ཀུན་སྐྱོབས་བྱམས་མའི་སྔགས་བསྟོད་ཀྱི་ཚིག་དོན་མདོ་ཙམ་བསྟན་པའི་སྡུད་འགྲེལ་ཐར་ལམ་ཐེམ་སྐས་ཞེས་བྱ་བའོ།

མཛད་པ་པོ་ཀུན་མཁྱེན་ཉི་མ་བསྟན་འཛིན།

ཟབ་ཟབ་བོན་སྐུའི་མཁའ་ལས་མ་གཡོས་ཀྱང༌།།

གསལ་གསལ་མཚན་དཔེའི་དཀྱིལ་འཁོར་མངོན་བསྟན་པས།།

མང་མང་སྐྱེ་རྒུའི་སྐྱབས་གཅིག་ལྷ་ཡི་ལྷ།།

ཡང་ཡང་རབ་བསྟོད་ཀུན་ལ་ཤིས་པར་སྩོལ།།

རབ་འབྱམས་རྒྱལ་བའི་དཀྱིལ་འཁོར་མཐའ་ཀླས་ཀུན།།

རབ་བསྐྱེད་འབྱུང་གནས་ཐིམ་གསུམ་བྱེད་པའི་ཀློང༌།།

རབ་རྒྱལ་བླ་མེད་བྱམས་མའི་ལྷ་ཚོགས་ལ།།

རབ་ཏུ་རྟག་ཏུ་ལན་བརྒྱར་ཕྱག་བགྱིའོ།།

བོན་གྱི་ཉིང་ཁུ་བྱམས་མའི་སྔགས་བསྟོད་ཀྱི། །དོན་གྱི་སྡུད་འགྲེལ་ཐར་ལམ་ཐེམ་སྐས་ཞེས། །བློ་དམན་འགྲོ་ལ་ཕན་ཕྱིར་བཤད་པར་བྱ། །ཚིག་དོན་ཕྱོགས་ཙམ་རྟོགས་ཕྱིར་དང་དུ་ལོང༌།། ཞེས་སྟོན་པའི་ཞལ་ནས་གསུངས་པའི་བཀའ། བྱམས་མ་རྩ་བའི་མདོ་ལས་བྱུང་བའི་སྔགས་ཀྱི་རྒྱལ་པོ་ཉེར་གཅིག་པའི་སྒོ་ནས་བསྟོད་པ་འདི་ཡང༌། ཕུན་སུམ་ཚོགས་པ་ལྔའམ་བདུན་གྱི་གླེང་གཞི་ཅན་ཏེ། སྟོན་པ་ཕུན་སུམ་ཚོགས་པ་ནི་རྣམ་མཁྱེན་ཡང་དག་པར་རྫོགས་པའི་སངས་རྒྱས་སྟོན་མཆོག་གཤེན་རབ་མི་བོ་ཀུན་ལས་རྣམ་པར་རྒྱལ་བ་ཉིད་དོ། དེའི་མཚན་གྱི་དོན་ཀྱང། རྣམ་མཁྱེན་ནི་འཁོར་འདས་དང་དུས་གསུམ་སོགས། ཤེས་བྱ་དང་དོན་གྱི་རྣམ་པ་ཐམས་ཅད་མ་སྒྲིབ་པ་མཁྱེན་པའོ། ཡང་དག་པར་རྫོགས་པའི་སངས་རྒྱས་ནི། འོག་ཏུ་བཤད་འགྱུར་ལྟར་དང༌། སྣང་སྲིད་ཡེ་སྲིད་ས་ལེར་སྟོན་པས་སྟོན། ལྷ་ཡི་ལྷ་མཆོག་བླ་ན་མེད་པའི་མཆོག བོན་ཉིད་དབྱིངས་ནས་སེམས་ཉིད་བདལ་བས་གཤེན། རྒྱལ་དང་རྒྱལ་སྲས་རྣམས་ཀྱི་ནང་ནས་རབ་ཏུ་གྱུར་པས་རབ། སྐུ་མདོག་ཕྱག་མཚན་མི་རུ་བསྟན་པས་མི། བོན་སྒོ་བརྒྱད་ཁྲི་བཞི་སྟོང་བཀའ་ཡི་ཆར་ལྟར་བོ་བས་བོ། ཐམས་ཅད་ཀུན་གྱི་མགོན་དུ་གྱུར་བས་ཀུན། ལ་ནི་ལྟ་བ་བླ་མེད་ལ་ཆེན་བཟླ་བས་ལ། རྣམ་པར་མི་རྟོག་དབྱིངས་ལ་གནས་པས་རྣམ། དེ་ཡི་ངང་ལ་གཡོ་མེད་བཞུགས་པར་མཛད་པས་པར། མུ་སྟེགས་བདུད་ནི་བགེགས་ཀྱི་གཡུལ་ལས་རྒྱལ་བས་རྒྱལ། ཡོན་ཏན་དེ་རྣམས་ཀྱི་བདག་ཏུ་འགྱུར་བ་མེད་པས། ཞེས་པའོ།

གནས་ཕུན་སུམ་ཚོགས་པ་ནི། སངས་རྒྱས་བཞུགས་པའི་གནས་སུ་འགྱུར་བས་གཡུང་དྲུང་གསལ་བ་འོད་ཀྱི་གླིང་དང༌། སངས་རྒྱས་ཐམས་ཅད་ཀྱི་རྟག་ཏུ་གཟིགས་ནས་བྱོན་པའི་ཞིང་ཁམས་སུ་འགྱུར་མེད་བརྟན་པས། རྟག་གཟིགས་འོལ་མོ་གླིང་ཆེན་དུ་གྲགས་པའི་གནས་མཆོག་དེའོ།  འཁོར་ཕུན་སུམ་ཚོགས་པ་ནི། མཆོག་ཏུ་གྱུར་བ་ཞུ་འཁོར་ཡེ་གཤེན་འཕགས་པ་སེང་བཞི་ཞེས་པ། རྩལ་སྟོབས་སེང་གེ་ཤུགས་ཅན། དཔལ་ལྡན་སེང་གེ་ང་རོ་དང༌། སྨྲ་བའི་སེང་གེ་སྒྲ་སྒྲོགས་དང༌། མདོ་དོན་སེང་གེ་ཟབ་མོ་བཞི་དང༌། ཁམས་བརྒྱད་ཞུ་བའི་གཤེན་བརྒྱད། ཡེ་གཤེན་ཆེན་པོ་སུམ་བརྒྱ་དྲུག་ཅུ། སེམས་དཔའ་ལྔ་སྟོང་ལྔ་བརྒྱ། གཞན་ཡང་ལྷ་བརྒྱད་དང༌། ཀླུ་བརྒྱད་དང༌། གཟའ་བརྒྱད་དང༌། རྒྱུ་སྐར་ཕྱོགས་སྐྱོང་ལ་སོགས་ལྷ་ཀླུ་མི་གསུམ་ལྷ་མིན་དྲི་ཟ་ལ་སོགས་གྲངས་ལས་འདས་པའོ། དུས་ཕུན་སུམ་ཚོགས་པ་ནི། བསྐལ་བཟང་ཚེ་ལོ་བརྒྱ་པའི་དབུ་སངས་རྒྱས་ཞལ་མངོན་དུ་བཞུགས་པའི་དུས་ཚེས་ཁྱད་པར་ཅན་ལའོ། བཀའ་ཕུན་སུམ་ཚོགས་པ་ནི། ཡིད་བཞིན་ནོར་བུ་ལྟ་བུ་བླ་ན་མེད་པ་བྱམས་མའི་བོན་སྡེ་རྣམས་སོ། ཡོ་བྱད་ཕུན་སུམ་ཚོགས་པ་ནི། ཡིད་བཞིན་གྱི་ནོར་བུ་ལ་སོགས་བླ་ན་མེད་པ་མཆོད་པ་ཡོངས་སུ་གཏོང་བའི་སྤྲིན་ཞེས། གནམ་ས་བརསྣང་གང་བར་ཕུལ་བའོ། བསྡུས་པ་ཕུན་སུམ་ཚོགས་པ་ནི། མ་འོངས་ཚེ་ལོ་བཅུ་པའི་སངས་རྒྱས་ཡིན་ཀྱང༌། ད་ལྟ་སྟོན་པ་འདི་ཡི་འཁོར་དུ་སྤྲུལ་ནས་བཞུགས་སོ།

