ཟུར།
ཁག་བཞི་བ།
ནམ་ཟླ་མཚན་ཐུན་ཞིག་ལ།།
ཤུགས་རིང་བརྩེ་བ་ནར་མོ།།
སེམས་ཀྱི་མེ་ལོང་ཆག་རོར།།
དྲན་པ་ཟ་རེ་ཟི་རེ།།
ལག་སོར་བར་ན་འཁྱུག་པའི།།
བརྩེ་བའི་ཡིག་འབྲུ་ཁ་ཤས།།
ཤོག་དཀར་སྤང་ཐང་གཤར་བ།།
ལས་འཕྲོ་གསང་བའི་རི་མོ།།
མིག་ཟུང་སྒྲོག་གིས་གཅུར་བའི།།
ཀུན་སྤངས་གྲྭ་རྐྱང་སྐམ་པོར།།
རྟོག་པ་ཐོལ་ཐོལ་འབྲུག་པ།།
ཚོགས་དྲུག་ཡུལ་ལ་འཇུག་པ།།
འདུན་པ་ལྗོན་ཤིང་རྩེ་མོར།།
དམིགས་པ་འབྲས་བཟང་སྨིན་དུས།།
ད་དིར་སྙན་ངག་སྡེབ་པ།།
གསེར་གྱི་སྦྲང་ཆུང་ཆ་གཅིག།
ཐོལ་བྱུང་བརྩེ་བའི་སྤང་ལ།།
ཤེས་རིག་མེ་ཏོག་རང་བཞད།།
ཡ་རབས་ཨ་མར་འཕྲད་པ།།
ཚེ་སྔོན་ལས་ཀྱི་འབྲས་བུ།།
ཕྱི་རོལ་ནམ་ཟླ་འཁྱག་པ།།
སླེབས་པ་དགུན་གྱི་རང་མདངས།།
མི་སེམས་ནང་ནས་གྲང་བ།།
འཚོ་བ་རང་ལ་འགྱུར་རྟགས།།
ས་མཐའི་མི་རྐྱང་ལག་གི།
ཇ་དམར་ཤིང་ཕོར་ཁ་ན།།
རླངས་པ་ལྷོག་ལྷོག་འཕྱུར་དུས།།
དུས་ཀྱི་དགུན་ཁ་འདི་ཡིན།།
མི་ལ་རང་གི་ཡུལ་ཡོད།།
བྱ་ལ་ཤིང་ཁའི་ཚང་ཡོད།།
སྐྱིད་སྡུག་གང་ལ་འཕྲད་ཀྱང་།།
བརྗེད་ཐབས་ཡོད་ས་མ་རེད།།
༢༠༡༢ལོའི་ཟླ་༡༢པའི་ཚེས་༢༩་ཉིན་ཕ་ཡུལ་དྲན་ཙམ་གྱིས་ཐོལ་བྱུང་དུ་བྲིས།།
