ཟིན་བྲིས་ལི་ཐོ།
སྒྲིག་འཇུག...
སྤྱི་བསྒྲགས།
སྒྲིག་འཇུག...
ཆེད་སྒྲིག་རྣམ་དབྱེ།
སྒྲིག་འཇུག...
ཟིན་ཐོ་གསར་བ།
སྒྲིག་འཇུག...
དཔྱད་གཏམ་གསར་བ།
སྒྲིག་འཇུག...
ཆེམས་གསར་བ།
སྒྲིག་འཇུག...
འཚོལ་བཤེར།
སྦྲེལ་མཐུད།
ཐོན་བྲིས་སྤྱི་བསྡོམས།
སྒྲིག་འཇུག...


 
དཔོན་སློབ་ཚངས་པ་བསྟན་འཛིན་གྱི་མགུར་གླུ་སྤུས་ལེགས་ཤིག
[ 2012-07-16 17:42:00 | By: ཁྱུང་པོ་དཔལ་རྒྱལ། ]
 

  

༄༅།། རྫོགས་པ་ཆེན་པོའི་རང་བཞིན་བརྗོད་པའི་མགུར་

                       གླུ་བྱིན་བརླབས་ཆར་འབེབས།

ཨེ་མ་ཧོ། ཀུན་བཟང་མི་ཡི་གར་དུ་བཞེངས།། མཚུངས་མེད་དྲིན་ཅན་བླ་མ་རྗེ།།

བདེ་ཆེན་འཁོར་ལོའི་རྒྱན་དུ་བཞུགས།   བྱིན་རླབས་ཆར་ཆེན་ཕོབས་ཤིག་ཀྱེ།།

ཀ་དག་རྫོགས་ཆེན་ལྟ་བ་མཐོ།།       ལྷུན་འགྲུབ་འོད་གསལ་ལྟད་མོ་མཛེས།།

གསལ་སྟོང་དགོངས་པ་མཁའ་ལྟར་ཡངས།།  རྣལ་འབྱོར་ཕོ་མོའི་དགའ་བ་ལཱ།།

སྙེམ་རྟོག་བདུད་ཆེན་རང་སར་གྲོལ།།           རང་འབྱུང་ལྟ་བ་བློ་ལས་འདས།།

རྩོལ་མེད་འབྲས་བུ་ངང་གིས་གྲུབ།།          ཨེ་མ་རྫོགས་ཆེན་ཡོན་ཏན་ལཱ།།

སྟོང་པའི་ལྟད་མོ་མཇལ་ཙམ་ན།།          འཇིག་རྟེན་ཡོན་ཏན་སྒྱུ་མ་ཙམ།

ཆགས་སྡང་སྐྱེ་བའི་གནས་མ་གྲུབ།།     སྟོང་གཟུགས་དགོངས་པ་ཟབ་པ་ལཱ།།

གཤིས་ཀྱི་བུ་མོ་རིགས་བཟང་མ།།    སྣངགཞི་འོད་གསལ་རྒྱན་གྱིས་བཀླུབས།།

ཀ་དག་བཞིན་རས་ལྟ་ན་སྡུག།              ལྟ་བས་མི་ངོམས་མཛེས་པ་ལཱ།།

རང་རིག་ཉི་མ་རང་ནས་ཤར།།          ལྟག་ཆད་མུན་པ་གཞི་ལས་དྭངས།།

སྙིང་རྗེའི་ཆུ་བོ་ཁོང་ནས་བརྡོལ།།        རང་འབྱུང་རིག་པའི་ངོ་མཚར་ལཱ།། 

སྟོང་པ་བདེ་བའི་སྙིང་པོ་ཅན།།          རང་ཉིད་རང་གིས་མྱོང་ཚུལ་གྱིས།།

ཟད་མེད་བདེ་ཆེན་རོ་དང་འཕྲད།།        འདི་འདྲའི་ཉམས་ཀྱི་བདེ་བ་ལཱ།།

སྣང་བ་རྩ་བྲལ་སྟོང་སངས་ངེ་།།          ཉམས་ཀྱི་ཡོན་ཏན་འབེལ་བ་ལཱ།།

ཡིད་ཤེས་མིག་ཆེན་བགྲད་བལྟས་ཀྱང་།།  ཆ་ཙམ་མཐོང་བའི་སྐལ་པ་དབེན།།

མ་བལྟས་བབ་ལ་བཞག་ན་གསལ།།      མཐོང་བའི་ཚད་འདི་མཚར་བ་ལཱ།།

ཚིག་སྐམ་ནགས་ཁྲོད་འཕྱན་པ་ཡི།།     དགེ་བཤེས་སྟོན་ཆེན་ས་གང་ཡང་།།

སེམས་ཉིད་མཐོང་བ་ཉིན་སྐར་ཙམ།།   ཁྱེད་ཞལ་མཇལ་མཁན་དཀོན་པ་ལཱ།།

ཐོས་མེད་མུན་པའི་ཁུང་བུ་རུ།།             གླེན་སྒོམ་ཞག་མིག་བགྲད་ན་ཡང་།།