གཤེན་རབ་ཐང་མ་འོད་རྒྱལ་དང་བྱམས་མའི་བོན་བསྒྲགས་པ་སྐོར་གསུམ་ནི། ལྷ་ཀླུ་མི་ཡི་གཤེན་གསུམ་དང༌། མ་རྒྱུད་ཕྱི་ནང་གསང་གསུམ་གཙོ་ཆེ་བ་རྒྱལ་གཤེན་མི་ལུས་བསམ་ལེགས་ཀྱིས་བསྡུས་པ་དང་འགྲེལ་བ་བཏབ་པར་མངོན་ནོ། དེས་ན་མདོ་ལས། སྟོན་པ་གནས་འཁོར་དུས་དང་བཀའ། ཕུན་སུམ་ཚོགས་པ་ལྔས་ཤོད་ཅིག་ཅེས་དང༌། སྤ་དྲོའི་གཏེར་ལས། སྟོན་པ་གནས་འཁོར་དུས་དང་བཀའ། ཡོ་བྱད་བསྡུས་པ་ཕུན་སུམ་ཚོགས། ཞེས་གསུང་པ་ལྟར་དབུ་འཆད་དུ་བཀོད་པའོ། དེ་ནས་ཚིག་དོན་དངོས་ལ་ཐོག་མར།

  ༑༑ མ་མཆོག་དུས་གསུམ་རྒྱལ་བའི་ཡུམ་ཆེན་མོ། བདེ་བར་གཤེགས་པ་བླ་ན་མེད་པ་ཡང་དག་མངོན་པར་རྫོགས་པའི་སངས་རྒྱས་བྱམས་མ་ཆེན་མོ་ཡུམ་ལ་ཕྱག་འཚལ་ལོ།  ཞེས་པ་ནི། རྒྱལ་བ་ཀུན་གྱི་ཐུགས་ཉིད་ཡེ་ཤེས་ཀྱི་ངོ་བོ་འབྱུང་གནས་ཐིམ་གསུམ་བྱེད་པའི་སྟོང་ཆ། བོན་ཉིད་ཀྱི་ངོ་བོ་དེ་དག་འགྲོ་བ་སེམས་ཅན་ཀུན་ལ་བུ་གཅིག་གི་མ་ལྟར་བརྩེ་བས་གཟིགས་ཕྱིར་ལྷ་མོའི་ཚུལ་དུ་བསྟན་པར་མཛད་པའི་མཆོག འདས་དང་མ་འོངས་ད་ལྟ་དུས་གསུམ་གྱི་སངས་རྒྱས་སྒྲིབ་གཉིས་བག་ཆགས་དང་བཅས་པའི་གཡུལ་ལས་རྣམ་པར་རྒྱལ་བའི་མཚན་རྟགས་འཆང་བའི། སྐུ་གསུམ་སངས་རྒྱས་ཐམས་ཅད་ཀྱི་བསྐྱེད་པའི་ཡུམ་ཆེན་མོ་ཞེས་པའོ། སྤྱིར་ཡེ་ཤེས་ཀྱི་ལྷ་ལ་ཕོ་མོ་སྐྱེ་གནས་ཀྱི་མཐོ་དམན་གྱི་དབྱེ་བ་མེད་རུང༌། ངོ་བོ་གསལ་སྟོང་གཉིས་ཀྱི་ཁྱད་པར་ཚུལ་ཙམ་དུ་བསྟན་པའོ། སྐུ་གསུམ་ཀྱང་ཐོས་ཆུང་འགའ་ཞིག་གིས་སོསོར་སྐུ་མདོག་ཕྱག་མཚན་རེ་ཡོད་པར་འདོད་ཀྱང༌། དོན་དུ་དབྱིངས་ལས་ཡེ་ཤེས་ཀྱི་རོལ་གར་བསྟན་པའི་ཡེ་ཤེས་ཀྱི་ངོ་བོ་དེ་ཉིད་ལ་སྐྱེ་མེད་བོན་སྐུ་བྱ་ཞིང༌། ཡེ་ཤེས་དེ་ཡི་རང་མདངས་སམ་འོད་ལས་ས་བཅུའི་སེམས་དཔའ་དང༌། སངས་རྒྱས་ཕན་ཚུན་གྱི་གཟིགས་སྣང་འཆར་བའི་མཚན་དཔེའི་བརྒྱན་པའི་སྐུ་ལ་ལོངས་སྤྱོད་རྫོགས་པའི་སྐུ་དང༌། དེའི་སྤྲུལ་པའི་འོད་ཟེར་གདུལ་ཞིང་སེམས་ཅན་གྱི་བློ་ངོར་གང་འདུལ་དུ་བསྟན་པའི་སྤྲུལ་པའི་སྐུའོ། བོན་ཉིད་དབྱིངས་སུ་བདེ་བ་ཆེན་པོ་རུ་གཤེགས་པ་ལགས་ཀྱང༌། ཀུན་གྱི་སྐྱབས་མཆོག་བླ་ན་གཞན་ནས་སྲིད་དུ་མེད་པས། སྒྲིབ་གཉིས་མ་དག་པའི་དྲི་མ་ཡོང་ནས་ཡོངས་སུ་དག་པ་ཡོན་ཏན་ཐམས་ཅད་ཡོངས་སུ་རྫོགས་པའི་སྐུ་ལ་སྐྱོན་རྣམས་སངས་ཤིང་སྤངས་རྟོགས་ཀྱི་ཡོན་ཏན་ཐམས་ཅད་རྒྱས་པ། འཁོར་འདས་ཀུན་ལ་བུ་ལྟར་བྱམས་ཤིང་མ་ལྟར་བརྩེ་བ་ཆེན་མོས་ནམ་ཡང་མི་འདོར་བའི་ལྷ་མོ་རྒྱལ་བའི་ཡུམ་ཆེན་དེ་ལ་རྟག་ཏུ་གུས་པས་ཕྱག་འཚལ་ལོ། ཞེས་པའོ།།

དེའི་སྔགས་སམ་སྙིང་པོ་ནི། ཨཱོཾ་མ་བ་མ་དེ་མ་ཧི་མོ་ཧ་ཨེ་མ་ཧོ་མ་ཡེ་རུ་པ་ཡེ་ཏ་འདུ་འདུ་སཱ་ཧཱ། ཞེས་པ་དེའི་དོན་ཡང༌། ཨཱོཾ་ནི་ཀུན་གསལ་བྱམས་མ་ཆེན་མོ། །ཐབས་ཆེན་སྨོན་ལམ་ཐུགས་རྗེ་ཉི་མ། །སྟོབས་ཀྱི་བྱམས་མ་སྐུ་ལྔ་མཆོག་གི །རྒྱས་པ་འབུམ་བདག་ཡུམ་ལ་ཕྱག་འཚལ།། ཞེས་བྱ་སྟེ།

ཨཱོཾ་ནི་སྐུ་ལྔ་ཚངས་པའི་སྙིང་པོ་སྟེ། ཐམས་ཅད་ཀུན་གསལ་བོན་སྐུ་ཤེས་རབ་བྱམས་མ་ཆེན་མོ་དང༌། རྫོགས་སྐུ་ཐབས་ཆེན་བྱམས་མ། སྤྲུལ་སྐུ་སྨོན་ལམ་བྱམས་མ། མངོན་བྱང་ཐུགས་རྗེའི་ཉི་མ་ལྟར་མཁའ་འགྲོ་ཡོངས་ཀྱི་གཙོ་མོར་གྱུར་པ་སྟེ། ཡུམ་ཆེན་ཀྱེ་མ་འོད་མཚོ་རུ་གྲགས་པའོ། བདེ་ཆེན་གྱི་སྐུ་སྣང་སྲིད་སྟོབས་ཆེན་གྱི་བྱམས་མ་སྟེ། སྐུ་ལྔ་མཆོག་གི་ངོ་བོ་དང་རང་བཞིན་རྒྱས་པར་བསྟན་པ། ཁམས་བརྒྱད་བླ་ན་མེད་པའི་འབུམ་དང༌། གཡུང་དྲུང་ས་བཅུའི་ལམ་འབུམ། རྣམ་དག་ཚུལ་ཁྲིམས་འདུལ་འབུམ། ཡེ་གཤེན་བཀོད་པ་དོན་འབུམ། དགེ་རྒྱས་ཚོགས་ཆེན་རྫོགས་འབུམ་སྟེ། འབུམ་སྡེ་ལྔ་ཡི་མངའ་བདག་དུ་གྱུར་བའི་ཡུམ་ཆེན་དེ་ལ་ཕྱག་འཚལ་ལོ། ཞེས་པའོ།།

