གླེང་གཞི་ཞོགས་པའི་དུང་བརྡ།
ཞང་བོད་ཁ་བའི་ལྗོངས་སུ་རྒྱལ་བ་གཤེན་རབ་མི་བོའི་ཐུགས་རྗེའི་བཀའ་དྲིན་ལས་རིན་བྲལ་
འཕྲུལ་ངག་བདེན་པའི་བོན་གྱི་འཁོར་ལོས་ཁྱབ་ཅིང་།ནམ་མཁའི་སྐར་ཚོགས་ལ་ཅོ་འདྲི་བའི་
མཁས་གྲུབ་རིག་འཛིན་རྣམ་པའི་ལྗགས་རྩོམ་པོ་ཏི་སྤུངས་ན་རི་བོ་བསྒྲིབས་ཤིང་།བསྙེལ་ན་
རྒྱ་མཚོ་བསྲུབ་ནུས་པའི་གྲངས་ཚད་མཛད་པའི་ཞང་བོད་ཀྱི་རིག་གཞུང་དག་གངས་དཀར་
ཏི་སེའི་འདབས་རོལ་ནས་ཁ་འབབ་བཞི་ཡི་བཞུར་རྒྱུན་དང་སྡོང་སྟེ་འཛམ་གླིང་འགྲོ་བའི་
གསོས་སུ་བབས་པ་དང་།ལོ་རྒྱུས་ཀྱི་མཚོ་མོ་སྒྲོལ་བའི་བརྒྱུད་རིམ་ཁྲོད་ཆགས་སྡང་གི་རླུང་
འཚབ་ཀྱིས་གཡོས་པའི་འཕེལ་འགྲིབ་ཀྱི་རླབས་ཕྲེང་དུ་མར་འཕྲད་དེ།གྲུ་ཟུར་གང་རུང་ལ་
གས་ཆག་སྣ་ཚོགས་ཤོར་རུང་། བདེན་པའི་གྲུ་མོ་ཆེའི་དབུགས་རྒྱུན་གྱི་འབྱིན་རྔུབ་མ་ཆད་
པར་མུ་མཐུད་གནས་ཐུབ་པ་བྱུང་ལ། དུས་རབས་གོང་མའི་ནང་དུའང་བསམ་སྦྱོར་ལོག་
པའི་བདུད་ཆེན་སྡེ་བཞིའི་དུག་རླངས་ཀྱིས་གནོད་སྐྱོན་ཚབས་ཆེན་བཟོས་མོད། མཁན་སློབ་
ཉི་ཟླ་ཟུང་གིས་མཚོན་པའི་སྐྱེས་ཆེན་དུ་མས་བླ་འགུག་ཚེ་འགུག་གནང་བའི་བཀའ་དྲིན་ལ་
བརྟེན་ནས་སེམས་ཀྱི་བདུད་རྩི་དེ་དག་ལ་ཚེ་སྲོག་གསར་པའི་རང་མདངས་མངོན་ཐུབ་པ་
བྱུང་བ་སྟེ།རང་དོན་དུ་ཐོས་བསམ་སྒོམ་སྒྲུབ་ཀྱི་རྩ་བ་ཚུགས་ཤིང་གཞན་དོན་དུ་འཆད་རྩོད་
རྩོམ་གསུམ་གྱི་ཡལ་འདབ་རྒྱས་ཏེ་འཛམ་གླིང་གི་སྐྱེ་བོ་ཁྲི་སྟོང་མང་པོའི་ཡིད་ཀྱི་བརྟན་པ་
དབང་མེད་དུ་བཀུག་བཞིན་ཡོད་ལ། དེ་བཞིན་དུ་ཁྱུང་ཡུལ་ས་ཡི་ཐིག་ལེའི་རྒྱན་གཅིག་
སྟེང་ཆེན་དགོན་གཡུང་དྲུང་བསྟན་རྒྱས་གླིང་གི་ཁྲི་འཛིན་རྒྱ་མཚོ་ནོར་བུ་རིན་པོ་ཆེ་སྟོན་
འཁོར་ཡོངས་ཀྱི་བླ་མེད་མཛད་བཟང་གི་མཐུ་ལས་བཤད་སྒྲུབ་བསྟན་པའི་དར་ཆེན་ལྷུབ་
ལྷུབ་ངང་ཕྱོགས་དང་རིས་སུ་མེད་པར་གཡོས་ཤིང་། འཆད་རྩོད་ཀྱི་ཕྲིན་ལས་ཡར་ངོའི་
ཟླ་བཞིན་རྒྱས་པར་བལྟོས་ནས་སྨྲས་ན། རང་སྡེའི་ཁྱོན་ཡོངས་ནས་མཁས་པའི་བྱ་བ་
གསུམ་གྱི་ཡ་གྱལ་ལས་རྩོམ་གྱི་གོམ་ཁ་ཅུང་ལྷོད་པའི་ངང་ཚུལ་ལ་དམིགས་ཏེ།
ད་ལན་༼ བོན་གཤེན་བསྭོ་སྒྲ༽ ཞེས་པའི་ལོ་དེབ་འདི་གཉེར་གནང་བ་རེད། འདི་ནི་
འཁྱགས་རུམ་གྱི་སྦུབས་སུ་ལོ་ངོ་བརྒྱ་སྟོང་དུ་མར་བག་ལ་ཞ་བའི་དྭངས་གཙང་ཆབ་རྒྱུན་
ཤང་ཤང་ངང་ཕྱི་རུ་བཞུར་སའི་བུ་ག་ཞིག་དང་། རྣམ་དཔྱོད་ཀྱི་གཤོག་དྲུག་རྒྱས་པའི་
