༄༅།། ཁྱུང་པོ་སྟེང་ཆེན་གྱི་འགྱུར་ལྡོག
ང་རང་དེ་སྔོན་སོ་ཚིས་ཆེད་དུ་ལྷ་ལྡན་ཞིང་དུ་ཡོང་ན་ཡང་།།
ཡི་གེའི་རྩེད་འཇོ་གང་ཞིག་བརྩེས་ཀྱང་ལྟེ་ཁྲག་འཕོ་ཡུལ་བརྗེད་མ་མྱོང་།།
ཕ་སྐད་གཙང་མའི་གཏམ་གྱི་ཟུར་ནས་དུངས་བའི་སྨྲེང་གཏམ་ཆད་མ་མྱོང་།།
ཡུལ་ཕྱོགས་གང་དུ་གོམ་པ་སྤོས་ཀྱང་ཕྱིར་ལོག་མ་བྱས་བསྡད་མ་མྱོང་།།
ཁྱུང་ཡུལ་རིག་པའི་ཕ་ས་གྲུ་བཞིར་བགྲང་བྱ་གཉིས་ཙམ་མ་ལོག་རིང་།།
པོ་ཏི་བརྩེགས་འདྲའི་བ་གམ་ཁང་པས་མཐོང་ལམ་ཡངས་པོ་དོག་མོར་བཅད།།
སྟེང་ཕྱོགས་ལྷ་ཡུལ་མིན་ནམ་སྙམ་པའི་ཐེ་ཚོམ་སྐྱེ་གཞིའི་ཁོར་ཡུག་ནི།།
ཆེན་པོ་བོད་ཀྱི་རྒྱུད་པར་རློམ་པའི་གསར་སྐྱེས་ཚོ་ཡིས་བརླག་བཞིན་འདུག།
གྱི་ན་བ་ཡི་གྲལ་མཐར་གནས་པའི་ཐོས་ཆུང་བདག་གི་བློ་མིག་ངོགས།།
འགྱུར་བག་རྒོད་པའི་ཕ་ཡུལ་འདི་ལ་དགེ་སྐྱོན་ཟུང་ནི་མཆིས་ན་ཡང་།།
ལྡོག་ཟླར་ལངས་པའི་སྐྱོན་གྱི་ཚོགས་ནི་དགེ་མཚན་བས་ཀྱང་ཆེ་བར་སྣང་།།
འགའ་རེས་བལྟས་ན་བུ་ཆུང་བདག་ནི་གདོན་གྱིས་རློམ་ཞེས་དམོད་སྲིད་མོད།།
ཞིག་ལ་ཉེ་བའི་ཁང་རྒན་ལྟ་བུའི་ཕ་ཡུལ་གང་དེས་ན་ཟུག་བསླངས།།
                        

                           སྤྱི་ལོ་2011ལོའི་ཟླ་བ་7པའི་ཚེས་31ཉིན་དྲ་ཁང་ཞིག་ཏུ།།