མ་ནི་སྐྱེ་མེད་གདོད་དག་བོན་སྐུ། །དྲན་པས་དགྲ་ཡི་འཇིགས་སྐྱོན་བཟློག་མ། །ཀུན་ཁྱབ་སངས་རྒྱས་སྐྱེད་བྱེད་བདག་ཉིད། །འབུམ་གཟུངས་མདོ་གསུམ་ཡུམ་ལ་ཕྱག་འཚལ།། ཞེས་བྱ་སྟེ།

མ་ནི་འབུམ་ལྟར་ན། སྐྱེ་མེད་གདོད་དག་སྲིད་ཁམས་བོན་སྐུར་བསྟན་པའི་ཡུམ་དང༌། གཟུངས་ལྟར་ན། ཡིད་ལ་དྲན་པ་དང་གསོལ་བ་གདབ་པས་གཟུགས་ཅན་མི་དང་གཟུགས་མེད་ལྷ་འདྲེ་འབྱུང་ལྔ་དང་བཅས་པའི་དགྲ་ཡིས་འཇིགས་པའི་སྐྱོན་ཐམས་ཅད་ཕྱིར་ལ་བཟློག་པར་བྱེད་པའི་བྱམས་མ་སྟེ། དགྲ་ཡི་འཇིགས་པ་སྐྱོབས་མའོ། མདོ་ལྟར་ན། ཀུན་ཁྱབ་ཀུན་ཏུ་བཟང་མོ་ཞེས། གདོད་མའི་སངས་རྒྱས་ཀུན་ཏུ་བཟང་པོ་བསྐྱེད་པར་བྱེད་ྭཔའི་བདག་ཉིད་ཀྱི་ཡུམ་ཆེན་མོ། ཡུམ་དེ་གསུམ་གཙོས། འབུམ་གཟུངས་མདོ་གསུམ་གྱི་ཡུམ་རྣམས་ལ་རིམ་བཞིན་ཕྱག་འཚལ་ལོ། ཞེས་པའོ།

བ་ནི་འགག་མེད་བོན་སྐུའི་རྩལ་མཆོག །བརྩེ་བའི་བྱད་དང་རིགས་སྔགས་གཅོད་མ། །ཀུན་ལྡན་ཡུམ་ཆེན་ཐར་པའི་ལམ་འདྲེན། །སྐུ་གསུམ་དོན་ལྡན་ཡུམ་ལ་ཕྱག་འཚལ།། ཞེས་བྱ་སྟེ། བ་ཡི་ས་བོན་ནི། འབུམ་ལྟར་ན་འགག་མེད་རིན་པོ་ཆེ་རྒྱུན་ཁམས་ཀྱི་ཡུམ་བོན་སྐུའི་རྩལ་ལས་ཡེ་ཤེས་སུ་ཤར་བའི་ཡུམ་མཆོག་ཅེས་པའོ། གཟུངས་ལྟར་ན། བརྩེ་བའི་བྱད་དང་ཅེས་པ། གནོད་ཅིང་འཚེ་བའི་བྱད་ཁ་དང་སྦོད་གཏོང་རིགས་སྔགས་ཀྱི་བྱོལ་ཟོར་ཐམས་ཅད་ཚར་གཅོད་པའི་བྱམས་མ་སྟེ། བྱད་ཀྱི་འཇིགས་སྐྱོབས་མའོ། མདོ་ལྟར་ན། ཀུན་ལྡན་ལྷུན་གྲུབ་ཀྱི་བྱམས་མ་ཞེས། ཚེ་ལོ་དཔག་མེད་ཀྱི་སངས་རྒྱས་བསྐྱེད་པའི་ཡུམ་ཆེན་ཐར་པའི་ལམ་འདྲེན་མའོ། བོན་ལོངས་སྤྲུལ་པའི་སྐུ་གསུམ་གྱི་དོན་རྟགས་དང་ལྡན་པའི་ཡུམ་ལ་ཕྱག་འཚལ་ལོ། ཞེས་པའོ།།

མ་མཆོག་ཚད་མེད་རྫོགས་སྐུ་ཆེན་མོ། །བུ་འདོད་འགྲོ་ལ་རྒྱལ་རིགས་སྟེར་མ། །ཀུན་བསྐྱེད་སེམས་ཅན་དོན་ལ་བརྩེ་མཛད། །དོན་གསུམ་མངའ་བདག་ཡུམ་ལ་ཕྱག་འཚལ།། ཞེས་བྱ་སྟེ། འབུམ་ལྟར་ན། མ་མཆོག་སྣང་བའི་ཁམས་ཚད་མེད་བཞི་ལྡན་ལོངས་སྤྱོད་རྫོགས་པའི་སྐུ་ཡི་ཡུམ་ཆེན་མོ། ཞེས་པའོ། གཟུངས་ལྟར་ན། སེམས་ཉམ་ཐག་བུ་འདོད་པའི་འགྲོ་བ་རྣམས་ལ་ཆེ་བ་རྒྱལ་རིགས་ལ་སོགས་རིགས་བཟང་སྲིད་ཀྱི་དངོས་གྲུབ་སྟེར་བའི་བྱམས་མ་སྟེ། རིགས་ཀྱི་འཇིགས་སྐྱོབས་མའོ། མདོ་ལྟར་ན། ཀུན་བསྐྱེད་སྲིད་གསུམ་བྱམས་མ་ཞེས། ཚེ་ལོ་འབུམ་དུས་ཀྱི་སེམས་ཅན་ལ་བརྩེ་མཛད་ཀྱི་སངས་རྒྱས་བསྐྱེད་པའི་ཡུམ་སྟེ། བདག་དོན་ལྷུན་འགྲུབ་གཞན་དོན་མཐར་ཕྱིན་གཉིས་དོན་གསུམ་བླ་མེད་འབྱུང་བའི་མངའ་བདག་ཡུམ་ལ་ཕྱག་འཚལ་འདུད་དོ། ཞེས་པའོ།

དེ་དོན་རྫོགས་སྐུ་རྟོགས་པའི་ཡེ་ཤེས། །མཛེ་དང་སུར་ཡ་ཀླུ་གདོན་འདུལ་མ། །ཀུན་གྲོལ་འཁོར་བའི་སྡུག་བསྔལ་ཞི་བྱེད། །རྣམ་གསུམ་གདོན་འདུལ་ཡུམ་ལ་ཕྱག་འཚལ།། ཞེས་བྱ་སྟེ།

དེ་ཡི་ས་བོན་ནི། འབུམ་ལྟར་ན། སྟོང་པ་ཉིད་ཀྱི་ཁམས་དོན་དམ་མཚན་མ་དངོས་པོ་མེད་པར་རྫོགས་སྐུར་རྟོགས་པའི་ཡེ་ཤེས་སུ་བསྟན་པའི་ཡུམ་མོ། གཟུངས་ལྟར་ན། ནད་ངན་པ་མཛེ་དང་སུར་ཡ་སོགས་ཀླུ་ཡི་གདོན་རྣམས་འདུལ་བ་སྟེ། ཀླུ་ཡི་འཇིགས་སྐྱོབས་མའོ། མདོ་ལྟར་ན། ཀུན་གྲོལ་ཐོག་མེད་བྱམས་མ་ཞེས། ཚེ་ལོ་བརྒྱད་ཁྲིའི་དུས་ཀྱི་འཁོར་བའི་སྡུག་བསྔལ་ཞི་བྱེད་ཀྱི་སངས་རྒྱས་བསྐྱེད་པའི་ཡུམ་མོ། ས་ཡི་སྟེང་འོག་བར་རྣམ་པ་གསུམ་གྱི་གདོན་འདུལ་བའི་ཡུམ་ལ་ཕྱག་འཚལ་འདུད། ཅཻས་པའོ།

མ་གཅིག་སྤྲུལ་སྐུའི་ལམ་འབྲས་ཉིད་ནི། །མུ་སྟེགས་ཕ་རོལ་རྒོལ་བའི་གཤེད་མ། །ཀུན་མཁྱེན་ཐམས་ཅད་ཡུམ་གྱུར་ཇོ་མོ། །རྟགས་གསུམ་སྟོན་མཛད་ཡུམ་ལ་ཕྱག་འཚལ།། ཞེས་བྱ་སྟེ།

