༄༅།། ༧ དབང་ལྡན་ཞུ་ཡི་གདན་ས་ཆེན་མོ་དཔའ་བརྡ་ཞུ་ཚང་དགོན་སྨིན་ གྲོལ་གླིང་གི་༧སྤུ་རྒྱལ་ལྔ་རིག་སློབ་གླིང་ངམ་བཤད་
སྒྲུབ་སྒོམ་སྡེའི་གཤིས་བརྗོད་དབྱངས་
སུ་གྱེར་བ་ཚངས་སྲས་བཞད་
པའི་རང་སྒྲ།།
༼ཁག་གཉིས་པ།༽
༣༨༽ལས་རུང་རྩ༵་ཐིག་རླུང༵་གསུམ་གྱིས།།
བསྐྱེད་པའི་ཨ་ཧྃ་འབར་འཛག་མེས།།
མ་དག་རྟོག་ཚོགས་བསྲེགས་པའི་ཤུལ།།
བདེ་སྟོང་ཡེ་ཤེས་སྤྱི་བླུགས་ཤར།།
༣༩༽ཟབ་དཀར་རྒྱུད་སྡེའི་ཡང་སྙིང་སྟེ།།
བསྙེན་སྒྲུབ་འཕྱང་བཅས་སོ་དྲུག་གྲངས།།
བསྐྱེ༵ད་དང་རྫོག༵ས་པའི་འཕྲོ་འདུ་ཡིས།།
སྣང་གྲགས་གསང་བ་གསུམ་དུ་བསྒྲུབས།།
༤༠༽རྒྱུད་གསུ༵མ་མ་དྲོས་ཀླུང་བཟང་ལས།།
སྡོམ༵་གསུ༵མ་ཡིད་བཞིན་ནོར་བུ་མཆོག།
རིགས་གསུ༵མ་རྒྱལ་མཚན་རྩེར་བཀོད་པས།།
སྒོ་གསུ༵མ་མི་མཐུན་གཡུལ་ལས་རྒྱལ།།
༤༡༽ལེ༵གས་བཤ༵ད་རྣམ་སྲས་བང་མཛོ༵ད་དུ།།
དཔྱད་བརྗོད་རིན་ཆེན་སྣ་མང་ཡང་།།
བརྒྱུད་གསུམ་འཕྲུལ་གྱི་བདག་རྐྱེན་ལས།།
བསྟན་འབྱུང་གཟི་ཡི་དོ་ཤལ་བརྗིད།།
༤༢༽རྣམ་གསུམ་གཏེར་ལས་ཉེར་འཁྲུངས་པའི།།
དགུ་ཕྲག་ལུང༵་དོན་འདོད་འབྱུང་དབྱིག།
ཕྲ་ཞིབ་རི༵གས་པའི་བྱི་དོར་གྱིས།།
དགོངས་རྟོགས་ནམ་མཁའི་མཛོ༵ད་ཆེན་བསྒྲུབས།།
༤༣༽མཁྱེན་གསུ༵མ་ཏི་སེ་ལས་འོང་བའི།།
སྡེ༵་གསུ༵མ་ཁ་འབབ་རྣམ་བཞིའི་ཀླུང་།།
ཚད་གསུ༵མ་གསེར་གྱི་ཡུར་བ་ལས།།
སྣོད༵་གསུ༵མ་དབྱིག་ལྡན་མཛོ༵ད་དུ་བསྐྱིལ།།
༤༤༽ཟབ༵་གདམས་ཁྲིད་རིམ་ན༵མ་མཁ༵འི་ཀློང་།།
ཟབ༵་ལམ་སྒྲུབ་གཞུང་ཉི་ཟླའི་མཛོ༵ད།།
ཟབ༵་གསལ་ལས་ཚོགས་འོད་སྣང་གིས།།
ཟབ༵་དོན་བསྟན་པའི་སྐྱེད་ཚལ་འཛུམ།།
༤༥༽སེམས་ཀློང་མན་ངག་སྡེ་གསུམ་གྱི།།
དགོངས་བཅུད་དབྱིང༵ས་རིག༵་རིན་ཆེན་མཛོ༵ད།།
ལས་ལྡན་སྐྱེས་བུས་ཉམས་བཞེས་པས།།
ཟག་བྲལ་འཕོ་ཆེན་བུམ་སྐུར་བསྒྲུབས།།
༤༦༽ཀ་དག་ལམ་བྱེད་ལས་འཕགས་ཤིང་།།
ལྷུན་གྲུབ་རང་གདངས་དངོས་གྲོལ་བའི།།