ཡང་དག་ཐར་པའི་ལམ་ལ་གོལ།།              སྒོམ་ཆེན་མཚན་སྙན་ཉུང་བ་ལཱ།། 

རྣམ་རྟོག་འབོད་པའི་གཡབ་མོ་ཆེ།།    འགལ་འབྲེལ་ཚིག་སྐམ་འུར་ལྡིར་གྱིས།།

གཤིས་ཀྱི་བྱིའུ་ཆུང་མཁའ་ལ་དཀྲོག།        རིག་པའི་སྐྱོང་ལུགས་དཀའ་བ་ལཱ།།

ཚེ་གཅིག་འདི་དང་འགྲོགས་མོད་ཀྱང་།།           སྐལ་ལྡན་བུ་ཡིས་ངོ་མི་ཤེས།།

མེད་དགག་མཁན་པོའི་བློར་མི་ཤོང་།།    མངོན་འགྱུར་ཆེན་པོའི་ཁྱད་ཡོན་ལཱ།། 

ཚུལ་གསུམ་རྟགས་ཀྱིས་སྒྲུབ་མ་ཐུབ།།          རྗེས་དཔག་ཚད་མས་ངོ་མ་ཤེས།།

དབུ་སེམས་མཁས་པས་མ་མཁྱེན་པའི།།        ལྐོག་གྱུར་ཆེན་པོའི་གསང་བ་ལཱ།།

ཐ་སྙད་ཚད་མས་གྲུབ་མ་མྱོང་།།                ཕྱལ་ཆད་མཐའ་ལ་ལྟུང་མ་མྱོང་།།

ཡོད་མེད་ར་བ་ལས་འགོངས་པའི།།               རྫོགས་ཆེན་རིག་པའི་ཕྲ་བ་ལཱ།།

སློབ་གཉེར་སེམས་ལ་བགྱིས་པས་ན།།    སྣང་བ་གདམ་ངག་སློབ་དཔོན་འཆར།།

བོན་སྐུའི་རང་ཞལ་རྗེན་གཅེར་བསྟན།ཀུན་བཟང་དགོངས་པའི་བྱིན་བརླབས་ལྰ།།

ཐམས་ཅད་རྩ་བྲལ་སྟོང་མོད་ཀྱང་།།          སྣང་བ་མ་འགགས་ལྷུག་ལྷུག་བརྡོལ།། 

 འཁྲུལ་སྣང་རྒྱུ་འབྲས་མི་བསླུ་བའི།།             གསལ་སྟོང་ཟུང་འཇུག་ཆོ་འཕྲུལ་ལཱ།། 

གྲངས་མེད་བསྐལ་པར་སྒུག་མི་དགོས།།             རྩོལ་སྒྲུབ་ལམ་གྱིས་མི་ཟིན་པའི།།

ཚེ་གཅིག་འཇའ་ལུས་རྫོགས་སངས་རྒྱས།།        ཡོངས་རྩེའི་གདམ་ངག་སྙན་པ་ལཱ།།

འགྲོ་འོང་བྲལ་བའི་ལམ་ཆེན་དུ།།                  བགྲོད་མེད་གོམ་པ་གློག་ལས་མྱུར།།

ཅིག་ཆར་སངས་རྒྱས་ས་ལ་བསྙེགས།།      རྐྱང་འདེད་འགྲོས་འདིའི་མགྱོགས་པ་ལཱ།།

ཐེག་སྒོ་ལོ་ལེགས་སྙེ་མའི་ཁྲོད།།             ཡོངས་རྩེ་འབྲས་དཀར་ལྗང་བུ་བདམས།།

སངས་རྒྱས་ལག་འཆང་གདམས་པའི་སྒོར།།         ཞུགས་པའི་སེམས་པ་སྐྱིད་པ་ལཱ།།          

   ཞེས་པ་འདི་ནི་བླ་མེད་རྫོགས་པ་ཆེན་པོའི་བསྟན་པ་ལ་མི་ཕྱེད་པའི་དད་པ་ཐོབ་

ཀྱང་ཉམས་ལེན་ལ་བརྩོན་འགྲུས་ཞན་པའི་གྱི་ན་བ་ཚངས་པ་བསྟན་འཛིན་འབོད་

པས་༢༠༠༧།༧།༢༢།ཉིན་གྱི་དམ་བཅའི་སྐབས་ཀྱི་མཐོང་ཐོས་འགའ་ཞིག་གིས་རྐྱེན་

སྐུལ་ནས་དམ་བཅའ་གྲོལ་མཚམས་ཀྱི་མཚན་མོའི་ཕྱག་ཚོད་བཅུ་གཉིས་ལ་བྲིས།།

 
 
དཔྱད་གཏམ་སྤེལ་བ།
སྒྲིག་འཇུག...
Powered by Oblog.