མ་ཡི་ས་བོན་ནི། འབུམ་ལྟར་ན། ཀུན་གྱི་མ་གཅིག་སོ་སོར་གསལ་བའི་ཁམས་སྤྲུལ་སྐུའི་ཁམས་ཀྱི་འབྲས་བུར་བསྟན་པའི་ཡུམ་ཉིད་དོ། གཟུངས་ལྟར་ན། མུ་སྟེགས་ལ་སོགས་ཀྱི་ཕ་རོལ་གྱི་རྒོལ་བའི་རིགས་ཐམས་ཅད་ཚར་ཐག་བཅད་པའི་གཤེད་མ་ལྟ་བུ་སྟེ། བློ་འཕེལ་མུ་སྟེགས་འཇིགས་སྐྱོབས་མའོ། མདོ་ལྟར་ན་ཀུན་མཁྱེན་ཡེ་ཤེས་བྱམས་མ་ཞེས། ཚེ་ལོ་ཁྲི་བའི་དུས་ཀྱི་སྟོན་པ་སངས་རྒྱས་ཐམས་ཅད་ཀྱི་ཡུམ་དུ་གྱུར་བའི་ཇོ་མོ་ཞེས་པའོ། ཕོ་ཐམས་ཅད་ཀྱི་སྔ་ཤོས་དང༌། ཆེ་ཤོས་ལ་ཇོ་བོ་ཞེས་བྱ་བ་ལྟར་དུ། འདི་ཡང་དུས་དེ་ཡི་ལྷ་མོའི་སྔ་མ་དང་ཆེ་ཤོས་སུ་བསྟན་པའོ། མཁའ་ཀློང་དབྱིངས་གསུམ་ལ་རྫུ་འཕྲུལ་ཐོགས་པ་མེད་པའི་རྟགས་གསུམ་མངོན་དུ་སྟོན་པར་མཛད་པའི་ཡུམ་དེ་ལ་ཕྱག་འཚལ་ལོ། ཞེས་སོ། ཧི་ནི་སྤྲུལ་སྐུ་རིག་པའི་ཁམས་ཉིད།  །མི་གཙང་སྐྱོན་རྣམས་འཇོམས་པར་མཛད་མ། །ཀུན་སྐྱོབས་གཟི་བརྗིད་ཆེ་བའི་ལྷ་མོ། དག་པ་གསུམ་ལྡན་ཡུམ་ལ་ཕྱག་འཚལ།།  ཞེས་བྱ་སྟེ། ཧི་ཡི་ས་བོན་ནི། འབུམ་ལྟར་ན། སྤྲུལ་པའི་སྐུ་རང་རིག་པའི་ཁམས་ཉིད་དུ་བསྟན་པའི་ཡུམ་མོ། གཟུངས་ལྟར་ན། མི་གཙང་སྐྱོན་སྒྲིབ་རྣམས་འཇོམས་པར་མཛད་པའི་བྱམས་མ་སྟེ། སྐྱོན་གྱི་འཇིགས་སྐྱོབས་མའོ། མདོ་ལྟར་ན། ཀུན་སྐྱོབས་རང་རིག་བྱམས་མ་ཞེས། ཚེ་ལོ་སྟོང་པའི་སངས་རྒྱས་བསྐྱེད་པའི་རྒྱལ་ཡུམ་གཟི་བརྗིད་ཆེ་བར་བསྟན་པའི་ལྷ་མོ་ཞེས་སོ། སྒྲིབ་གསུམ་རྣམ་པར་དག་པ་གསུམ་དང་ལྡན་པའི་ཡུམ་དེ་ལ་ཕྱག་འཚལ་ལོ། ཞེས་སོ། མོ་ནི་གཡོ་མེད་ངོ་བོ་ཉིད་སྐུ། །འཆི་བའི་འཇིགས་ལ་ཚེ་མཆོག་སྦྱིན་མ། །ཀུན་རིགས་མཚམས་སྦྱོར་ཐུགས་རྗེ་ཐབས་མཁས། །མངོན་གསུམ་སྣང་མཛད་ཡུམ་ལ་ཕྱག་འཚལ།། ཞེས་བྱ་སྟེ།

མོ་ཡི་ས་བོན་ནི། འབུམ་ལྟར་ན། གཡུང་དྲུང་དབྱིངས་ཁམས་གཡོ་མེད་ངོ་བོ་ཉིད་ཀྱི་སྐུ་རུ་བསྟན་པའི་ཡུམ་མོ། གཟུངས་ལྟར་ན། འཆི་བའི་འཇིགས་པ་ཅན་ལ་ཚེ་ཡི་མཆོག་སྦྱིན་མ་སྟེ། ཚེ་ཡི་འཇིགས་སྐྱོབས་མའོ། མདོ་ལྟར་ན། ཀུན་རིགས་རྒྱལ་བཞེད་བྱམས་མ་ཞེས། ད་ལྟ་ཚེ་ལོ་བརྒྱ་པའི་མགོན་པོ་སྟོན་པ་གཤེན་རབ་བསྐྱེད་པའི་མཚམས་སྦྱོར་ཐུགས་རྗེ་ཐབས་ལ་མཁས་པའི་ཡུམ་ཞེས་སོ། མིང་ཙམ་མིན་པར་ད་ལྟ་མངོན་གསུམ་དུ་སྣང་བར་མཛད་པའི་ཡུམ་དེ་ལ་ཕྱག་འཚལ་ལོ། ཞེས་སོ།། ཧ་ནི་ངོ་བོ་ཉིད་ཀྱི་ཆེ་བ། །གཟའ་སྐར་སྡེ་བརྒྱད་མ་ལུས་འདུལ་མ། །ཀུན་འདུལ་མ་ལུས་སངས་རྒྱས་བསྐྱེད་བྱེད། །གནས་གསུམ་དག་པའི་ཡུམ་ལ་ཕྱག་འཚལ།། ཞེས་བྱ་སྟེ། ཧ་ནི་འབུམ་ལྟར་ན། མཉམ་པ་ཉིད་ཀྱི་ཁམས་ངོ་བོ་ཉིད་སྐུ་ཆེ་བའི་ངང་ཉིད་དུ་བསྟན་པའི་ཡུམ་མོ། གཟུངས་ལྟར་ན། གཟའ་དང་རྒྱུ་སྐར་སོགས་སྡེ་བརྒྱད་མ་ལུས་འདུལ་བའི་བྱམས་མ་སྟེ། གཟའ་ཡི་འཇིགས་སྐྱོབས་མའོ། མདོ་ལྟར་ན། ཀུན་འདུལ་གསལ་ཐང་བྱམས་མ་སྟེ། མ་འོངས་ཚེ་ལོ་བཅུ་ལ་འབྱོན་པའི་སངས་རྒྱས་བྱམས་ལྡན་མགོན་པོ་ཐང་མ་མེ་སྒྲོན་བསྐྱེད་པར་བྱེད་པའི་ཡུམ་ཞེས་སོ། ལུས་ངག་ཡིད་གསུམ་གྱི་གནས་གསུམ་དག་པར་བསྒྱུར་བའི་ཡུམ་དེ་ལ་ཕྱག་འཚལ་ལོ། ཞེས་སོ།

ཨེ་ནི་ཞི་རྒྱས་དབང་དྲག་རྩ་བ། །འཕྲིན་ལས་རྣམ་བཞི་དགྱེས་མཛད་ཉིད་མ། ལྷ་སྨན་མཁའ་འགྲོ་མ་མོའི་ཚོགས་བཅས། །སྟོབས་བཞི་ལྷུན་གྲུབ་ཡུམ་ལ་ཕྱག་འཚལ།། ཞེས་བྱ་སྟེ། ཨེ་ནི་ས་བོན་ནི། ཞི་བའི་ལས་གྲུབ་ལྷ་མོ་བཅུ་གསུམ། རྒྱས་པའི་ལས་མཛད་སྨན་མོ་བཅུ་གསུམ། དབང་གི་ལས་མཛད་མཁའ་འགྲོ་བཅུ་གསུམ། དྲག་པོའི་ལས་མཛད་མ་མོ་བཅུ་གསུམ་སོགས་རྩ་བ་འཕྲིན་ལས་རྣམ་བཞིའི་དགྱེས་མཛད། བདག་ཉིད་བྱམས་མ་ལྔ་བཅུ་ང་གཉིས་ཚོགས་བཅས་ཏེ། ཞི་རྒྱས་དབང་དྲག་གི་སྟོབས་བཞི་ལྷུན་གྱིས་གྲུབ་པའི་བྱམས་མའི་ཡུམ་དེ་ལ་ཕྱག་འཚལ་བསྟོད། ཅེས་སོ།