འོད་གསལ་མུ༵ན་པའི་མཚ༵མས་ལས་སོགས།།
ཉམས་རྟོགས་དབུ་འཕང་མཁའ་དང་བསྡེབས།།
༤༧༽གཞན་ཡང་བྲུ་ཡི་ཨ་ཁྲིད་དང་།།
སྐྱབས་སྡོམ་བྱང་སེམས་བརྒྱ་རྩ་སོགས།།
ཟབ་གདམས་གཅེས་པའི་ཕ་ནོར་ཀུན།།
ཡོངས་རྫོགས་བདག་གིར་མཛད་འདི་མཚར།།
༤༨༽ཡེ༵་ཉིད་ཇི་བཞིན་སྐྱེ་མཆེད་གཞི༵།།
ཡེ༵་ཤར་ཁྲེགས་ཆོད་ཐོད་རྒལ་ལམ༵།།
ཡེ༵་གྲོལ་གཞོན་ནུ་བུམ་སྐུའི་འབྲས༵།།
ཡེ༵་མཁྱེན་རི༵་ཁྲོ༵ད་ཆེན༵་པོ༵འི་སྲོལ།།
༤༩༽བཅོས་མེད་ལྟ་བ་ཡངས་པའི་མཁར།།
འོད་གསལ་སྒོམ༵་པའི་ཁྲི་གདུགས་འཛུམ།།
ཤུགས་འབྱུང་སྤྱོད་པའི་ཚ་ཟེར་གྱིས།།
ངེས་དོན་སྐྱེད་ཚལ་དགོད་པའི་གྲྭ༵།།
༥༠༽ཟབ༵་ལམ་རྣམ་རྒྱལ་ཁང་བཟང་དུ།།
འཇུག་ཐབས་རིན་ཆེན་ལྡེའུ་མིག་སྟེ།།
ཟབ༵་གདམས་བྲུ༵་ཡི་ཨ༵་ཁྲི༵ད་སྒོར།།
བསགས་སྦྱོང་སྐལ་བཟང་དུས་སྟོན་ཚུགས།།
༥༡༽རྣམ༵་གསུམ་བཀའ་ལུང་ཆུ་འཛིན་བཅུད།།
རྣམ༵་བཤད་ལམ་རིམ་སུམ༵་བརྒྱ༵་པ༵།།
རྣམ༵་དག་འཆད་ཉན་བདུད་རྩིའི་རྒྱུན།།
རྣམ༵་དཀར་སྨྱུག་གཞོན་གསོས་སུ་སྨིན།།
༥༢༽ཐུགས་རྒྱུད༵་དགོངས་གཏེར་ལས་བྱུང་བའི།།
བཀའ་རྒྱུད༵་སྐོར་བཞིའི་ཡང་སྙིང་སྟེ།།
ཉམ༵ས་རྒྱུད༵་རྒྱལ༵་བའི༵་ཕྱག༵་ཁྲི༵ད་ཆེ།།
རང་རྒྱུད༵་འདུལ་བའི་དཔུང་དུ་ཁོམ།།
༥༣༽ཀློང་ཆེན་བསྒྲགས་གསུམ་རྩི་ཐོག་བཅུད།།
དྲང་ངེས་ཡང༵་རྩེའི༵་འོ་མཚོ་ཆེ།།
ཐོས་བསམ་རྐྱལ་གྱིས་བསྲུབས་པ་ལས།།
སྒོམ་རྟོགས་མར་དཀར་རིལ་བུ་འཁྲུངས།།
༥༤༽གསང་སྔགས་གཏོར་བཟོ་གྱེར་ཙམ་དུ།།
འཛིན་པའི་མར་འགྲིབ་གཉན་འཕྲང་དུས།།
ཟབ་རྒྱས་རྒྱུད་སྡེའི་དགོངས་དོན་བཞིན།།
སྒོམ་སྒྲུབ་སྲོལ་བཟང་འདི་ན་ཚུགས།།
༥༥༽རབ་འབྱམས་དཀྱིལ་འཁོར་སྤྲོ་བསྡུའི་མགོན།།
ཞི༵་ལྷ་རྒྱལ་བ༵་འདུས་པའི་ཐུགས།།
ཨ༵་དཀར་གས༵ལ་བ་དགུ་འཛབ་དོན།།
བཅོས་མེད་རང་སྒྲ་གཡང་དུ་ཆགས།།
༥༦༽ཐུགས་ཉིད་བོན་སྐུ༵་ཞི་བའི་ངང་།།
