ཟིན་བྲིས་ལི་ཐོ།
སྒྲིག་འཇུག...
སྤྱི་བསྒྲགས།
སྒྲིག་འཇུག...
ཆེད་སྒྲིག་རྣམ་དབྱེ།
སྒྲིག་འཇུག...
ཟིན་ཐོ་གསར་བ།
སྒྲིག་འཇུག...
དཔྱད་གཏམ་གསར་བ།
སྒྲིག་འཇུག...
ཆེམས་གསར་བ།
སྒྲིག་འཇུག...
འཚོལ་བཤེར།
སྦྲེལ་མཐུད།
ཐོན་བྲིས་སྤྱི་བསྡོམས།
སྒྲིག་འཇུག...


 
ཤར་རྫ་རིན་པོ་ཆེའི་གསུང་འབུམ་དཔར་སྐྲུན་སྐོར་གྱི་གནས་འཕྲིན།
[ 2011-07-29 10:44:00 | By: ཁྱུང་པོ་དཔལ་རྒྱལ། ]
 
          ཤར་རྫ་རིན་པོ་ཆེའི་གསུང་འབུམ་དཔར་སྐྲུན་སྐོར་གྱི་གནས་འཕྲིན།

མཁས་ཤིང་གྲུབ་པའི་དབང་པོ་ཀུན་མཁྱེན་ཤར་རྫ་བ་ཆེན་པོ་མཆོག་ཐོག་མར་བྱ་བྲལ་ཉམས་ཆུང་གི་སྒོ་ནས་མཚན་ལྡན་བླ་མ་དམ་པ་མཉེས་གསུམ་གྱིས་ཚུལ་མཐུན་བསྟེན་ཞིང་ཐོས་བསམ་ཚུལ་བཞིན་གནང་བའི་ཐོག་མའི་ཟིན་ཐོ་རིམ་རྒྱས་གཏང་བའི་སྔོན་འགྲོའི་ཁྲིད་རིམ་བཀའ་ལུང་རྒྱ་མཚོ་དེ་ཉིད་རྗེ་ཉིད་ནས་རང་ལ་གསལ་འདེབས་དང་གཞན་ལ་ཕན་ཕྱིར་ཁྲིད་དང་འཆད་པ་གནང་བ་གདུལ་བྱའི་ཁམས་དང་མོས་པར་ཕན་རླབས་ཆེ་བ་དངོས་ཡོད་གྱུར་བརྟེན། གཏེར་ཆེན་གསང་གླིང་མཆོག་ནས་རྗེ་ཉིད་ཀྱི་བསྟན་དོན་རྒྱ་ཆེར་འབྱུང་བ་མ་འོངས་སྔོན་གཟིགས་ཀྱི་བཀས་བསྐུལ་གནང་དོན། གང་ཉིད་ཀྱི་གསུང་གདམས་པར་བརྐོ་དགོས་ཚུལ་གསུང་། ཁོང་ཉིད་ཆེ་གྲགས་དྲེགས་ཚུལ་གྱི་རྣམ་པ་སོགས་གཏན་མེད་ཡིན་སྟབས། བྱ་བྲལ་སྤྲང་པོའི་ཚུལ་བཟུང་ལ་དེ་འདྲའི་མཐུན་རྐྱེན་རྩོལ་སྒྲུབ་མི་འབྱུང་ཚུལ་དང་། ངེད་ཀྱི་རྒྱ་ཆེའི་བྱ་བ་དེ་ལྟར་འགྲུབ་པ་དཀའ་ཚུལ་གསུངས་ཡང་གཏེར་ཆེན་མཆོག་ནས་ནན་བསྐུལ་གནང་བར་བརྟེན། པར་བརྐོ་དབང་ཕྱུག་ཞེས་པ་ཐོག་མའི་པར་མཁན་རྙེད་ནས་བཟུང་རིམ་པས་རྗེ་ཉིད་ཀྱི་གསུང་འབུམ་ཤིང་པར་བརྐོས་པ་སྤྱི་ལོ་ ༡༩༥༩ ལོའི་ཡར་སྔོན་དུ་ཤར་རྫ་རི་ཁྲོད་དུ་བཞུགས་པ་དང་། དེ་ཡི་དཔར་མ་སྟོད་སྨད་གང་སར་ཁྱབ་པར་གྱུར།། ཕྱིས་སུ་གངས་ཅན་སྤྱི་ཡོངས་ལ་རིག་གསར་གྱི་ཉམས་རྒུད་འོག་སྔ་དཔེ་དང་པར་ཤིང་སོགས་གཏོར་སྐྱོན་བྱུང་ཤུལ་ལས་ལྷག་པ་ཁྲ་རྒན་དགོན་པའི་འབངས་སྡེའི་གསེང་དུ་སྔར་དཔེ་དཔར་མ་ཉར་ཚགས་ཐུབ་རིགས་རྣམས་ཁྲ་དགོན་མཁན་པོ་སྐལ་བཟང་གཡུང་དྲུང་རིན་པོ་ཆེའི་ཕྱག་ཏུ་དཔེ་བདག་རྣམས་ཀྱི་དད་སྟོབས་ཀྱིས་ཕུལ་འབྱོར་བྱུང་བརྟེན། མཁན་རིན་པོ་ཆེ་གང་ཉིད་ནས་སྐབས་དེ་དུས་ཀྱི་དཔར་སྐྲུན་སྤུས་ལེགས་གནང་འཆར་གཙོ་གཉེར་གནང་བ་དང་འབྲེལ། ཨ་གཡུང་གཤེན་བསྟན་མཐའ་རྒྱས་རིན་པོ་ཆེ་དང་། རྩེ་དྲུག་བླ་མ་གར་དབང་རྣམ་རྒྱལ་རིན་པོ་ཆེ། བཻ་རོ་བློ་བཀྲ་སོགས་ཀྱིས་ཐུགས་ཁུར་ཆེན་པོས་གོང་རིམ་ལ་ཆོག་མཆན་ཞུས་དོན་བཞིན་ཐོབ། རྩེ་བླ་ཚུལ་ཁྲིམས་རབ་རྒྱས་རྣམ་དག་དང་། གྲྭ་སའི་རྒན་ལགས་བློ་གྲོས་ཉི་མ་རྣམ་གཉིས་ནས་བསྒྲིགས་ཞུས་གནང་བ་དང་། ལྷག་བསམ་དད་ལྡན་གེ་འགེངས་སྐལ་བཟང་རྣམ་རྒྱལ་དང་རྣམ་རྒྱལ་བཀྲ་ཤིས་གཉིས་གཙོས་པས་གལ་ཆེའི་མཐུན་སྦྱོར་ གནང་བ་བཅས་ཐུན་མོངས་མཉམ་འབྲེལ་གྱི་ལས་དོན་གཅིག་དྲིལ་བྱས་ཏེ། ཆབ་མདོ་དཔར་འདེབས་བཟོ་གྲྭ་རུ་སྤྱི་ལོ་༡༩༨༨ལོར་ཞན་པར་བསྒྲིགས་ཏེ་ཤར་རྫ་བའི་གསུང་འབུམ་པོད་བཅུ་གསུམ་དང་ཐེག་འགྲེལ་རྣམ་ཐར་སོགས་བསྡོམས་པའི་པོད་གྲངས་བཅུ་དྲུག་ཚར་གྲངས་༡༠༠༠པར་སྐྲུན་གནང་། གོང་གསལ་གནས་ཚུལ་དང་འབྲེལ་བའི་ད་སྐབས་དཔེ་ཚོགས་འདི་ཡི་འགྲོ་སྟངས་བབས་གནད་གང་ལ་འབྲེལ་ཡོད་ཟེར་ན། ༧ སྨྲ་དབང་ཡོངས་འཛིན་བསྟན་རྣམ་རིན་པོ་ཆེའི་བཞེད་པ་སྔ་དར་བཀའ་བརྟེན་དང་ཕྱི་དར་གསུང་འབུམ་ཞེས་ཕྱོགས་གཉིས་དབྱེ་གཤགས་གནང་བའི་དང་པོའི་དགོངས་དོན་ལྟར་སྤྱི་ལོ་༢༠༠༦ ཡན་མན་ནང་ཁྱུང་པོ་སྟེང་ཆེན་དགོན་ནས༼གཡུང་དྲུང་བོན་གྱི་བཀའ་བརྟེན་དཔེ་རྙིང་ཕྱོགས་བསྒྲིགས་༽པོད་གྲངས་༡༡༠ ཅན་པར་སྐྲུན་གྲུབ་རྗེས་ཕྱི་དར་གསུང་འབུམ་སྐོར་སྟོད་སྨད་གང་སར་བླ་སྤྲུལ་དགེ་བཤེས་གང་ཞིག་གིས་གཙོ་སྐྱོང་གིས་མཁས་གྲུབ་སོ་སོ་བའི་གསུང་རྣམས་རིམ་པས་གང་ཐུབ་ཀྱིས་བསྒྲིགས་སྐྲུན་སྤེལ་བའི་དགོས་གལ་ཆེ་ཚུལ་ཁྱུང་པོ་སྟེང་ཆེན་དགོན་གྱི་༼གཡུང་དྲུང་བོན་གྱི་བཀའ་བརྟེན་དཔེ་རྙིང་ཕྱོགས་བསྒྲིགས་ལྷན་ཁང་༽ནས་འབོད་བསྐུལ་ཁ་གསལ་ཅན་ཞིག་སྤྱི་ལོ་༢༠༠༩ལོར་༼གཡུང་དྲུང་བོན་གྱི་བཀའ་བརྟེན་དཔེ་རྙིང་ཕྱོགས་བསྒྲིགས་ཀྱི་གནས་བསྡུས་གསལ་སྟོན་མེ་ལོང་༽ནང་ཞུས་པ་ལྟར་དེ་མཐུན་དངོས་ཡོད་ལག་ལེན་སྟར་ཁུལ་གྱིས། ཕྱི་དར་གསུང་འབུམ་སྐོར་ལས་ཀུན་མཁྱེན་ཤར་རྫ་བའི་གསུང་འབུམ་འདི་གར་གློག་ཀླད་དུ་བསྒྲིགས་ཞུས་བྱས་པ་དེབ་གཟུགས་སུ་བཀོད་པའི་དགོས་གལ་ནི། སྤྱི་ལོ་༢༠༡༠ཡར་སྔོན་དུ་གང་སར་ཁྱབ་སྤེལ་བྱས་རིགས་གཙོ་ཆེར་སྔ་མའི་ཆབ་མདོའི་ཞན་པར་ཅན་དེ་བསྐྱར་སྐྲུན་ཡང་སྐྲུན་བྱས་པ་ལས་ལྷག་པ་མེད་གསལ་ཡིན་ན། ཞན་པར་ཅན་དེའི་པར་གཞི་བསྒྲིཊ་སྐབས་ཀྱི་མཐུན་རྐྱེན་རྒྱབ་ལྗོངས་དང་འཚམས་པའི་བྱས་པ་ལས་བསྐྲུན་པར་མ་འདང་བའི་ཞན་ཆ་ཡོད་པ་དཔེར་ན། མ་དཔེ་གཅིག་ལས་གཞན་པའི་བསྡུར་ཡ་མ་རྙེད་པ་ དང་དགོས་ངེས་ཡོད་རིགས་དཔེ་ཆ་མ་འབྱོར་བ། ཞུས་བསྒྲིགས་ལས་སྣེ་མི་སྣ་ཉུང་ཁར་ཞུས་བསྒྲིག ས་ལག་སྟར་ཤིན་ཏུ་དཀའ་བ། འཕྲུལ་ཁང་དང་པར་ཆས་སོགས་ལ་ད་ལྟ་བས་ལྡབ་འགྱུར་མང་པོའི་མཐུན་རྐྱེན་ཉུང་བ་སོགས་ཀྱི་གནས་སྟངས་འབྲེལ་འོག་ལས་ཐོན་པའི་དཔེ་ཚོགས་དར་ཁྱབ་ཆེ་བ་མཐོང་གསལ་ལྟར་ན། འདི་ལ་དགེ་འདོན་སྐྱོན་སེལ་གྱི་ཞབས་ཞུ་དགོས་གལ་ཆེ་སྟེ།
