སྤྲོ་དགའི་མཆོད་དབྱངས།
༼བྱང་བྱ་དུར་དགའ་མལ་དགོན་གྱི་མཁན་རིན་པོ་ཆེ་ཤེས་རབ་མཐར་ཕྱིན་རིན་པོ་ཆེའི་གྱ་སྟོན་སྟོན་ལ་ཕུལ་བའི་དགུང་སྟོན་ཤིས་ཚིག༽
གཙོ་ཚུལ་ཁྲིམས། ཁྱུང་པོ་སྟེང་ཆེན་དགོན།
སྟོང་ཉིད་སྙིང་རྗེའི་འཛུམ་ཞལ་ལྷུག་གིས་གྲོལ།
ཐབས་ཤེས་ཕྱག་ཟུང་བྱམས་བརྩེའི་སྙོལ་སྐྱོང་མཁས།
ཟབ་གསང་གདམས་དོན་ནུ་ཞོ་སྦྱིན་མཛད་པའི།
མ་ཡུམ་དྲིན་ཆེན་བླ་མར་གུས་པས་འདུད།
བསྡུ་བཞིའི་མིག་བརྡས་སྐལ་ལྡན་མགྲོན་དུ་བསུས།
ལུང་རིག་ཟབ་མོའི་དྲན་རྟེན་མགྲིན་པར་བརྒྱན།
སྟོང་ཆེན་གཤིས་ཀྱི་ཡུམ་ལ་འཁྲིལ་བ་ཡི།
ཡབ་གཅིག་དྲིན་ཆེན་བླ་མར་གུས་པས་འདུད།
ལེགས་ཉེས་འབྱེད་པའི་ཞལ་ཏ་ལྷག་ཏུ་ཟབ།
ཉོན་མོངས་དགྲ་ལ་རིག་མཚོན་དབལ་རྣོ་བའི།
ཐར་བདེའི་རྒྱལ་སར་འཁྱམས་པའི་རོགས་དམ་པ།
གྲོགས་མཆོག་དྲིན་ཆེན་བླ་མར་གུས་པས་འདུད།
བཅོས་མིན་ངེས་འབྱུང་སེམས་ཀྱིས་དྲངས་པ་ཡི།
སྤོང་ལམ་སོ་ཐར་བསླབ་པས་རྒྱུད་བསྡམས་པས།
གཞན་འཚེའི་སྤྱོད་པ་མ་ལུས་དྲུང་ནས་ཕྱུངས།
ཕྱི་རྒྱུད་འདུལ་བའི་བླ་མར་གུས་པས་འདུད།
སྨིན་བྱེད་དབང་དམ་མིག་སྙིང་སྲོག་བས་གཅེས།
སྟོང་ཉིད་སྙིང་རྗེའི་ཡེ་ཤེས་ཁོང་ནས་ཤར།
བསྐྱེད་རྫོགས་རིམ་པས་སྣང་ཞེན་ལྷར་བསྒྱུར་བའི།
ནང་རྒྱུད་སྔགས་ཀྱི་བླ་མར་གུས་པས་འདུད།
སྔོན་འགྲོའི་རིམ་པས་རང་རྒྱུད་རབ་སྦྱངས་ཏེ།
དངོས་གཞི་ཀ་དག་དགོངས་པའི་མཁའ་དབྱིངས་སུ།
རང་གསལ་ལྷུན་གྲུབ་ཡེ་ཤེས་གོམས་བྱས་པའི།
གསང་རྒྱུད་རྫོགས་ཆེན་བླ་མར་གུས་པས་འདུད།
བསྟན་དོན་གཅེས་པའི་ཐབས་ཤེས་འདབ་བརྒྱ་བཞད།
བསྟན་སྲོག་མཐིལ་ཆེན་བསླབ་གསུམ་ཟེའུ་འབྲུ་སྨིན།
བསྟན་སྦྱིན་ལྷ་མི་འདུས་པའི་ཚལ་ན་མཛེས།
བསྟན་འཛིན་ཨུད་དཔལ་གང་ལ་གུས་པས་འདུད།
ཤེས་བྱའི་གནས་ལུགས་རྣམ་དཔྱོད་སྤྱན་གྱིས་གཟིགས།
རབ་མང་འགྲོ་ལ་རྗེས་ཆགས་འཛུམ་གཡོ་ཞིང་།
མཐར་ཕྱིན་ལུང་རིགས་སྦྱིན་བརྒྱ་འགྱེད་པ་ཡི།
ངེས་དོན་གྲུབ་རྗེ་མཆོག་ལའང་གུས་པས་འདུད།
སྐུ་མཚན་རང་བཞིན་གཡུང་དྲུང་གཤིས་སུ་ཤར།
གསུང་སྙན་མ་འགག་བོན་འཁོར་བསྐོར་ལ་བྱང་།
ཐུགས་གཤིས་སྐྱོན་ཚོགས་པད་མོའི་གཞི་ལ་ནུབ།
ཡོན་ཏན་རིན་ཆེན་འབད་མེད་ཁྱེད་ལ་ལྷོས།
དཔལ་ལྡན་བླ་མའི་རྟོགས་པ་བརྗོད་པ་ཡི།
ངག་རིག་རྩ་འདབ་ཡོངས་སུ་གྲོལ་མིན་ཀྱང་།
ཡབ་གཅིག་གཤེན་གྱི་རྗེས་འཛིན་སུ་གང་ལ།
བསྟོད་དབྱངས་ངག་ཕྱག་འབུལ་ལ་རབ་སྤྲོ་བས།
མཆོག་ཉིད་བསྟན་དང་འགྲོ་བའི་མཛའ་བཤེས་སུ།
ཕེབས་ནས་ལོ་འཁོར་བཅུ་ཕྲག་བརྒྱད་ལོན་པར།
མི་ཕྱེད་སྤྲོ་དགའི་མཆོད་དབྱངས་ཕུལ་དང་ལྷན།
སླར་ཡང་བསྐལ་བརྒྱའི་མགོན་དུ་བརྟན་བཞུགས་གསོལ། ༢༠༡༡།༡༢།༣༠