དཔའ་རྟགས་བརྒྱད་ཅུ་རྫོགས་པའི་དབ༵ལ།།
ལྷུན་གྲུབ་དཀོར་བདུན་གས༵ས་ཁང་དུ།།
བསྐྱེད་རྫོགས་འོད་རིས་གཡས་སུ་འཁྱིལ།།
༥༧༽རྒྱལ་ཀུན་གསུང༵་གསང་སྒྱུ་འཕྲུལ་ལས།།
གནམ་བདུད་ལྷ༵་སྲིན་བགེགས་བཅོམ་ཕྱིར།།
དཔའ་རྒོད༵་ཁྲོ་གཏུམ་གཟུགས་ཤར་བའི།།
བསྙེན་སྒྲུབ་གདངས་དབྱངས་རྔ་གསང་སྤུན།།
༥༨༽བདེ་སྟོང་གཉུག་མའི་ཐུག༵ས་མཛོད་དུ།།
བརྒྱད་ཅུའི་ཁྲོ་ཚོགས་གཙོ༵་འཁོར་གསལ།།
དྲུག་སྐོར་འཕྲོ་འདུའི་བདག་རྐྱེན་ལས།།
མཆོ༵ག་ཐུན་དངོས་གྲུབ་ཚེ་འདིར་བརྙེས།།
༥༩༽ལེགས་འབྱུང་ཡོ༵ན་ཏ༵ན་སྤྲིན་རུམ་ལས།།
གེ༵་བདུད་བྲག་ཆེན་གཏོར་བའི་གཤེད།།
ཁོ༵ད་སྤུངས་གློག་འོད་བསྡེབས་དང་ལྷན།།
ལས་སྦྱོར་མེ་ཆར་དགུང་ནས་ཕབ།།
༦༠༽ཟབ་རྒྱས་སྡེ་སྐོར་དོན་གསུམ་གྱི།།
མཛད་ཕྲིན༵་ལས༵་རིམ་ཉེར་ལྔའི་འབྲུ༵ག།
མཐའ་སྒྱུར་མེ་གཤོག་གྲ་རྒྱས་པས།།
ལྷ་གས༵ས་དབུ་འཕང་དགུང་བས་མཐོ།།
༦༡༽གྱི་གྲན་བསྟན་དགྲ་ཐལ་བའི་རྡུལ།།
བརླག་མཛད་དབལ་གཤེན་སྟག༵་ལ༵་ཡི།།
གཞུང་བཟང་དཀར་ནག་དམར་གསུམ་སྒོར།།
ལས་ཚོགས་མངོན་སྤྱོད་སྦྱོར་སྒྲོལ་ཟབ།།
༦༢༽མ༵་རྒྱུད༵་གཞི་ལམ་འབྲས་གསུམ་མཁར།།
མ༵་ཚོགས་སུམ་བརྒྱ་དྲུག་ཅུ་གསལ།།
མ༵་ལུས་ཟུང་འཇུག་སྒྱུ་མའི་སྐུར།།
མ༵་བཅོས་གྲུབ་ཆེན་བརྒྱད་ཅུ་བཞིན།།
༦༣༽བརྩེ་ཆེ༵ན་གངས་དཀར་བཞུར་བའི་རྒྱུན།།
བྱམ༵ས་ཆེ༵ན་སྲས་ཡུམ་ཟླ་བའི་མ༵།།
བསྙེན་ཆེ༵ན་དབྱར་གྱི་ལང་ཚོ་ཡིས།།
བྱིན་ཆེ༵ན་རླབས་ཕྲེང་ཕྱོགས་བརྒྱར་སྤྲོས།།
༦༤༽གཞན་ཡང་རྣམ་གདུགས་དྲན་པ་སོགས།།
རྩ་གསུམ་དམ་ཅན་རྒྱ་མཚོའི་ཚོགས།།
བསྙེན་གྲངས་སྟོང་འུར་ཙམ་མིན་པའི།།
སྒོམ་བཟླས་གཉུག་མའི་སྒྲུབ་པ་ཟབ།།
༦༥༽མ༵ན་ངག༵་བཀ༵འ་ལུང་ཡངས་པའི་མཁར།།
དགོངས་རྒྱུད༵་སྡེ༵་སྐོར༵་ཆེ་བཞི༵འི་ཉི།།
བློ༵་འདས་རང་རི༵ག་ཚ་ཟེར་གྱིས།།
བློ༵་རྟོག་མ་རི༵ག་གཡུལ་ལས་རྒྱལ།།
༦༦༽ཀློ༵ང་རྡོལ་གཞི་ལམ་འབྲས་བུའི་སྡེ༵།།
