དུས་ཀྱིས་འཕྲད་པའི་ཟིན་གྲོགས་ཡོངས་ལ་ཐོག་མའི་འཚམས་འདྲི་དང་འབྲེལ་བཀྲ་ཤིས་པའི་རྟེན་འབྲེལ་དང་བྱུང་བའི་ཁུངས་བཙུན་པའི་དགོས་པ་ལ་བརྟེན། དབུ་མཇུག་གཉིས་ལ་ཞང་ཞུང་སྨར་སྐད་ལ་ཐ་ཙན་མུ་ཙུག་སྨར་རོའི་ཐམས་ཅད་བཀྲ་ཤིས་དོན་འགྲུབ་པའི་ཚིག་གི་མདུན་བསུས་ཏེ།

ངེད་ཧི་བོན་ཟིན་བྲིས་ལས་སྣེ་ཐུན་མོང་གིས་ས་འཛིན་གོ་ལ་ཟླུམ་པོའི་དྲ་གྲོགས་དང་ཟིན་གྲོགས་ཀུན་ལ་གཅིག་ན་འཚམས་འདྲིའི་བཀྲ་ཤིས་བདེ་ལེགས་དང་། གཉིས་ན་དུས་རབས་ཉེར་གཅིག་དུས་འདིར་འཛམ་གླིང་ཡུལ་གྲུ་ཀུན་ལ་དྲ་བའི་འཇིག་རྟེན་གསར་པ་ཞིག་སླེབ་ཡོད་པས། ངེད་རྩམ་གཟན་ཁ་བ་རི་པའི་རིགས་རུས་གཏོགས་པ་ཞིག་ཡིན་ཕྱིན། དུས་རབས་དང་། འཛམ་གླིང་ལ་ཁ་ཕྱོགས་རྒྱུ་དེ་གལ་ཆེའི་ནང་གི་གལ་ཆེན་གནད་ཅིག་ཡིན།དེས་ན་མྱུར་མགྱོགས་ཅན་གྱི་གློག་འཕྲིན་གྱི་བརྒྱུད་ནས་འཛམ་གླིང་ཡུལ་གྲུ་གང་ལ་གནས་ཀྱང་ཕན་ཚུན་བགྲོ་གླེང་དང་། གཏམ་བཤད། ཡིག་བསྐུར། འཕྲིན་གཏོང་།

དྭོགས་དཔྱོད་སོགས་སོ་སོའི་ཐུགས་འདོད་གང་ཡོད་སྐད་ཅིག་ཙམ་གྱི་ལམ་ནས་མཁྱེན་རྟོགས་བྱེད་ཐུབ་པ་དེ་དུས་རབས་གསར་པའི་རིག་རྩལ་གྱི་སྟོབས་ལས་གྲུབ་པ་ཞིག་ལོས་ཡིན།   དེས་ན་དེ་རིང་ཚེས་བཟང་གི་དུས་འདིར་རྒྱ་ཆེའི་གཟིགས་པ་པོ་རྣམས་ཀྱི་སྤྱན་སྔར་ངེད་ཧི་བོན་ཟིན་བྲིས་ཤར་གཏོང་ཐུབ་སྟེ་ཁྱེད་རྣམས་ལ་ཞབས་ཞུ་བསྒྲུབ་རྒྱུའི་སྐལ་བཟང་གི་གོ་སྐབས་བཟང་པོ་ཐོབ་པ་དེ་ངེད་ཧི་མ་ལ་ཡའི་བོན་གྱི་དྲ་བ་དང་། ཧི་བོན་ཟིན་བྲིས་ཀྱི་ཞབས་ཞུའི་ལས་སྣེ་ཡོངས་ཕུགས་བསམ་རྒྱ་ཆེའི་དམིགས་དོན་དང་། དམངས་ཕན་ཞབས་ཞུའི་ལས་དོན་ཕྲན་བུ་བསྒྲུབ་ཐུབ་པ་དེ་སེམས་རྩ་སྤྲོ་བའི་ངང་ནས་དྲ་བའི་ལྡེ་མིག་དང་། ཟིན་བྲིས་ཀྱི་དཔྱིད་ཀྱི་རྒྱལ་མོའི་དུས་བརྡ་དེ་ཁྱེད་རྣམས་ལ་ལེགས་སྐྱེས་སུ་འབུལ་ཐུབ་པ་བྱུང་བ་དེ་སྤྲོ་བ་རབ་ཏུ་བརྟས་པའི་ཨེ་མ་ཧོ་དང་ཐ་ཚན་མུ་ཙུག་སྨར་རོའི་མཐར་བརྒྱན་ནས་སྤྲིངས་པའོ།

ཧི་བོན་ཟིན་བྲིས་མཁན་པོ་ཏི་པོམ་ཐང་ནས་གུས་འདུད་དང་བཅས་པས་ཕུལ།