ཟུར།
ཁག་གསུམ་པ།
སྲོད་ཀྱི་འཆར་ཀའི་རྩེ་མོར།།
ཞེད་སྐྲག་ནུར་མོ་ཞིག་གིས།།
སྐྱིད་ཀྱི་རྨི་ལམ་ཆག་འཕྲོ།།
མལ་ས་གྲུ་བཞིར་དབོ་ཐལ།།
ལྷ་རི་ཟུར་གསུམ་གན་ན།།
མཐུ་སྡོངས་མེ་ཆ་འགས་འགས།།
ཕ་མྱེས་དོམ་རྒན་འདྲ་བོ།།
སེམས་ཀྱི་རྒྱབ་རི་ཡིན་ནམ།།
ལན་ཆགས་གཏོར་མ་འགམ་བའི།།
བསེར་རག་ཡི་དྭགས་ཁ་ལ།།
དངོས་གྲུབ་སྒྲོ་བ་གང་བོ།།
བགེགས་སེལ་ཟོར་དུ་བསྟབས་བཞག།
ཕ་ས་རྫ་འཕྲང་གསེང་ནས།།
ཕྱི་མིག་ལན་གཅིག་བལྟ་དུས།།
སྐར་ངན་དུ་བ་མཇུག་རིང་།།
ད་དུང་མཐོང་བ་མ་བྱུང་།།
ལས་ལ་བཟང་ངན་ཡོད་པར།།
ལམ་ལ་རིང་ཐུང་ཡོད་རེད།།
ས་ནག་གཏམ་གྱི་ང་རོ།།
བསྒྲགས་པ་སྔར་བ་མིན་ནམ།།
ང་ཡི་མེས་པོའི་ཕྱག་རྫས།།
འུར་རྡོ་ཆུ་མིག་དགུ་བསྒྲིལ།།
ལོ་རབས་སྟོང་གི་དབྱིངས་ལ།།
འཕེན་པ་དོན་དང་ལྡན་དགོས།།
བརྡ་འཕྲིན་ལྕགས་ཀྱི་ཁ་པར།།
གོ་ལ་གཡས་བསྐོར་གཡོན་བསྐོར།།
ནང་ཆོས་མར་ཁུ་འདྲ་བོ།།
ཤིང་ཕོར་ཁ་ན་འཁྱིལ་ལེ།།
དམར་པོ་ཁ་ན་འུར་བའི།།
ལྟས་ངན་ཨག་སྐད་ཟ་ཟི།།
ཐོ་རངས་རྨི་ལམ་ཡོངས་རྫོགས།།
རྨིས་པ་དེ་ག་རང་རེད།།
༢༠༡༢ལོའི་ཟླ༡༢པའི་ཚེས་༡༨ཀྱི་ཞོགས་པར་བྲིས།