མ་ཞེས་བླ་མེད་སྲིད་པའི་བྱམས་ཆེན། །ཡེ་ཤེས་བཀྲ་ཤིསསྣ་ཚོགས་སྟོན་མ། །རྣམ་དག་པད་མ་གཡུང་དྲུང་ཀློང་གི །སྡེ་བཞི་རྒྱས་མཛད་ཡུམ་ལ་ཕྱག་འཚལ།།

ཞེས་བྱ་སྟེ། མ་ཞེས་ས་བོན་ནི། བླ་མེད་ཕར་ཕྱིན་གྱི་ཡུམ་བཅུ། སྲིད་པའི་ལྷ་མོ་བྱམས་ཆེན་བདུན། ཡེ་ཤེས་རྣམ་བརྒྱད་ཀྱི་ཡུམ་བརྒྱད། བཀྲ་ཤིས་རྟགས་བརྒྱད་ཀྱི་ཡུམ་བརྒྱད་སོགས་སྣ་ཚོགས་ཕར་ཕྱིན་གྱི་ཡུམ་བཅུ་སྟོན་པའི་བྱམས་མ། རྣམ་དག་པད་མ་གཡུང་དྲུང་ཀློང་གི་རྒྱུད་ལས་བྱོན་པའི་ཡུམ་སོ་གཉིས། བླ་མེད། ཡེ་ཤེས། བཀྲ་ཤིས།། སྲིད་པ་སྟེ། སྡེ་ཚན་བཞི་རུ་རྒྱས་པར་མཛད་པའི་ཡུམ་དེ་ལ་ཕྱག་འཚལ་ལོ། ཞེས་སོ།

༑ ཧོ་ལས་ཕྱི་ནང་གསང་བ་ཡང་གསང༌། །མངོན་རྟོགས་ཐབས་དང་གནས་དག་ལམ་འབྱེད། །བཅུ་དྲུག་ལམ་འབྱེད་མངོན་བཞུགས་ཆེན་མོ། །སྒོ་བཞི་སྲུང་མཛད་ཡུམ་ལ་ཕྱག་འཚལ།། ཞེས་བྱ་སྟེ། ཧོ་ཡི་ས་བོན་ནི། ཕྱི་མངོན་རྟོགས་རིག་པའི་སྒོ་བཞི། ནང་ཐབས་ཀྱི་ཐར་པའི་སྒོ་བཞི། གསང་བ་གནས་སུ་དག་པའི་སྒོ་བཞི། ཡང་གསང་ལམ་སྐབས་འབྱེད་པའི་སྒོ་བཞི། བྱམས་མ་རྒྱས་པའི་དཀྱིལ་འཁོར་ལ། སྒོ་སྲུང་སྒོ་མ་ཆེན་མོ་བཅུ་དྲུག ཚོགས་སྦྱོར་མཐོང་ལམ་སྒོམ་ལམ་ལམ་བཞི་འབྱེད་ཅིང་མངོན་དུ་བཞུགས་པའི་ཡུམ་ཆེན་མོ་དེ་ལ་ཕྱག་འཚལ་ལོ། ཞེས་སོ།

མ་ཆེན་བྱམས་ཆེན་བརྒྱ་དང་རྩ་བརྒྱད། །འབུམ་དང་ལུང་དང་རིག་པའི་གནས་མ། །མདོ་སྡེ་མངའ་དག་རྒྱུད་ཀྱི་དབང་འབུམ། །མཛོད་དོན་ཕྱོགས་བཞིའི་ཡུམ་ལ་ཕྱག་འཚལ།། ཞེས་བྱ་སྟེ། མ་ནི་བྱམས་ཆེན་བརྒྱ་དང་རྩ་བརྒྱད་སྟེ། འབུམ་སྡེའི་བྱམས་མ་ཉེར་ལྔ་དང༌། ལུང་སྡེའི་བྱམས་མ་ཉེར་ལྔ་དང༌། རིག་པའི་གནས་སྡེ་བྱམས་མ་ཉེར་ལྔ་དང༌། མདོ་སྡེའི་མངའ་བདག་བྱམས་མ་ཉེར་ལྔ་དང༌། རྒྱས་པའི་རྒྱུད་ཀྱི་བྱམས་མ་བརྒྱད་དང༌། བརྒྱ་རྩ་བརྒྱད། ཡོངས་རྫོགས་དབང་འབུམ་གྱི་མཛོད་དོན་གྱི་དཀྱིལ་འཁོར་ཆེན་པོ་བརྒྱ་དང་རྩ་བརྒྱད་གསུངས་པའི་ཡུམ་མཆོག་སྡེ་ཚན་བཞིའི་ཡུམ་ལ་ཕྱག་འཚལ་ལོ། ཞེས་སོ། ཡེ་ནི་བྱམས་ཆེན་སུམ་བརྒྱ་དྲུག་བཅུ། །ཁམས་དང་གནས་དང་རིགས་པའི་ཡུལ་ལ། །ལྟོས་མཛད་འགྲོ་བའི་དོན་དུ་བཞེངས་མ། །ཡུལ་བཞི་སངས་རྒྱས་ཡུམ་ལ་ཕྱག་འཚལ།། ཞེས་བྱ་སྟེ། ཡེ་ནི་བར་ཁྱམས་ཀྱི་བྱམས་ཆེན་སུམ་བརྒྱ་དྲུག་བཅུ་སྟེ། ཁམས་ལ་ལྟོས་པའི་བྱམས་མ་བརྒྱ་དང་རྩ་བརྒྱད་དང། གནས་ལ་ལྟོས་པའི་བྱམས་མ་བརྒྱ་དང་ཉི་ཤུ། རིགས་ལ་ལྟོས་པའི་བྱམས་མ་བརྒྱ་དང་ཉི་ཤུ། ཡུལ་ལ་ལྟོས་པའི་བྱམས་མ་བཅུ་གཉིས་ཏེ། ལྟོས་མཛད་འགྲོ་བའི་དོན་དུ་བཞེངས་པའི་བྱམས་མ། ཁམས་གནས་རིགས་གསུམ་ཡུལ་དང་བཞིའི་སངས་རྒྱས་མདོ་རྒྱུད་ཆེན་པོ་སུམ་བརྒྱ་དྲུག་ཅུ་བསྟན་པའི་ཡུམ་དེ་ལ་ཕྱག་འཚལ་ལོ། ཞེས་སོ། རུ་ནི་བྱམས་སྲས་ལྔ་སྟོང་ལྔ་བརྒྱ། །ཡེ་གཤེན་གཡུང་དྲུང་སེམས་དཔའི་ཡུམ་མ། །གནམ་ས་སྲིད་པའི་བོན་གཤེན་རྔ་ཐོག །མུ་བཞི་སྲས་བསྐྱེད་ཡུམ་ལ་ཕྱག་འཚལ།། ཞེས་བྱ་སྟེ། རུ་ཡི་ས་བོན་ནི། བྱམས་སྲས་ཚོགས་སྦྱོར་མཐོང་སྒོམ་སོགས་ཐེག་ཆེན་སློབ་ལམ་བཞི་རེ་རེ་ལའང་ལྔ་སྟོང་ལྔ་བརྒྱ་གཡུང་དྲུང་སེམས་དཔའི་སྡེ་དང༌། ཡེ་གཤེན་གཡུང་དྲུང་སེམས་དཔའ་ཆེན་པོ་སུམ་བརྒྱ་དྲུག་ཅུ་བསྐྱེད་པའི་ཡུམ་བྱམས་མ་དང༌། གནམ་ས་བར་གསུམ་སྲིད་གསུམ་ཡངས་པའི་འཇིག་རྟེན་བོན་གྱི་བསྟན་ལ་ཞུགས་པ་གཤེན་སྲས་ཀྱི་ཕྱག་ཆ་རྔ་གཤང་ཐོག་པ་སྟེ། གཤེན་རབ་རྣམ་རྩོད། རང་རྟོགས་གཤེན་རབ། ཐུགས་རྗེ་སེམས་དཔའ། གཡུང་དྲུང་སེམས་དཔའ་སྟེ། ཐེག་རིམ་བཞིའི་མུ་ལ་ཞུགས་པ་བཞིའི་བྱམས་སྲས་རྣམས་དང༌། དེ་དག་ལ་བསྐྱེད་པའི་ཡུམ་ལ་ཕྱག་འཚལ་ལོ། ཞེས་སོ། པ་ནི་བྱམས་ཕྲན་འབུམ་ཕྲག་མཐའ་ཡས། །ལྷ་མོ་སྨན་མོ་འཁའ་འགྲོ་མ་མོ། །སྣ་ཚོགས་སྤྲུལ་སྐུ་འགྲོ་དོན་མངོན་བཞུགས། །ཚོགས་བཞི་དཔག་མེད་ཡུམ་ལ་ཕྱག་འཚལ།། ཞེས་བྱ་སྟེ། པ་ཡི་ས་བོན་ནི། བྱམས་མའི་ཕྱི་འཁོར་དུ་གཏོགས་པའི་བྱམས་ཕྲན་འབུམ་ཕྲག་མཐའ་ཡས་ཏེ། ཤར་ཐབས་ཀྱི་བྱམས་མའི་ཕྱི་འཁོར་ཞི་བའི་ལྷ་མོ་འབུམ་ཕྲག་བཅུ་གསུམ། བྱང་ནམ་མཁའ་མཛོད་འཛིན་མའི་ཕྱི་འཁོར་རྒྱས་པའི་སྨན་མོ་འབུམ་བཅུ་གསུམ། ནུབ་ཐུགས་རྗེ་བྱམས་མའི་ཕྱི་འཁོར་དབང་གི་མཁའ་འགྲོ་འབུམ་ཕྲག་བཅུ་གསུམ། ལྷོ་སྟོབས་ཀྱི་བྱམས་མའི་ཕྱི་འཁོར་དྲག་པོའི་མ་མོ་འབུམ་ཕྲག་བཅུ་གསུམ་སྟེ། ཕྲིན་ལས་སྣ་ཚོགས་སྒྲུབ་ཕྱིར་སྤྲུལ་པའི་སྐུ་འགྲོ་བའི་དོན་དུ་འདས་དང་མ་འདས་པའི་ཞིང་ཀུན་ཏུ་མངོན་པར་རྒྱུན་དུ་བཞུགས་པ་རིགས་བཞིའི་མ་ཚོགས་དཔག་ཏུ་མེད་པའི་ཡུམ་ལ་ཕྱག་འཚལ་ལོ། ཞེས་སོ། ཡེ་ནི་རྒྱས་པ་རྒྱ་ཆེའི་ཡུམ་རྣམས། །ཐུགས་ཀྱི་ཡང་སྙིང་བྱམས་མར་འདུས་མ། །རྩ་བའི་སྔགས་བསྟོད་འདི་ཡིས་འགྲུབ་མ། །གསང་གསུམ་མཛོད་འཛིན་ཡུམ་ལ་ཕྱག་འཚལ།། ཞེས་བྱ་སྟེ། ཡེ་ཡི་ས་བོན་ནི། རྒྱས་པ་རྒྱ་ཆེའི་ཡུམ་ནམ་མཁའི་ཁྱབ་ཚད་ཀྱི་བྱམས་སྲས་རྣམས་ཀྱི་ཐུགས་ཀྱི་ཡང་སྙིང་བྱམས་མ་ཆེན་མོའི་ཀློང་དུ་འབྱུང་གནས་ཐིམ་གསུམ་ཀུན་འདུས་བྱམས་མ་ཡིན་པས། རྩ་བའི་མདོ་ལས་བྱུང་བའི་སྔགས་བསྟོད་འདི་ཡིས་ལྷ་དང་ལྷ་མོ་ཐམས་ཅད་འགྲུབ་མ་ཞེས་སོ། སྐུ་གསུང་ཐུགས་ཉིད་གསང་གསུམ་མི་ཟད་ཡེ་ཤེས་ཀྱི་འཁོར་ལོའི་མཛོད་འཛིན་ཡུམ་ལ་ཕྱག་འཚལ་ལོ། ཞེས་སོ།