མདོ་སྔགས་སེམས་གསུམ་ཆ་ཚང་བའི་ཟབ་གདམས་གདུལ་བྱའི་དབང་པོ་དང་འཚམས་པའི་སྔོན་འགྲོའི་ཁྲིད་དང་དངོས་གཞིའི་ཁྲིད་རིམ། རྩ་ཐིག་རླུང་གསུམ་གྱི་སྦྱང་ཁྲིད་དང་འདི་སྣང་བསྒྱུར་བའི་བསྐྱེད་རྫོགས་ཀྱི་རིམ་པ། འོད་གསལ་གྱི་ཟབ་གནད་ལམ་དུ་ལྷོངས་བའི་མན་ངག་སོགས་སྐལ་ལྡན་ སྐྱེས་བུ་མངོན་སངས་རྒྱས་པའི་ལམ་སྒྲོན་གོ་སླ་འཇུག་བདེ་ཅན་ལ། དེ་དང་འབྲེལ་བའི་སྔ་རབས་བྱུང་བརྗོད་ཀྱི་ལོ་རྒྱུས་བཅས་ཆ་ཚང་བའི་ཕྱི་དར་མཁས་པའི་གསུང་འབུམ་ཆ་ཚང་ཤོས་དང་རྒྱས་ཤོས་ཡིན་ན། འདི་ཉིད་ལ་ཆད་འཁྲུགས་སོགས་ཀྱི་ཞན་ཆ་ཡོད་རིགས་གང་ཡོང་ཅི་ཡོང་གི་སྒོ་ནས་དག་འབུད་གཏོང་བའི་སྒོ །པར་གཞི་ཞུས་བསྒྲིགས་དང་དཔེ་སྐྲུན་སྐབས་སུ་ཁེལ་སྟབས། དེ་མཐུན་གྱི་རྒྱབ་རྟེན་པར་ཁང་སོགས་ཡོ་བྱད་རིགས་དུས་བབ་ཀྱིས་འཁོར་ཞིང་། སྔ་དཔེ་མ་འབྱོར་བ་ཁག་ཅིག་ལག་སོན་བྱུང་བ་དང་། སྔ་མའི་ཤིང་དཔར་ཅན་ཉར་ཚགས་ཐུབ་པ་ཀ་ལེགས་དགོན་དང་རྒན་བསམ་གཏན་ཡེ་ཤེས། སྟེང་ཆེན་དགོན་བཅས་སུ་ཡོད་རིགས་ཕྱོགས་གཅིག་ཏུ་འབྱོར་བ་དང་། བསྟན་སྦྱིན་ལྷག་བསམ་ཅན་ཚོས་གལ་ཆེའི་མཐུན་སྦྱོར་འཛོམས་པ་སོགས་ དང་སྟབས་བསྟུན། ༼གཡུང་དྲུང་བོན་གྱི་བཀའ་བརྟེན་དཔེ་རྙིང་ལྷན་ཁང་༽གཙོ་གཉེར་བ་ཁྱུང་པོ་སྟེང་ཆེན་དགོན་གྱི་མཁན་པོ་༧ འོད་ཟེར་སྦྱིན་པ་ཕུན་ཚོགས་རིན་པོ་ཆེ་གཙོས་སྐབས་ཀྱི་ལས་དོན་ལག་སྟར་ལྷག་བསམ་ལྡན་པ་རྣམས་ཀྱིས་རང་འཁྲིའི་ཕྱག་ལས་ཧུར་ཐག་གནང་བ་སོགས་ཀྱིས་ཐུན་མོང་མཉམ་སྦྲེལ་རྡོག་གཅིག་གིས་ཀུན་མཁྱེན་ཤར་རྫ་བའི་གསུང་འབུམ་དེབ་ཕྲེང་བཅུ་བདུན་ཅན་འདི་ཞུས་འཇུག་བསྒྲིགས་པའི་སྐལ་པ་ཅན་དུ་གྱུར། འདི་ཡི་མ་དཔེ་སྔ་མའི་ཤིང་དཔར་ངོ་མ་དང་གཞི་བཟུང་བྱས་ཐོག་ཆབ་མདོའི་ཞན་པར་ཅན་དང་འདྲ་བསྡུར་བྱས། མ་དཔེ་འདྲ་ཡ་མ་རྙེད་པ་རྣམས་དེ་རང་ཞུས་བསྒྲིགས་བྱས་པ་དང་། ཞུས་བསྒྲིགས་སོགས་ལས་དོན་པ་ངེད་ཚོའི་ངོས་ནས་ཀྱང་བསོད་ནམས་ཚོགས་བསགས་ཀྱི་རྒྱུ་རུ་དམིགས་ཁུལ་གྱིས་དེ་ཐད་འབད་པ་གང་ཤེས་གང་ནུས་བྱས་ཡོད་ནའང་། ད་དུང་རང་ངོས་ཀྱི་མ་རྟོགས་པ་སོགས་དང་། གཞན་རྐྱེན་དབང་གི་མ་འདང་བའི་ཞན་ཆ་སོགས་ཡོད་གཏན་སྲིད་ ངེས་ཡིན་ན། ཕྱིས་སུ་དཔྱོད་ལྡན་མཁས་དབང་རྣམས་ཀྱིས་དག་འབུད་གནང་རེ་དང་གནང་འོས་ཡིན་ནའང་། དེ་ལས་གཞན་པའི་ཉ་་ཉོག་རིགས་རྣམས་གཏང་སྙོམས་མཁའ་ཡངས་ངོགས་སུ་རང་དྭངས་སུ་འཇོག་ན་ཅི་བས་མཛེས་པར་སེམས་། དེ་ལྟར་ཁྱུང་པོ་སྟེང་ཆེན་གྱི་བཀའ་བརྟེན་དཔེ་རྙིང་རྩོམ་སྒྲིག་ཁང་ནས་ལོ་དང་ཟླ་བར་ཀུན་མཁྱེན་ཤར་རྫ་བའི་གསུང་འབུམ་འཚོལ་བསྡུ་དང་ཞུས་བསྒྲིགས་་ཀྱི་ཐད་ལ་བརྩོན་པ་བསྐྱེད་འབྲས་བུར་འདི་ལོའི་སྤྱི་ཟླ་བརྒྱཔའི་ནང་དུ་སི་ཁྲོན་མི་རིགས་དཔེ་སྐྲུན་ཁང་ནས་གསུང་འབུམ་ཚར་གྲངས་སྟོང་ཚོ་བཞི་ཙམ་ཞིག་དཔར་དུ་སྐྲུན་པའི་བྱ་གཞག་ལེགས་འགྲུབ་ཡོང་འཆར་ཡོད་པས་སྐལ་ལྡན་ཡོངས་རྫོགས་ཀྱིས་དད་སྤྲོ་མོས་པས་ངང་སྒུག་གནང་དང་ཆོག་པར་ངེས་་སོ།།
འདི་སྐྲུན་དགེ་བས་ཕྱི་དར་མཁས་པའི་གསུང་འབུམ་རིམ་སྐྲུན་དག་སྤེལ་འབྱུང་སྒོའི་དཔེ་སྟོན་འགྱུར་བ་དང་གང་སྐྲུན་གསུང་རབ་ཀྱི་བསྟན་དོན་ འགྲོ་ཁམས་སུ་སྨིན་ཏེ་ཕན་བདེ་དངོས་འབྱུང་ཡོང་བའི་བསྔོ་སྨོན་ལྷད་མེད་བྱས་པའི་མཚམས་འདིར། གཡུང་དྲུང་བསྟན་པ་གཅིག་གི་བྱས་པ་མ་གྲོས་མཛད་བཟང་གཅིག་ཏུ་གྱུར་པའི་སྐྱེས་བུ་གཞན་ལ་སྤྲོ་བ་ཆེན་པོའི་རྗེས་རངས་འབུལ་ཏེ། མཆོག་སྤྲུལ་འཆི་མེད་གཡུང་དྲུང་རིན་པོ་ཆེས་གཙོ་གཉེར་གནང་བས་དབྲ་སྟོན་པའི་གསུང་འབུམ་ཞུས་བསྒྲིགས་བྱས་པ་དེབ་ཕྲེང་བརྒྱད་ཅན་དཔར་འགྲིམས་གནང་བ་དང་། ཀུན་གྲོལ་ལྷ་སྲས་མི་ཕམ་རྣམ་རྒྱལ་རིན་པོ་ཆེས་གཙོ་གཉེར་གནང་བས་རིག་འཛིན་ཀུན་གྲོལ་བའི་གསུང་འབུམ་ཞུས་བསྒྲིགས་གྲུབ་པ་དང་། གཙང་ཚྭ་དགེ་བཤེས་གཡུང་དྲུང་གཙུག་ཕུད་རིན་པོ་ཆེས་གཙོ་གཉེར་གནང་བས་རྒྱལ་བ་མཉམ་མེད་ཆེན་པོའི་གསུང་འབུམ་ཞུས་བསྒྲིགས་སྤེལ་གཏན་ཁེལ་བའི་མཛད་བཟང་བཅས་ལ། ཕྱི་དར་མཁས་པའི་གསུང་འབུམ་དག་སྐྲུན་འཕེལ་བའི་དགེ་མཚན་རྣམ་པར་རྒྱལ་བའི་སྨོན་རངས་སྤྲོ་གསུམ་གྱི་མཆོད་པ་སྒོ་གསུམ་དག་པས་ཞུས་ཏེ།
སླད་མར་ཁྱུང་པོ་སྟེང་ཆེན་དགོན་ཏུ་༼གཡུང་དྲུང་བོན་གྱི་བཀའ་བརྟེན་དཔེ་རྙིང་ལྷན་ཁང་༽ནས་བཀའ་བརྟེན་དཔེ་ཚོགས་གང་རུང་བསྒྲིགས་ཞུས་སྤེལ་བའི་འཆར་འགོད་ཡོད་པར་ལམ་དུ་ལྷོངས་བའི་རེ་སྨོན་དང་། དེ་བཞིན་སྟོད་སྨད་བར་གསུམ་གང་ས་ནས་བླ་སྤྲུལ་དགེ་བཤེས་གང་ཞིག་གིས་གཙོ་གཉེར་གྱིས་ཕྱི་དར་མཁས་པའི་གསུང་འབུམ་རྣམས་རིམ་བཞིན་བསྒྲིགས་ཞུས་དག་འཕེལ་འབྱུང་བའི་རེ་སྨོན་རྣམ་པ་དཀར་པོའི་མཚམས་སྦྱར་དང་བཅས། 

                                             ཁྱུང་པོ་སྟེང་ཆེན་དགོན་གཡུང་དྲུང་བོན་གྱི་བཀའ་བརྟེན་དཔེ་རྙིང་ཕྱོགས་བསྒྲིགས་ཁང་ནས་སྤེལ།

 
 
Re:ཤར་རྫ་རིན་པོ་ཆེའི་གསུང་འབུམ་དཔར་སྐྲུན་སྐོར་གྱི་གནས་འཕྲིན།
[ 2011-08-23 20:19:51 | By: yungdong(སྐུ་མགྲོན) ]
 
yungdong(སྐུ་མགྲོན)ཤར་རྫ་རིན་པོ་ཆེའི་གསུང་འབུམ་གསར་དུ་དཔར་གཞི་སྒྲིག་པའི་ལེགས་བཤད་དག་་མི་འགྱང་བ་མཇལ་ཐུག་པ་དགའ་སྤྲོ་ཤིན་ཏུ་ཆེ།
