རྩོམ་ལ་བསྐུལ་བའི་གསལ་བརྡ། 

འོ་ལཌ་སོ།    ཁ་བ་རི་པའི་སྣ་འཛོམ་ཤེས་རིག་གི་སྐྱེད་ཚལ་ཁྲོད་དུ། གཡུ་འབྲུག་སྔོན་མོའི་སྒྲ་དབྱངས་ལས་ཀྱང་གྲགས་ཆེ་ལ།  ཁུ་བྱུག་སྔོན་མོའི་འགྱུར་ཁུག་ལས་ཀྱང་ཆེས་སྙན་པའི་གདངས་དབྱངས་ཤིག་སྒྲོག་བཞིན་ཡོད་པ་ནི།  ཐོག་མར་ས་ཆེན་པོའི་མཐོ་སྒང་རང་ས་རུ་བྱུང་བའི། སྲིད་པ་གཡུང་དྲུང་བོན་གྱི་ལོ་རྒྱུས་ཀྱི་རླབས་སྒྲ་དང་། བཅོས་མའི་རྫས་སྦྱོར་གྱིས་རང་བྱུང་གི་རོ་བཅུད་མ་སྒྲིབ་ཅིང་དྭངས་གཙང་མཐོ་སྒང་གི་འཚོ་བའི་སྙིང་བཅུད་ལྡན་པའི་རྩོམ་རིག་སྒྱུ་རྩལ་ཏེ། འདི་ནི་སེམས་ཁམས་མན་ཤེལ་ལས་དྭངས་ཤིང་། རང་གཤིས་སྨྱུག་མ་ལས་དྲང་བའི་ཡབ་མེས་བོན་གཤེན་སྟོང་གི་ཤེས་རིག་ལས་འཁྲུངས་པའི། ཡིད་བཞིན་གྱི་ནོར་བུ་དཀར་ལ་འཚེར་བ་ཞིག་ལོས་ཡིན། དེར་བརྟེན། ངེད་ཁྱུང་པོ་སྟེང་ཆེན་དགོན་གྱི་བཤད་སྒྲུབ་འདུས་སྡེ་ནས་ཀྱང་། ཡེ་སྲིད་ནོར་བུ་ཟླུམ་པོའི་ནོར་ངོ་འཕྲོད་པ་དང་། གཡུང་དྲུང་བདེན་པའི་དབལ་ཁ་གྱེན་དུ་གསོལ་བའི་ཕྱིར་བོན་གཤེན་སྟོང་གི་བསྭོ་སྒྲའི་གདངས་དབྱངས་ཏེ། སློབ་གསོའི་བརྩེ་གདམས། ལོ་རྒྱུས་རླབས་སྒྲ། དཔྱད་བརྗོད་སྡེབ་དཀྲོལ། སྙན་དབྱངས་འགྱུར་ཁུག  གསར་བྱུང་གནས་འཕྲིན། བཅས་ཚན་ཆེན་པོ་ལྔ་ལས་གྲུབ་པའི་༼ བོན་གཤེན་བསྭོ་སྒྲ ༽ཞེས་པའི་ལོ་དེབ་ཀྱི་གར་སྟེགས་ཤིག་བསྐྲུན་ཡོད་པ་ནི། གྱེར་ཚང་གི་སྨྱུག་མཆེད་རྣམས་ཀྱིས་དགོངས་གསལ་ལྟར་ལཌ་ན། དེ་བཞིན་བོན་གཤེན་བསྭོ་སྒྲའི་ལང་ཚོའི་འཚར་ལོངས་ཀྱི་ལོ་ཐེངས་གཉིས་པ་འམ། སྤྱི་ལོ་༢༠༡༢ལོའི་རྩོམ་བསྡུའི་དུས་མཚམས་ནི་སྤྱི་ཟླ་༡༡་ནང་འཇོག་རྒྱུ་ཡིན་པས།  གངས་ཅན་མི་རིགས་ལ་ཤ་ཞེན་ཆེ་ཞིང་། གངས་ཅན་མི་རིགས་ཀྱི་སྐད་ཡིག་འཛིན་པའི་དཔྱོད་ལྡན་ཡོངས་ནས། དེ་ལུགས་ཀྱིས། སྤྱི་ཚོགས་དང་འཚམས་ཤིང་།  ཁྲིམས་ལུགས་དང་མཐུན་པའི་སྒོ་ནས།  གོང་གསལ་གྱི་སྡེ་ཚན་དང་བསྟུན་པའི་རྩོམ་ཡིག་རྣམས་དག་ཆ་ཐོན་པར་བྱེད་དེ་དུས་ཐོག་ཏུ་ལྷུག་སྩོལ་གནང་བའི་འབོད་བསྐུལ་ཞུ། ། ། །

ས་གནས།  བོད་ལྗོངས་ཆབ་མདོ་སྟེང་ཆེན་རྫོང་སྟེང་ཆེན་དགོན།

ཡིག་ཟམ་ཨང་གྲངས།  ༨༥༥༧༠༠

སྒེའུ་ཁུང་། ༡༢༨༢༠༢༨༠༩༤

དྲ་ཐོག་ཡིག་སྒམ། bxszh2011@163.com

ཁ་པར་ཨང་ཀི ༡༨༩༠༨༩༥༨༣༥༠

ཁྱུང་པོ་སྟེང་ཆེན་དགོན་བོན་གཤེན་རྩོམ་སྒྲིག་ཁང་ནས་སྤེལ།