ཀུན་བསྒྲ༵གས་ས་གསུམ་སྙན་པ༵་ཡི།།
རྒྱུད་ལུང་མན་ངག་སྐོ༵ར་ཆེན་གསུ༵མ།།
ཡོངས་རྫོགས་ལྟ་སྒོམ་རྒྱན་དུ་སྤུད།།
༦༧༽སྤྲོས་བྲལ་སེམ༵ས་སྡེ༵་ཆུ་གཏེར་འཇིངས།།
གབ༵་གསང་འདོད་པ༵་དགུ༵་འགྱུར་དབྱིག།
ཐོས་བརྩོན་ཀུན་དགའ་འོད་ཆེན་གྱིས།།
སྐོར༵་གསུམ་རྒྱལ་མཚན་གཙུག་ཏུ་བཀོད།།
༦༨༽མ་ལུས་མགྲོན་བཞིའི་ཐུགས་སྐོང་བའི།།
མཆོད་གཏོར་རྩིས་འགོ་བདུན་པ་སོགས།།
སྤྱོད་པ་བཀའ་རྟགས་ཕྱག་རྒྱའི་དོན།།
ཆད་མེད་བརྡ་ཀླུང་དལ་འབབ་བཞིན།།
༦༩༽ཆེ་བ་ལས་བཞི་བཀའ་འགྱུར་ནས།།
ཆུང་བ་བསྐང་གསོལ་མདོ་ཟློག་ཡན།།
རྒྱ་ཆེའི་དད་ལྡན་རེ་འདོད་བཞིན།།
ཐོགས་མེད་སྒྲུབ་པའི་དགེ་ཚོགས་ཟབ།།
༧༠༽རིག་གཞུང་གསེར་སྦྱངས་དོ་ར་ན།།
ངོ་མཚར་མཁྱེན་དཔྱོད་གཞོན་ནུའི་ཚོགས།།
བརྡ་དག་སྙན་གཞུང་རྩིས་སྡེབ་སྦྱོར།།
གང་འདོད་སྒྱུ་རྩལ་གར་ལ་བྲེལ།།
༧༡༽འཆ༵ད་པས་གཞུང་ལུགས་གདམས་པར་ཤར།།
རྩོད༵་པས་རྒོལ་ངན་དོན་སྙིང་འབྱིན།།
རྩོམ༵་པས་མཁས་རྒུའི་ཡིད་དབང་འཕྲོག།
སྒྲུབ༵་པས་འབྲས་བུ་མངོན་དུ་བྱེད།།
༧༢༽མདོར་ན་སྙིགས་དུས་རྒྱལ་བའི་བསྟན།།
འཛིན་པར་ཁས་འཆེ་གྲངས་མང་ཡང་།།
རིས་མེད་བཤད་སྒྲུབ་སྒོམ་གྱི་སྡེ།།
ཡང་དག་ཚུལ་ལྡན་འདི་ཀོ་ཙམ།།
༧༣༽དེ༵་ལྟའི་ལེགས་ཡོན་མཐའ་ཡས་པ།།
དེ༵་ཉིད་གཟིགས་ཀྱིས་བརྗོད་དཀའ་ཡང་།།
དེ༵་ལྟར་སྨྲས་ལ་ནོངས་པའི་ཚོགས།།
དེ༵་དག་མ་རིག་བློ་ཡི་དབང་།།
༧༤༽འདི༵ར་སྣང་ཁོལ་པོར་འཕྱན་པ་བདག།
འདི༵་བཞིན་བྱ་བའི་སྐལ་དབེན་ཡང་།།
འདི༵་ཡིས་ཡིད་སེམས་འཕྲོག་ཆེས་པས།།
འདི༵་ལྟར་དབང་མེད་ངག་ནས་ཤོར།།
༧༥༽རྣམ༵་དག་ལྷག་བསམ་རྒྱ་མཚོའི་བཅུད།།
རྣམ༵་བཤད་ཉ་རྒྱས་ཟླ་བ་འདིས།།
རྣམ༵་དཀར་བསིལ་ཟེར་འཇོ་བ་གང་།།
རྣམ༵་དཔྱོད་པད་དཀར་གསོས་སུ་སྦྱིན།།
བསྟན་རྣམ་པས་༢༠༡༡ལོའི་ཟླ་༣པའི་ཚེས་༢༣ཉིན་གྲུབ་པར་བགྱིས་པ་དགེའོ།།
