བཞི་བ། སྲིད་གཤེན་ཐེག་པ།
ཐེག་པ་བཞི་བ་སྲིད་གཤེན་ཐེག་པ་ནི་སྟོན་པ་ཉིད་གཤེན་ལོ་བཞི་བཞེས་པའི་དུས་སུ། སངས་རྒྱས་ཀྱི་བསྟན་པ་སྤེལ་བ་དང༌། སེམས་ཅན་གྱི་སྒྲིབ་པ་སྦྱང་བ་དང༌། ཕྱི་རབས་རྣམས་ལ་དཔེ་རུ་བསྟན་པའི་ཕྱིར། མཚོ་མུ་ལེ་སྟོང་ལྡན་གྱི་འགྲམ་གྲོང་ཁྱེར་ཆེན་པོ་ལང་ལིང་གནས་སུ་བྱོན་ནས་བཟོ་རྒྱལ་གར་མ་ལི་ཤོ་ལ་བཀའ་བསྩལ་ནས་གསས་ཁང་ཁོ་མ་རུ་རིང་བཞེངས་ཤིང༌། འཁོར་གྱི་ནང་ནས་སྲིད་པ་ཡེ་ཁྲི་བདལ་འོད་ཀྱི་བུ་སྲིད་གཤེན་གཙུག་ཕུད་ལ་གཉེར་ཏུ་གཏད་ནས་གསུངས་པའོ།།
དེ་ལ་སྤྱི་རུ་ཤི་རབས་དང་འདུར་ཐབས་གཉིས་ཡོད་ལ། ཤི་ཐབས་ལ་ཡང་ན་སོ་རྒས་གཞོན་བྱིས་པ་གསུམ་དང༌། གྲི་རྒོད་འཁྲུག་པའི་ཤི་བ་བཅས་བཞི་ཡོད། དེ་རེ་རེ་ལ་ཡང་ཕོ་མོ་གཉིས་རེ་སྦྱར་ཏེ་བརྒྱད་དུ་དབྱེ་བ་ཡིན་ལ་རྐྱེན་གང་གིས་བསླངས་པའི་ཤི་རབས་སུམ་བརྒྱ་དྲུག་ཅུ་ཡོད་པར་གསུངས་སོ། ། འདུར་ཐབས་ལ་ཡང་རྣམ་པ་གཉིས་ཡོད་དེ། ཀུན་རྫོབ་མཚན་མར་བདེན་པ་དང་དོན་དམ་ངོ་བོ་བདེན་པའོ།། དེ་ལས་ཀུན་རྫོབ་མཚན་མར་བདེན་པར་འདུར་བ་ལ་འདུར་ཐབས་བོན་སྡེ་བཅུ་ཡོད་དེ། དོན་རྟགས་རྩིས་ཀྱི་བོན་རྒྱུད་བཅུ། གཏོ་གཉེན་གཏོ་བཅོས་ཀྱི་བོན་རྒྱུད་བཅུ། སྲིད་པ་ཤི་རབས་ཀྱི་བོན་རྒྱུད་བཅུ། གདོས་པ་ཐག་ཆོད་ཀྱི་བོན་རྒྱུད་བཅུ་གཉིས། འཁོར་བ་གེགས་སེལ་གྱི་བོན་རྒྱུད་བཅུ། དཔེ་དོན་ཤི་རབས་ཀྱི་བོན་སྡེ་བཅུ། བླ་ཡིད་སེམས་སྡུད་ཀྱི་བོན་སྡེ་གསུམ། ཡུལ་ཤེས་འདོད་ཡོན་གྱི་བོན་སྡེ་བརྒྱད། གསོན་ཤི་ཡུལ་བགོས་ཀྱི་བོན་སྡེ་བཅུ་གཉིས། ལོག་པར་གཡེན་ཁམས་འདུར་ཐབས་གཅིག་དང་བཅས་སོ་སོར་ཕྱེས་པས་འདུར་ཐབས་བརྒྱད་ཅུ་རྩ་གཅིག་ཏུ་འགྱུར་ལ། དེ་དག་གིས་ཇི་ལྟར་འདུར་བ་ནི། རྒས་པ་རྣམས་ལ་བཀྲ་འདུར་བྱ་ཞིང་བཀྲ་འདུར་ཡག་ན་རྗེས་ཤུལ་དར། གཞོན་པ་རྣམས་ལ་སྟག་འདུར་བྱ་ཞིང་སྟག་འདུར་ཡག་ན་ཚེ་དཔལ་བསྐྱེད། ཆུང་བ་རྣམས་ལ་སྲི་འདུར་བྱ་ཞིང་སྲི་འདུར་ཡག་ན་རིགས་རྒྱུད་འཕེལ། གྲི་རྒོད་རྣམས་ལ་གྲི་འདུར་བྱ་ཞིང་གྲི་འདུར་ཡག་ན་གཞོན་སྲི་ཐུལ་བའོ།། ༼མུ་འགོད༽