༄༅།།གསར་དར་ཐར་ལམ་
ཐེམ་སྐས།།
༧ སྲིད་དང་ཞི་བ་ཟུང་དུ་གྲགས་པའི་ཆེན་པོ་ལུགས་གཉིས་ཁོར་ཡུག་འདིར།།
ལེགས་དང་ཉེས་པའི་བྱ་གཞག་གང་ལའང་སོ་སོའི་ཐོབ་ཐང་རིམ་པ་ནི།།
བཟོ་བོ་མཁས་པའི་པིར་རྩེས་བྲིས་འདྲའི་མ་ནོར་སྐྲས་ཀྱི་གདང་བུ་ལྟར།།
བྱེད་པོས་ཆེད་དུ་མ་བཟོས་ན་ཡང་དོན་འཐོབ་འདི་ཀོ་གཤིས་སུ་གྲུབ།།
༧ གང་ཞིག་རྫོགས་ལྡན་བསྐལ་པ་བཟང་པོའི་དགེ་འདུན་བསྟི་བའི་སྡེ་ཁྱིམ་དུ།།
ངེས་དོན་ལུང་རིགས་ཟབ་མོའི་གནས་ལ་སྦྱང་གོམས་ཇི་ཞིག་བགྲོད་པའི་སྐབས།།
ཐོག་མའི་སློབ་རིམ་བསྡུས་ར་བ་འམ་དབུ་ཚད་ས་ལམ་འདུལ་མཛོད་སོགས།།
བསླབ་པའི་གོ་རིམ་དབུ་ནག་མི་ལ་ཁྲི་སྐོར་ཟེར་ལྟར་དོན་དུའང་གནས།།
༧ བརྒྱ་པའི་མགོན་དེས་རྩོད་ལྡན་དམུ་རྒོད་འགྲོ་རྣམས་འདུལ་བའི་ཆེད་དམིགས་པའི།།
བཅས་དང་རང་བཞིན་ཁ་ན་མ་ཐོའི་རྩ་ལག་བསླབ་ཁྲིམས་སྣ་ཚོགས་ཤིག།
རྗེས་སུ་བཞག་བཞིན་དུས་ཚིགས་སྟོན་པ་སྨྲ་དབང་ཡོངས་འཛིན་གང་དེ་ཡིས།།
ལྟོས་བཅས་རྗེས་འཇུག་འཕྲུལ་འཁོར་དོར་ཅེས་གསུང་ཕྲིན་ཕྱོགས་འདིར་ཆེད་དུ་བསྩལ།།
༧ གཞན་དུ་སྟོང་ལོ་ཟླ་ཕྱོགས་སྨད་དུ་ཧི་བོན་དྲྭ་ཚིགས་གོ་ས་དེར།།
“དལ་མཚོའི་རླབས་ཕྲེང་”མིང་དུ་གྲགས་པའི་ཟིན་བྲིས་གསར་པའི་གདན་བཟུང་བས།།
“གོ་ཐོབ་བསྡུས་གྲྭའི་”བསླབ་རིམ་མིང་ཞིག་རང་སྐལ་ཐོབ་པའི་ཚིག་འོག་ནས།།
ཤུགས་བསྟན་དེང་གི་བླ་གྲྭའི་ཁྲོད་ནས་དཔྱད་གཞིའི་གསང་བ་འདི་འདྲ་རྙེད།།
༧ འཛམ་གླིང་འཁོར་ཕྱོགས་ཡར་ཐོན་མི་རིགས་འཇིག་རྟེན་འཚོ་གནས་བྱ་གཞག་གམ།།
དོན་གྱི་གལ་མདོ་རིག་གཞུང་སྟོང་གི་དཀའ་གནད་དྲི་བའི་གནས་དབེན་ཀྱང་།།
གང་ལ་བསླབ་པ་དེ་ལ་མཁས་ཞེས་ཉམས་མྱོང་སྟོང་ལྡན་བཤེས་མཆོག་ལ།།
སྔར་མེད་གསར་ཐོན་བསླབ་རིམ་ཐོབ་ཆའི་བཀའ་འདྲི་འདི་ལ་གསུང་ལན་གནང་།།
༧ གསར་དར་འཕྲུལ་འཁོར་བཟང་ངན་ཐོག་ནས་སོ་སོའི་གོམ་པ་འཇོག་པའི་ཚེ།།
ཐོག་མར་འཇུག་སྒོ་ཁ་པར་འཛིན་གྲྭ་དེ་མཚམས་སྦག་སྦག་འཛིན་གྲྭ་ནས།།
ནམ་ཞིག་རླངས་འཁོར་དེ་ནས་མེ་འཁོར་དེ་ཐོག་གནམ་གྲུ་ལས་སོགས་པ།།
བསླབ་པའི་གོ་རིམ་ཇི་ལྟར་བགྲོད་ན་རྩེ་མོ་བྱུང་རྒྱལ་གང་ཞིག་ལགས།།
༧ མི་བུ་གཅིག་ལ་སྒེར་གཏད་མེད་ཀྱང་སྔོན་མ་ཤི་བའི་བྱ་རོ་ལྟར།།
བ་རྐུན་རྐང་པར་རྡོ་རྒྱོབ་ཅེས་པའི་དཔེ་ཟླ་སྲིད་ན་དེ་ལྟར་ལས།།
སྤྱི་གཏམ་བདག་མེད་ནམ་མཁའི་དབྱིངས་སུ་ཀུན་ཁྱབ་འབྲུག་སྒྲའི་ངང་ཚུལ་འདི།།
གཟུར་གནས་བློ་ལྡན་དགོངས་འཚོམ་མེད་པར་ཐུགས་དམ་གསོང་པོར་མཛོད་ཅིག་ཀྱེེ།།
