འགྱོད་པའི་མེ་ཏོག

ཟླ་བའི་ངུ་སྐད་ལྷོ་ལ་འཁོར།།

རི་ཆུ་དབྱར་གྱི་སྤང་ལ་ཞོགས།།

དགེ་བའི་མེ་ཏོག་གྲི་ཡིས་བཞོག།

འགྲོ་བའི་གཤེར་གཟུགས་ཀྱེ་མ་ཧུད།།

སེམས་ཀྱི་གཙང་ཆེན་གྲུ་ཡིས་གཤར།།

སྒལ་ཚིགས་ཉེར་བརྒྱད་མདུང་གིས་བཅད།།

བློ་རིག་གཙང་མ་དུག་གིས་བཀྲུས།།

ཁ་ནག་རང་འཁོར་ཀྱེ་མ་ཧུད།།

བགེགས་རིགས་རྦད་གཏོང་ལས་ལ་ཟབ།།

བྱད་མ་བདུད་བཞི་འཚུབ་གྱི་ལེར།།

རང་གཤེད་རང་གིས་སྲོག་ལ་དབབ།།

མི་རྐྱང་ཁྲེལ་པོ་ཀྱེ་མ་ཧུད།།

ཁ་སྦུབས་ལྟ་བ་ཟས་སུ་བསྟེན།།

མུ་འབྱམས་སྒོམ་པ་རྐམ་ལ་སྲེད།།

བླ་བརྡོལ་སྤྱོད་པ་ཀློང་དུ་རྡོལ།།

མགོ་རིལ་སྐྱ་སྟོང་ཀྱེ་མ་ཧུད།།

༡༠༡༣་༡་༢༤་དགོང་མོར་བྲིས།