྒྱལ་བ་ཀུན་གྱི་དགོངས་པ་གཅིག་ཡིན་པས། །

བོན་ཆོས་མིང་གིས་ཁྱད་པར་འབྱེད་པ་འཁྲུལ། །

བོན་དང་ཆོས་གཉིས་གང་གི་ངོ་ལའང། །

ཕྱོགས་སུ་ལྷུང་བའི་སེམས་འདི་ཡོད་མ་འཚལ། །

འདས་པའི་རྒྱལ་རབས་སུམ་ཅུ་རྩ་གཉིས་རིང༌།།

སངས་རྒྱས་གཡུང་དྲུང་བོན་གྱི་བསྟན་པ་དར།།

གཙང་མའི་བོན་བསྟན་དར་བའི་རིག་གནས་འདི།།

གངས་ལྗོངས་རིག་གནས་ཀུན་གྱི་མེས་པོ་ཡིན།།

མེས་པོ་གོང་མའི་ཤུལ་བཞག་ནོར་གྱི་གཏེར། །

ཉམས་སུ་ལོན་ན་རིག་པའི་དཔའ་བོ་སྟེ། །

དོན་གྱི་གོ་བ་ཙམ་ཡང་མི་ལོན་པར། །

དམོད་པའི་ཚིག་མཚོན་འདེབས་པ་ཡི་མུག་གནས།

ཁ་ནས་ཅི་ལྟར་མི་རིགས་སྒྲོན་གྱུར་ཀྱང་། །

དོན་གྱིས་མི་རིགས་སྲུང་འཛིན་མ་ཤེས་ན། །

སྨྲ་ལྕེ་དབང་བོ་རལ་ནས་ཐོར་གྱུར་ཀྱང་། །

ནེ་ཙོའི་སྐྱེ་བ་ཙམ་ལས་ཅི་ཡང་སྟོང་། །

བོན་ཆོས་རིག་གནས་གང་ལ་བསྟེན་ན་ཡང་། །

ཐོག་ཁང་གཅིག་ལ་ཐེམ་སྐས་སོ་སོ་བཞིན། །

དམིགས་པའི་ཡུལ་དེར་ཅིས་ཀྱང་སླེབས་ངེས་ན། །

བཟང་ངན་ཚིག་གིས་འབྱེད་པར་དགོས་པ་ཅི། །

སྟོང་ཉིད་ལྟ་བའི་མཁའ་ལ་གཤེགས་འདོད་ན། །

ཐོག་མར་སེམས་གྱི་འཁྲུལ་བ་གཅོད་པ་གཙོ། །

མིན་ཀྱང་མཐུན་སྒྲིལ་དམ་པོའི་དཔུང་སྡེབ་ནས། །

འཛམ་གླིང་རིག་པའི་རྒྱལ་ཁམས་འགྲིམས་ན་ཨང་། །

 

༢༠༠༥`༧`༦ལ།