ཏ་ནི་འཇིག་རྟེན་གསུམ་གྱི་དཔལ་མགོན། །ལྷ་ཀླུ་གནོད་སྦྱིན་ཕྱོགས་སྐྱོང་འདུལ་མ། །སྡེ་བརྒྱད་ཀུན་ལ་མངའ་མཛད་ཆེན་མོ། །འགྲོ་དྲུག་སྒྲོལ་མཛད་ཡུམ་ལ་ཕྱག་འཚལ།། ཞེས་བྱ་སྟེ།

ཏ་ཡི་ས་བོན་ནི། ས་འོག་ས་བླ་ས་སྟེང་བར་གྱི་འཇིག་རྟེན་གསུམ་གྱི་དཔལ་དང་མགོན་པོ། ལྷ་བརྒྱད་ཀླུ་བརྒྱད་གནོད་སྦྱིན་བཞི། ཕྱོགས་སྐྱོང་བཅུ། གཟའ་དང་རྒྱུ་སྐར་ལ་སོགས་དཔལ་མགོན་བདུན་ཅུ་འདུལ་བའི་བྱམས་མ་དང། ལྷ་སྲིན་སྡེ་བརྒྱད་ཀྱི་སྡེ་ཚོགས་ཀུན་ལ་མངའ་མཛད་པའི་བྱམས་མ་ཆེན་མོ་རྣམས་དང༌། འགྲོ་བ་རིགས་དྲུག་ཐམས་ཅད་སྡུག་བསྔལ་ལས་གྲོལ་བར་མཛད་པ་ལྷ་མོ་སུམ་བརྒྱ་མདོ་ཆོག་དང༌། མོ་སྦྱོང་པད་མ་མུན་སེལ་ལས་རྣམ་གྲངས་སོ་སོར་བསྟན་པའི་ཡུམ་རྣམས་ལ་ཕྱག་འཚལ་ལོ། ཞེས་སོ། འདུ་འདུ་འཁོར་འདས་གཉིས་ལ་གནས་ཀྱི། །ས་བཅུ་སེམས་དཔའ་རྣམས་ཀྱི་བསྟོད་མ། །སངས་རྒྱས་མ་ལུས་ཀུན་གྱི་ཡུམ་གཅིག །ས་གསུམ་འདུལ་མཛད་ཡུམ་ལ་ཕྱག་འཚལ།། ཞེས་བྱ་སྟེ། འདུ་འདུ་ནི། འཁོར་བ་ལས་འདས་པའི་ལམ་གཉིས་གང་རུང་ལ་གནས་པ་ཐེག་གསུམ་གྱི་སོ སྐྱེས་འཕགས་པ་ཀུན་དང༌། ཁྱད་པར་དུ་ཐེག་ཆེན་འཕགས་པ། གཡུང་དྲུང་ས་བཅུའི་སྒོ་ནས་སེམས་ལ་དཔའ་པའི་དྲོད་ཚད་བསྙེམས་པ་རྣམས་ཀྱི་བསྟོད་ཡུལ་བྱམས་མ་དང༌། སངས་རྒྱས་མ་ལུས་པ་ཀུན་བསྐྱེད་པའི་ཡུམ་གཅིག་ཁམས་གསུམ་གྱི་ས་གསུམ་འདུལ་བར་མཛད་པའི་ཡུམ་དེ་ལ་ཕྱག་འཚལ་ལོ། ཞེས་སོ། སྤྱིར་ས་གསུམ་ཞེས་པ་ལའང༌། ཁམས་གསུམ་འཁོར་བའི་ས་དང༌། མོས་པར་སྤྱོད་པའི་ས་དང༌། གཡུང་དྲུང་སེམས་དཔའི་ས་དང་གསུམ་ལ་བཤད་པའང། ཐེག་ཆུང་རྣམ་རྩོད་པའི་ས་དང༌། ཐེག་འབྲིང་རང་རྟོགས་པའི་ས་དང༌། ཐེག་པ་ཆེན་པོའི་ས་དང་གསུམ་ལ་བཤད་པ་དང༌། ཡང་དག་པའི་ས་གསུམ་ནི། གཡུང་དྲུང་སེམས་དཔའི་ས་བརྒྱད་པ་དགུ་པ་བཅུ་པ་གསུམ་ལ་བཤད་པ་སོགས་མང་དུ་ཡོད་ཀྱང༌། བྱམས་མའི་སྐྱབས་འགྲོ་ལས་གསུངས་པ་ནི། ཐེག་པ་གསུམ་གྱི་ས་ལ་འདོད་དེ། སྤངས་རྟོགས་ལམ་གྱི་སྣ་འདྲེན། ཞེས་གསུངས་པའི་ཕྱིར། སྐབས་འདི་ནི་ཁམས་གསུམ་གྱི་ས་ལ་འདོད་དེ། འདུལ་མཛད་ཅེས་པའི་ཚིག་དང་འབྲེལ་བས་སོ།

