ལོ་འཁོར་རྩོད་རྒྱུགས་ཆེན་མོ། 

དེ་ཡང་མཚན་ཉིད་སློབ་གཉེར་བ་ཞིག་ལ་མཚོན་ལ་རང་གིས་གཞུང་འདི་དང་དེ་ལ་སྦྱོང་བ་ཡིན་ཞེས་པ་ཙམ་མ་ཡིན་པར་གཞུང་གང་དང་གང་ལ་སྦྱོང་སྐབས་རྒྱུགས་ལེན་ཚད་ལྡན་བྱས་རིམ་བཞིན་འཛིན་གྲྭ་རིམ་པར་འཕར་དགོས་པའི་མཚན་ཉིད་ཀྱི་གྲྭ་ས་ཆེན་མོ་ཁག་གི་སྒྲིག་ལམ་ལྟར་༧དབང་ལྡན་ཞུ་ཡི་གདན་ས་དཔལ་ལྡན་སྨིན་གྲོལ་གླིང་༧སྤུ་རྒྱལ་རིག་སློབ་ཁང་གི་མཚན་ཉིད་བཤད་གྲྭ་བ་རྣམས་ནས་ཐེངས་དང་པོའི་ལོ་འཁོར་གྱི་རྩོད་རྒྱུགས་ཆེན་མོ་དེ་བཞིན།  གཤེན་གྱི་འབྱུང་ལྡན་སུམ་བརྒྱ་གཅིག་གི་ནང་ཚན་རབ་མཛོད་སྨིན་དྲུག་ཟླ་བའི་དགའ་བ་གཉིས་པའི་ཚེས་བཟང་ཉིན་དབུ་བཞུགས་མཁན་སློབ་དགེ་བའི་བཤེས་གཉེན་དང་འདུས་པ་རྒྱ་མཚོའི་དྲུང་དུ་འཛིན་གྲྭ་སོ་སོའི་སློབ་གཉེར་བ་རྣམས་ནས་རྩོད་རྒྱུགས་དང་དམ་རྒྱུགས་གཉིས་ཟུང་འབྲེལ་གྱི་ཐོག་ནས་ལུང་དང་རིགས་པའི་དགྱེས་མཆོད་ཕུལ།  དེ་ཡང་རྒྱུགས་གཞི་འཛིན་གྲྭ་སོ་སོའི་ཡིག་ཆ་ཁག་ནས་དཀའ་བའི་གནད་རྣམས་སྔོན་ནས་གོ་སྒྲིག་གནང་དོན་ལྟར་རྒྱུགས་འབུལ་དངོས་ཀྱི་སྐབས་སུ་རང་རང་གི་རྩོད་ཟླ་དང་ཨང་རིམ། དེ་བཞིན་རྒྱུགས་གཞི་གང་ཞིག་ཡིན་པ་རྣམས་རྒྱལ་བླངས་ཏེ་རྒྱུགས་སྤྲོད་ཕུལ།   དེ་བཞིན་མཁན་སློབ་རྣམས་ནས་སློབ་གཉེར་བ་སོ་སོར་རྒྱུགས་ཚད་ཀྱི་ཨང་གྲངས་གང་ཞིག་ཐོབ་པ་སོ་སོར་ཐོ་འགོད་གནང་།   མཐར་འདི་ལོར་རྩོད་རྒྱུགས་ཐེངས་དང་པོ་ཡིན་གཤིས་ཨང་ཐོབ་གསལ་བསྒྲགས་དང་དེའི་བྱ་དགའ་ཆད་གཅོད་རྣམས་དངོས་སུ་ལག་ལེན་མ་བྱས་ཀྱང་མ་འོངས་དེ་བཞིན་དགོས་པའི་སློབ་སྟོན་བཅས་བྱེད་སྒོ་དེ་བཞིན་རྒྱལ་ཁའི་ངང་ནས་ལེགས་གྲུབ་བྱུང་སོང་།།