ཁྱུང་ཕྲུག་དག་གིས་འཕུར་རྩལ་སྦྱང་སའི་བར་སྣང་ཞིག གྲུབ་མཐའི་ཆགས་སྡང་གི་
ཆུ་བོ་ལ་བརྒྱབ་པའི་ཟམ་པ་ཞིག ཡུལ་གྱི་ཕྱོགས་རིས་ཀྱི་ལ་མོ་ལ་བརྒྱབ་པའི་ཕུགས་ལམ་
ཞིག་བཅས་ཀྱི་ཕན་ནུས་སམ་སྤྱོད་སྒོ་ཆོད་པའི་ཡིད་ཆེས་དང་རེ་སྨོན་གྱིས་ཁེངས་ཡོད།
ཕྲན་ལ་དུས་དེབ་འདིའི་རྩོམ་ཡོངས་ལ་བམ་ཀློག་ཐེངས་གཅིག་བྱེད་པའི་སྐལ་བ་ཞིག་
བྱུང་བའི་སྐབས་ཀྱི་ཚོར་སྣང་ལྟར་ན། དོན་ཁྲི་ཐོག་མར་དཀའ།ཞེས་པའི་ཙི་ནའི་
གཏམ་དཔེི་བཞིན་རེ་བ་མཐོ་ཙམ་ངང་ནས་བལྟས་ན། ད་དུང་མི་འདངས་བའི་ཆ་
ཅུང་ཙམ་མཆིས་མོད། ཐེངས་དང་པོར་ཀློག་པ་པོའི་སྤྱན་སྔར་བཤམས་པའི་ལོ་དེབ་
གཅིག་གི་ངོས་ནས་བཤད་ན་རྗོད་བྱེད་ཀྱི་ཚིག་དང་། བརྗོད་བྱའི་དོན། སྒྲིག་པའི་
ཉམས། དབྱེ་བའི་ཚུལ་སོགས་གང་ལ་གཞིགས་ཀྱང་། དགའ་བསུ་ཞུ་འོས་པའི་ལོ་དེབ་
ལེགས་པོ་ཞིག་ཏུ་བརྩིས་ཆོག་པར་སྙམ་ལ། རྩོམ་སྒྲིག་པ་རྣམ་པས་ཆེས་མངོན་གསལ་
ཅན་གྱི་དག་ནོར་ཁག་ལ་ཞུས་དག་གནང་བ་ཙམ་ལསགོ་བ་ལེན་སྟངས་དང་། ཚིག་
ཉམས་འདོན་སྟངས་སོགས་ཀྱི་ཐད་ནས་ཁེར་ལམ་ཅན་འགའ་འདུག་མོད་དེ་དག་སོ་
སོར་བརྩི་འཇོག་གིས་སོར་བཞག་ལས་བཅོས་ཐལ་ཆེ་བ་གནང་མེད་པ་དེ་ནི། བློ་རྒྱ་
ཡངས་པའི་དན་རྟགས་ཞིག་ཡིན་ངེས་ལ་མ་གཞི་ནས་ལོ་དེབ་འདིར་རྩོམ་འཁོད་དོ་
ཅོག་གི་ལྟ་བ་སོགས་ནི་ལོ་དེབ་འདིའམ་དགོན་འདིའི་བཞེད་ཚུལ་ཡིན་པའི་ཁྱབ་པ་
མེད་པའི་རྩ་དོན་ཞིག་ཡོད་པའི་རྐྱེན་གྱིས་ཡིན་པར་ངེས་ལ། སྒེར་གཅོད་ཀྱི་འཕྲང་ལ་
འཁྲེངས་ཞིང་ཨུ་ཚུགས་མཁྲེགས་བཟུང་གི་བསམ་བློ་ཁོ་ན་ཨ་འཐས་སུ་བཟུང་ནས་
གུ་དོག་པོའི་སེམས་ཁམས་ཀྱི་སྒྲིག་གཞིས་སྡོམ་ན་དུས་རབས་གསར་པའི་གོམ་རྗེས་
མི་ཟིན་ཞིང་། ལྷ་མོའི་བརླ་དང་མྱོས་བུམ་གྱི་བར་ན་སྙན་ངག་པའི་སྣམ་སྨྱུག་རྫོགས་
པ་དང་། ཡར་བསྡུས་མར་སྤྲོས་ཀྱི་ཕྱག་ལེན་ཁྲོད་དུ་མཁས་པའི་དུས་ཚོད་བརླག་
པའི་རྣམ་ཐར་ལ་ངེས་ཤེས་གསལ་པོར་སྐྱེས་ཤིང་གསར་རྩོམ་གྱི་གར་སྟེགས་ཏེ་ལོ་
དེབ་འདི་དང་འདི་ལྟ་བུ་མང་ཙམ་བསྐྱངས་དགོས་པར་འདུག་སྙམ་པའི་བློ་སྐྱེད་
ཐོབ་པ་སོགས་དགེ་མཚན་མི་ཉུང་བ་ཞིག་མངོན་པར་གསལ་འདུག་པར་བརྟེན།
ཆེས་ཐོག་མའི་ལོ་དེབ་འདི་དང་འབྲེལ་ཡོད་སྐལ་ལྡན་ཡོངས་ལ་བཀྲ་ཤིས་བདེ་
ལེགས་ཞུ་བ་ཡིན་ནོ། །
ལྷ་ས་དག་པའི་ཞིང་ནས་ཁྱུང་པོ་དཔལ་རྒྱལ་འབོད་པ་དེས་དུས་བཟང་ཞིག་ལ་
ཕུལ་བའོ།