སྭ་ཡི་ཡི་གེ་རྫོགས་པའི་བར་དེར། །ཀུན་གསལ་འབུམ་ལྔ་ཁམས་བརྒྱད་བྱམས་མ། །ཤེས་དང་ཤེས་བྱ་མ་ལུས་ཉིད་དོན། །མཐའ་གསུམ་བྲལ་གྱུར་ཡུམ་ལ་ཕྱག་འཚལ།། ཞེས་བྱ་སྟེ། སྙིང་པོའི་དབུས་ནས་སྭ་ཡི་ཡི་གེ་རྫོགས་པའི་བར་དེར། ཀུན་གསལ་འབུམ་ལྔ་ཁམས་ཆེན་བརྒྱད་སོགས་ཀྱི་བྱམས་མ་ཕྱི་ནང་གསང་བའི་དོན་རྣམས་ལ། ཤེས་བྱེད་བློ་དང་ཤེས་བྱའི་ཡུལ་དང་ཤེས་པའི་ཚུལ་ཏེ། མ་ལུས་འདུས་པའི་ངོ་བོ་ཉིད་ཀྱི་དོན་ནི་འཁོར་གསུམ་དུ་རྣམ་པར་མི་རྟོག་པའི་ངང་ལས་བསྡུ་བའོ། སྔོན་དང་མ་འོངས་ད་ལྟའི་མཐའ་གསུམ་མམ། རྟག་ཆད་ཡོད་མེད་སྣང་སྟོང་གཉིས་འཛིན་གྱི་མཐའ་དང་མཐའ་གསུམ་བྲལ་བར་འགྱུར་བའི་ཡུམ་དེ་ལ་ཕྱག་འཚལ་ལོ། ཞེས་སོ། ཧཱ་ནི་མདོ་ཡི་སངས་རྒྱས་ཡུམ་སྟེ། །བདེ་བར་གཤེགས་པ་བླ་ན་མེད་པ། །ཡང་དག་མངོན་པར་རྫོགས་པའི་སངས་རྒྱས། །བྱམས་མ་ཆེན་མོ་ཡུམ་ལ་ཕྱག་འཚལ།། ཞེས་བྱ་སྟེ།  ཡང་ཧཱ་ཡི་ངོ་བོ་ནི། བྱམས་མ་རྩ་བའི་མདོ་ཡི་ནང་ལས་བྱུང་བ་བསྐལ་བཟང་སངས་རྒྱས་སྟོང་རྩ་གཉིས་ལ་སོགས་སངས་རྒྱས་སྟོན་པ་ཐམས་ཅད་བསྐྱེད་པའི་ཡུམ་སྟེ། སྟེ་ཞེས་པ་ནི་ལྷག་བཅས་ཀྱི་སྒྲ་སྟེ། སླར་ཡང་མདོ་ཡི་ཡུམ་དེ་གཙོར་བཟུང་ནས་དེ་ལ་སོགས་ཏེ། བདེ་བ་ཆེན་པོའི་དབྱིངས་སུ་ཞི་བར་གཤེགས་པ་བླ་ན་མེད་པ་མངོན་དུ་བརྙེས་ཤིང་ཡང་དག་པ་མངོན་པར་རྫོགས་པའི་སངས་རྒྱས། སྐྱེ་དགུ་ཡོངས་ལ་བུ་གཅིག་ལྟ་བུར་བྱམས་སེམས་བརྩེ་བར་མཛད་པའི་མ་གཅིག ཤེས་རབ་ཀྱི་བླ་ན་མེད་པའི་བྱམས་མ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་པའི་ཡུམ་གཙོ་འཁོར་ཀུན་ལ་རྟག་ཏུ་མི་འབྲལ་བའི་དད་མོས་དྲག་པོས་ཕྱག་འཚལ། ཞེས་སོ། སླར་ཡང་དེའི་སྙིང་པོ། ཨཱོཾ་མ་བ་མ་དེ་མ་ཧི་མོ་ཧ་ཨེ་མ་ཧོ་མ་ཡེ་རུ་པ་ཡེ་ཏ་འདུ་འདུ་སྭ་ཧཱ། ཞེས་ལན་གཅིག་གསུངས་ན། ཕན་ཡོན་མདོ་རུ་སྟོན་པས་གསུངས་པ། སྔགས་ཀྱི་རྒྱལ་པོ་ཉི་ཤུ་རྩ་གཅིག  །བོན་གྱི་རྒྱལ་པོ་བྱམས་མའི་བསྟོད་པ། །ལུང་གི་རྒྱལ་པོ་ཀུན་གསལ་ཆེན་མོ། །བཀའ་ཡི་རྒྱལ་པོ་སྟོན་པས་གསུངས་པ། །ཉེར་གཅིག་ལེའུ་འཁོར་འདས་མ་ལུས། །མཚན་བརྗོད་ཐམས་ཅད་ཚངས་པར་ཉིད་དོ། །འདི་བཀློག་བོན་རྣམས་རྫོགས་པར་འགྱུར་ཏེ། །ཕན་ཡོན་བསམ་མཐའ་ཡས་པར་ཐོབ་བོ།། ཞེས་གསུངས་པ་དེའི་དོན་ཡང། བྱམས་མ་རྩ་བའི་སྔགས་སྙིང་པོ་འབྲུ་ཉེར་གཅིག་པ་འདི་ནི་གསང་རིགས་གཟུངས་གསུམ་གྱི་སྔགས་ཐམས་ཅད་ཀྱི་རྒྱལ་པོ་ལྟ་བུའི་སྙིང་པོ་ཉི་ཤུ་རྩ་གཅིག་པའོ།

