མིག་ཆུས་ས་ཆེན་བརླན་ལ་གཟིགས།
སྤྱད་པས་སྒྲིབ་སེལ་གཡུང་དྲུང་བོན། །
འཛིན་སྐྱོང་སྤེལ་ཏེ་གཅེས་མཛད་པའི། །
འགྲན་བྲལ་དཔོན་གསས་གང་ཉིད་ལ། །
སྙིང་ནས་འདུད་དོ་བྱིན་རླབས་སྩོལ། །
འཛིན་པ་བསམ་མནོས་མ་བསླད་པའི། །
ལྟ་བ་བླ་མེད་ངང་སྐྱོང་བའི། །
རང་རིག་གཤིས་ཀྱི་བླ་མ་ལ། །
སྙིང་ནས་འདུད་དོ་བྱིན་རླབས་སྩོལ། །
གཞན་དོན་རང་བས་གཅེས་མཛད་པའི། །
རྒྱལ་སྲས་སེམས་དཔའི་སྤྱོད་པ་དངོས། །
ཁུར་བཞེས་གཤེན་རབ་བླ་མ་ལ། །
སྙིང་ནས་འདུད་དོ་བྱིན་རླབས་སྩོལ། །
དོན་གྱི་ཞི་བདེ་སློབ་འདོད་པའི། །
རྨང་གཞི་སྙིང་རྗེ་ཆེན་པོ་དང་། །
དབྱེར་མེད་དཔལ་ལྡན་བླ་མ་ལ། །
སྙིང་ནས་འདུད་དོ་བྱིན་རླབས་སྩོལ། །
མཐའ་གཉིས་བྲལ་བའི་མྱང་འདས་ཆེར། །
གཤེགས་ཐབས་ཕ་རོལ་ཕྱིན་པ་བཅུ། །
ཉམས་སུ་བཞེས་པའི་བླ་མ་ལ། །
སྙིང་ནས་འདུད་དོ་བྱིན་རླབས་སྩོལ། །
དབང་མེད་ལས་ཀྱིས་འཕུལ་བ་ཡི། །
རྟེན་མེད་རྣམ་ཤེས་འཁྱམ་པོ་གང་། །
བདེ་བའི་གནས་འཕེན་བླ་མ་མཆོག །
སྙིང་ནས་འདུད་དོ་བྱིན་རླབས་སྩོལ། །
བྱམས་སྙིང་གཞི་ལས་མ་གཡོས་ངང་། །
འཁྲོས་ཚུལ་བཞེངས་པས་བསྟན་དགྲ་ཀུན། །
འདུལ་མཛད་སྟག་སླག་ལྷ་སྲས་ལ། །
སྙིང་ནས་འདུད་དོ་བྱིན་རླབས་སྩོལ། །
ཟླ་བྲལ་བྱམས་བརྩེའི་རང་གཟུགས་ཆེ། །
གཞན་ཕན་རིན་ཆེན་གཏེར་དབང་བའི། །
ཕུན་ཚོགས་སུམ་ལྡན་གང་ཉིད་ལ། །
སྙིང་ནས་འདུད་དོ་བྱིན་རླབས་སྩོལ། །
ལྟོས་བཅས་འགྲོ་བའི་བསོད་ནམས་ཀྱིས། །
མ་ཁྱོག་གང་སྐུ་དབྱིངས་གཟིམས་པར། །
ཤུལ་ལུས་ཉམ་ཐག་ཁྱུ་ཚོགས་ཀྱི། །
མིག་ཆུས་ས་ཆེན་བརླན་ལ་གཟིགས། །
གསར་བརྗེའི་བདུད་གྲི་རྣོན་པོ་ཡིས། །
མ་ཆོད་གང་སྐུ་པད་མོའི་འདབ།། །
གློ་བུར་བསོད་མིན་ལྷགས་རླུང་གིས། །
ཞི་དབྱིངས་སྤུར་འདི་ཅི་ཡིས་ལན། །
གྱུས་འཐིང་རྒས་འཁོགས་ད་ཕྲུག་ཁྱུས། །
རྣམ་ཤེས་བཅོལ་སའི་ཡབ་གཤེགས་ཞེས། །
སྡུག་གི་ངུ་ངག་འཐེན་ཐེངས་རེས། །
ཁྱེད་ཐུགས་གཞི་རིག་མ་དཀྲོགས་སམ། །
བརྟན་གཡོ་སྣོད་བཅུད་གང་དག་ལ། །
ཞི་བདེ་འབྱུང་བའི་ཐབས་སྣ་ཚོགས། །
མ་འགག་སངས་རྒྱས་གཡུང་དྲུང་བོན། །
སྤེལ་ཕྱིར་སླར་ཡང་འབྱོན་པར་ཞུ། །
སྤྱིར་ན་སེམས་ཅན་དོན་མ་གཏོགས། །
སངས་རྒྱས་ལ་ནི་ལས་གཞན་མེད། །
གསུངས་ལྟར་ཡིན་ཀྱང་ཞིང་འདི་རུ། །
ཐུགས་བརྩེ་མ་ཆུང་སླར་ཕེབས་ཀྱེ། །
བདག་སོགས་དད་པའི་ཨ་ལོང་སྣེར། །
ཁྱེད་ཐུགས་ལྕགས་ཀྱུ་རབ་བསྐོན་ནས། །
གཏན་གྱི་ཞི་བདེའི་གླིང་འཁྲིད་ཕྱིར། །
སླར་ཡང་ལན་གཅིག་མཇལ་སྐལ་གནང་། །
སྔོན་བསགས་ལས་སྨོན་བཟང་པོས་མཐུས། །
མཚན་ལྡན་བཤེས་གཉེན་གང་དག་ལ། །
དག་སྣང་དགའ་དད་མཐུག་པ་ཡི། །
དཔལ་གྱི་དགེ་རྒྱས་མིང་གིས་ཕུལ། །
༢༠༡༢། ༥། ༢༤།
