ཉིན་གཅིག་གི་ཚོར་བ།།

                 ཁྱུང་བཙན་རྒོད།།

རྒྱབ་རི་བླ་མ་འདྲ་བའི་མདུན་ཞོར་ལ།།

དགོན་པ་གངས་དཀར་འདྲ་བའི་ཁྲ་ལམ་མེར། 

པད་མ་མེ་ཏོག་འདྲ་བའི་གྲྭ་མང་དཀྱིལ།།

མགོ་ཀླད་ཉི་མར་སྲག་ནས་བལྟས་བསྡད་ཡོད།།

གཡས་རི་མེ་རི་འདྲ་བའི་སྟག་རྒོད་ནས།།

སྤྲིན་པ་བལ་དཀར་སྤུངས་པ་འཁྲིག་བཞིན་གདའ།།

མདུན་དུ་གསེར་ཉ་འཁྱིལ་བའི་ཁྱུང་སྟེང་ནས།།

ལུས་སེམས་དགོན་ལ་གཏད་ནས་ལྷ་སྡེ་མང་།།

གཡོན་རི་བཙན་རྒོད་འདྲ་བའི་རི་དམར་ཡིས།།

སྐུ་ཞལ་ཁྲོ་བོའི་ཚུལ་སྟོན་རླུང་འཚུབ་སྡང་།།

རྫོང་ཆུ་ཟུང་ཁྲག་འདྲ་བའི་ཤུར་སྒྲ་ལ།།

གཡག་རྒོད་རོག་པོ་ཞིག་གིས་ཉན་ནས་ཡོད།།

མདུན་ལ་གླང་ཆེན་འགྱིང་འདྲའི་རི་བོ་འདུག །

འདབས་ལ་གཡུ་འབྲུག་འདྲ་བའི་ཆུ་བོ་འདུག །

མཐའ་ལ་སྟག་རྫོང་འདྲ་བའི་ནག་ཚལ་འདུག །

ཕྱི་དམར་ནང་དམར་བྱས་ནས་བསྡད་བཞག་ཡོད།།

ཡར་ཞིག་ཕ་མ་འདྲ་བའི་བླ་མ་བཞུགས།།

མར་ཞིག་དད་ལྡན་འགའ་ཞིག་ཕེབས་སྡད་འདུག །

ཟུར་དུ་ཕུ་ནུ་འདྲ་བའི་སློབ་གྲོགས་ཡོད།།

ཁ་ཁོག་ཡོད་ཚད་དགའ་བའི་མྱོས་བཞག་ཐལ།།

༢༠༡༤/༡༠/༡༥/ཉིན་ཕྱྭ་གཡང་ཁང་དུ་ཁྱུང་བཙན་རྒོད་ནས།