ཟུར།

                                            ཁག་དང་བོ།

དུས་ངན་ཟུར་གསུམ་དགུ་མདུད།།

མི་རྟག་ཁྲོམ་གྱི་འཚུབ་རླུང་།།

ལས་དང་ལས་ཀྱི་བར་སྟོང་།།

ལེབ་དང་ཟུར་ནས་སླེབས་འདྲ།།

རི་ག་ལུང་གསུམ་མདོ་རུ།།

རྩངས་པ་རྒྱལ་བོ་ཀེར་ཀེར།།

རྟ་ཕོ་མེ་འབར་ཁ་ནས།།

འཚེར་སྒྲ་གནམ་ལྕགས་དུ་བ།།

ཉག་གའི་མཐུར་ཤོར་གན་ན།།

སྐྱ་ག་ཚོམ་ཚོམ་གྲག་པ།།

སྤྱང་རྒན་ཁ་ལ་མེ་འབར།།

དུས་དགུན་ཀླག་རྒྱངས་ལན་གསུམ།།

ས་ནག་སྒལ་རུས་བཅག་པར།།

འབུར་འཇོམས་ཐོ་ནག་མི་འོང་།།

སྤ་བཀོང་ལས་ཀྱི་ཕྱག་རྒྱ།།

མར་རྩམ་མཆོད་པས་མི་ཁུག།

སྲང་ལམ་སྐྱག་ཁང་འགྲམ་ན།།

སྦྲང་ནག་འཕུར་འཚུབ་མང་པོ།།

ཤེལ་ཏོག་ཆག་རོའི་སྟེང་ན།།

དམར་པོ་རྐང་ཁྲག་ཙར་ཙར།།

མཚན་མོར་སྒོ་དར་ཐོག་ནས།།

འུག་པ་ཁྭ་ཏར་ཟུག་པ།།

གཤེད་ཟ་གདོན་ཆེན་བཅོ་ལྔ།།

སུའི་ཚང་ཁྱིམ་ལ་འཛུལ་བ།།

ནགས་ཀྱི་རི་དྭགས་གླ་སྐྱ།།

རྟག་པར་མི་ལ་བཟུར་འགྲོ།།

རྣ་ཅོག་ཀྲོང་ཀྲོང་ནང་ལ།།

སྟག་མོའི་ངུ་སྐད་མི་འཁོར།།

འབུད་ཤིང་བཅག་པའི་ཆག་སྒྲ།།

གཉིད་ལོག་མི་ལ་སྙིང་གཟེར།།

དགུན་འཁྱག་ནངས་མོ་ཞིག་ལ།།

ཇ་ནག་ཁ་དྲི་སིབ་སིབ།།

གཞི་རིམ་ཁང་ཆག་ནང་ལ།།

མཆུ་ཏོ་བློང་བློང་བོ་རུ།།

སྨོན་ལམ་ག་ཚོད་བཏབ་པ།

ད་ལོ་ཉིས་སྟོང་ལོ་ནག།

༢༠༡༢ལོའི་ཟླ་༡༢་པའི་ཚེས་༣་ཉིན་གྱི་ཞོགས་པར་བྲིས།