དེ་འདྲ་དཔར་གཞི་སྒྲིག་པ་བཀའ་དྲིན་ཤིན་ཏུ་ཆེ།
 
 
Re:ཤར་རྫ་རིན་པོ་ཆེའི་གསུང་འབུམ་དཔར་སྐྲུན་སྐོར་གྱི་གནས་འཕྲིན།
[ 2011-07-29 22:25:59 | By: སྐུ་མགྲོན་rVMy51(སྐུ་མགྲོན) ]
 
སྐུ་མགྲོན་rVMy51(སྐུ་མགྲོན)སྐུ་མཆོག་གངས་དཀར་ལྷུན་པོའི་ལྟོ་བ་ནས། །འཁྲུངས་པའི་ཐུགས་གསང་ཟླ་བའི་གུར་ཁང་གི །གསུང་མཆོག་མན་ངག་ཆར་གྱི་ཟེགས་མ་འབུམ། །གཅིག་ཏུ་སྦམ་པ་རིན་ཆེན་གཏེར་གྱི་མཛོད། །ཕྱོགས་ཀྱི་ལོག་རྟོག་མུན་པའི་ཁུང་བུ་དག །དམིགས་མེད་ཡེ་ཤེས་དབྱིངས་སུ་རྒྱས་བཏབ་ཅིང་། །རང་གསལ་ཤེས་རབ་སྒྲོན་མེའི་འོད་སྟོང་འབུམ། །མཐའ་མེད་འགྲོ་ལ་སེམས་ཀྱི་དཔྱིད་དུ་སྟེར། །དེ་ལྟའི་རྣམ་འཕྲུལ་ལེགས་བཤད་བདུད་རྩིའི་བཅུད། །སྐལ་ལྡན་འཁོར་བ་སྒྲོལ་བའི་དམིག་བུ་རུ། །སྒོ་གསུམ་བྱི་དོར་གཟབ་པའི་གླེགས་བམ་གྲངས། །སླར་ཡང་ཞིང་འདིར་འདྲེན་པ་ངོ་མཚར་ཆེ། །དེ་ཕྱིར་ཐུགས་བསྐྱེད་རྒྱ་མཚོའི་རླབས་ཕྲེང་ལས། །ཕྲིན་ལས་གསུང་གི་གཅེས་མཛོད་ནོར་བུའི་ཕྲེང་། །ཟད་མེད་མིག་གི་དཔྱིད་དུ་སྤེལ་བ་ལ། །དགའ་སྤྲོའི་ཚིག་གི་མེ་ཏོག་ཚོམ་ཞིག་ཕུལ། །བཀྲ་ཤིས་བདེ་ལེགས།
 
 
Re:ཤར་རྫ་རིན་པོ་ཆེའི་གསུང་འབུམ་དཔར་སྐྲུན་སྐོར་གྱི་གནས་འཕྲིན།
[ 2011-07-29 21:37:39 | By: yongzhou ]
 
yongzhouཁྱུང་པོ་དཔལ་རྒྱལ་ལགས་བཀྲ་ཤིས་བདེ་ལེགས་ཀྱི་མཚམས་འདྲི་ཞུ། ཤར་རྫ་རིན་པོ་ཆེའི་གསུང་འབུམ་གསར་དུ་དཔར་གཞི་སྒྲིག་པའི་ལེགས་བཤད་དག་རིང་མིན་མྱུར་དུ་མཇལ་ཐོབ་པའི་རེ་བ་སྙིང་ནས་ཆེ་བ་མ་ཟད། ཐེངས་འདིར་སྣང་མཐའ་བསྟན་འཛིན་ཉི་མས་སྒྲིག་པ་ལྟ་བུའི་ཆད་ལུས་ལྷག་གསུམ་མེད་པར་ཤོག
 
 
དཔྱད་གཏམ་སྤེལ་བ།
སྒྲིག་འཇུག...
Powered by Oblog.