དེ་ཉིད་སྔགས་སུ་བསྟན་པ་ནི།  གཉན་ཞིང་ཟབ་པའི་ཚད་ཀྱང་ཡིན་ཏེ།  བྱམས་མའི་རྩ་རྒྱུད་ལས། ལེགས་པར་ཡེ་ཤེས་སྙིང་པོ་ཉོན། རྒྱ་ཆེ་རྒྱས་པའི་འབུམ་ལྔ་ཡིན། མདོ་དོན་བཞེད་ལུགས་ཉི་ཤུ་ཡོད། ཡང་སྙིང་བྱམས་མ་རྩ་རྒྱུད་ཡོད། ཅི་ཕྱིར་རྩི་ཐོག་སྙིང་པོ་ལས། འོ་མའི་བཅུད་ལོན་མར་བཞིན་དུ། གྲུབ་པར་སླ་ལ་འདུས་དོན་ཆེ། ཐེག་པ་མཐོ་ལ་མན་ངག་ཟབ། གདམས་པ་ཉུང་ལ་འབྲས་བུ་མྱུར། དེ་ཕྱིར་བྱམས་མའི་རྒྱུད་འཆད་པས། བོན་གྱི་སྙིང་པོ་ཡིན་པ་ནི། གཉན་ཞིང་ཟབ་པའི་ཚད་ཡིན་པས། ཀུན་ལ་བསྟན་པར་མ་གསུང་སྟེ། ཁ་སྦུབ་ཞབས་རྡོལ་དུག་ཅན་སྣོད། བཀའ་རྒྱུད་ཅི་ཡང་མི་འཆད་ན། བོན་གྱི་ཡང་སྙིང་ཡིན་པས་ན། སེང་གེ་ལྟ་བུའི་འོ་མ་འདི། ཡེ་གཤེན་སེང་བཞི་མ་གཏོགས་པ། ཕལ་པ་ཡོངས་ལ་བསྟན་འགྱུར་ན། སྣོད་ཀྱང་ཆག་ལ་བཅུད་ཀྱང་འབོ། དེ་བས་ཐེག་པའི་དྭངས་མ་བཅུད། དངོས་གྲུབ་བདུད་རྩི་མ་ཡལ་ཞིང༌། སྨིན་གྲོལ་རྒྱལ་མཚན་མ་ནུབ་ན། བྱིན་རླབས་རྒྱུད་རྐ་མི་ཆད་པའི། མ་རྒྱུད་གསང་བ་འདི་སྤྱོད་པ། སྐལ་ལྡན་རྣམས་ཀྱི་རྒྱལ་པོ་སྟེ། ཚེ་གཅིག་ལུས་གཅིག་འདི་ཉིད་ལ། མཆོག་དང་ཐུན་མོང་གཉིས་འགྲུབ་པའི། ཡང་དག་གདམས་པ་ངོ་མཚར་ཆེ། ཞེས་གསུངས་པའོ། གཡུང་དྲུང་གི་བོན་ཐམས་ཅད་ཀྱི་རྒྱལ་པོ་ལྟ་བུ་ཡིན་ཏེ། བོན་སྡེ་འདི་ནི། བོན་ཐེག་པ་རིམ་དགུ་གསུངས་པའི་ནང་ནས་བརྒྱད་པ་ཡེ་གཤེན་གྱི་ཐེག་པ་སྟེ། མདོ་སྔགས་སེམས་གསུམ་གྱི་ཀུན་འདུས་བྱམས་མའི་བསྟོད་པ་བསྟན་པའོ། དེ་ཡང་བྱམས་མའི་དབང་འབུམ་ལས། ང་ཡི་བསྟན་པ་འདི་ལ་ཉོན། བོན་ལ་རྒྱ་ཆེ་གྲངས་མང་ཡང༌། ཡེ་གཤེན་ཐེག་པ་ཆེན་པོ་འདི། དམན་པའི་ཐེག་པ་བདུན་པོ་དང༌། མི་མཐུན་ཕྱོགས་ཀྱི་ཕྱི་རོལ་ན། ཀུན་ལས་ཁྱད་པར་འཕགས་པ་སྟེ། དཔེར་ན་ནམ་མཁའ་ལྟ་བུ་ཡིན། ཞེས་གསུངས་པའི་ཕྱིར་རོ། ཚིག་ཏུ་བརྗོད་པ་ལུང་གི་བོན་ཐམས་ཅད་ཀྱི་རྒྱལ་པོ་ནི་ཀུན་གསལ་བྱམས་མ་ཆེན་མོ་ཡི་བོན་སྐོར་རོ། ཞེས་སོ། རྫོགས་པའི་སངས་རྒྱས་ཀྱི་བདག་རྐྱེན་ལས་བྱུང་བའི་ཁྱད་པར་བཞི་ལྡན་གྱི་བཀའ་རྒྱལ་བའི་གསུངས་རབ་གྲངས་ལས་འདས་པ་ཡི། རྒྱལ་པོ་སྟོན་པ་སངས་རྒྱས་ཉིད་ཀྱི་ཞལ་ནས་གསུངས་པའོ། ཞེས་སོ། ཕྱག་འཚལ་ཞེས་པའི་ཤོ་ལོ་ཀ་ཉེར་གཅིག་ལེའུ་རུ་བཞུགས་པ་འདི་ལ། འཁོར་བ་དང་འདས་པ་བྱམས་མའི་ལྷ་ཚོགས་མ་ལུས་པ་མཚན་གྱི་རྣམ་གྲངས་མདོ་ཙམ་རེ་བརྗོད་ནས་བསྟོད་པས། ངེས་ཤེས་ཡིད་ཆེས་ལྡོག་མེད་ཀྱི་གསོལ་བ་གདབ་ན་བོན་ཐམས་ཅད་ཚང་བའི་བདག་ཉིད་དོ། དེ་ནས་འདི་ཉིད་བཀླག་ན་བོན་རྣམས་ཡོངས་སུ་རྫོགས་པར་བཀླག་པར་འགྱུར་བ་ཡིན་པས། ཕན་པའི་ཡོན་ཏན་ནི་བསམ་མཐའ་ཡས་པ་འཐོབ་པར་གསུངས་པ་ཡིན་པས། སྟོན་པས་བརྗོད་ལས་འདས་པ་གསུངས་ན། ཕྲན་སོ་སོའི་སྐྱེ་བོ་ཡི་སྨོས་པར་ག་ལ་ནུས་ཀྱང༌། ལུང་ལས་གསུངས་ཚུལ་མདོ་ཙམ་བསྟན་ན། བྱམས་མ་རྩ་འབུམ་ལས། དེ་ནས་བྱམས་མ་ཆེན་མོ་འདི། ངོ་བོ་ཉིད་ལས་མ་གཡོས་ཀྱང། བོན་སྐུ་ཁོ་ནར་གནས་པར་བྱེད། སེམས་ཅན་རྣམས་ཀྱི་དོན་གྱི་ཕྱིར། རྒྱལ་བ་ལོངས་སྤྱོད་རྫོགས་པའི་ཚུལ། བྱམས་མ་རིགས་ལྔ་བཞུགས་པར་སྟོན། ཤིན་ཏུ་འདུལ་དཀའི་འདོད་ཁམས་སུ། སེམས་དཔའི་མ་ཚོགས་དུ་མར་འགྱུར། དྲན་པ་ཙམ་གྱིས་འཕོངས་སེལ་མ། གཡུང་དྲུང་སེམས་དཔའི་སྣང་ངོས་ལ། ཁམས་བརྒྱད་ལ་ཡང་ཡུམ་བརྒྱད་སྤྲུལ། ལྷ་མིའི་དགེ་སྦྱོང་ཐམས་ཅད་ལ། སྲིད་པའི་རྒྱལ་མོ་བརྒྱད་དུ་སྟོན། དག་པ་དྲང་སྲོང་སྡེ་རྣམས་ལ། བཀྲ་ཤིས་ལྷ་མོ་གཙོ་འཁོར་དགུ ས་ལམ་བསྒྲོད་པའི་སེམས་དཔའ་ལ། ཡེ་ཤེས་ལྷ་མོ་དགུ་འགྱུར་མཛད། ཡེ་ཤེས་ཆེན་པོ་ཐམས་ཅད་ལ། བླ་མེད་བྱམས་མ་བཅུ་རུ་སྤྲུལ། བར་དུ་རྩོད་པ་བཟློག་པ་ལ། འཇིགས་པ་བརྒྱད་སྐྱོབས་བྱམས་མ་བརྒྱད། འགྲོ་དྲུག་འདུལ་ལ་མ་དྲུག་སྟེ། སྐྱེ་རྒས་ན་འཆི་བགེགས་པ་ལ། སྒོ་བཞི་སྲུང་པའི་སྒོ་མ་བཞི། གཞན་ཡང་སྤྲུལ་པ་ཡང་སྤྲུལ་དུ། མ་མོ་བསམ་ཡས་སྲིད་གསུམ་སྐྱོངས། སྨིན་མོ་༼སྨན་མོ༽གྲངས་འདས་ཁྲིམས་སྡེ་ཚོགས། མཁའ་འགྲོ་དཔག་མེད་ལམ་གནས་སྲུང༌། ལྷ་མོ་རབ་འབྱམས་ཡེ་ཤེས་མགོན། ཐེག་པའི་རིམ་པ་ཇི་བཞིན་དུ།  མ་ཡི་བཀོད་པ་དེ་བཞིན་སྟོན།  ཞེས་དང༌། དཔེ་ནི་འདི་ཉིད་འདོན་བྱེད་མ། གསོ་སྦྱང་ཁྲུས་དང་གཙང་དག་གི ཚངས་པའི་དབྱངས་དྲུག་འགྱུར་བཅས་སུ། ལྷ་མོ་ལ་ནི་བསྟོད་བྱེད་ན། སྣང་སྲིད་ལྷ་ཡི་གཞལ་ཡས་སུ། སེང་གེ་འབྲུག་དང་ཁྱུང་གླང་ཁྲིར། འབུམ་ལྔ་བདག་ཉིད་བྱམས་མ་ལྔ། འཁོར་དང་བཅས་པ་དམིགས་བྱས་ལ། དེ་ཡི་ཡོན་ཏན་ཐམས་ཅད་ཀུན། ཐོབ་པའི་ཆེད་དུ་བསྟོད་བྱས་པས། ཤེས་རབ་བྱམས་མའི་ཕན་ཡོན་དུ། ཁམས་བརྒྱད་བཀླག་པ་ཅི་ལྟར་འགྱུར། སྲིད་གསུམ་སྡུག་བསྔལ་གཏན་བཅོམ་ནས། རིན་ཆེན་རྒྱུན་གྱི་གཏེར་ལ་སྤྱོད། སྣང་སྲིད་ཡོངས་ཀྱི་ཁ་འཛིན་ནུས། མི་རྟག་ཚད་མེད་རྒྱུད་ལ་སྐྱེ། སྡིག་བཅུ་དག་ནས་དགེ་བཅུ་འཕེལ། རང་རིག་རང་ལ་འཆར་བ་དང༌། དབྱིངས་ཉིད་ཀློང་དུ་མངོན་སངས་རྒྱས། མཉམ་ཉིད་བདེ་ཆེན་ངང་ལ་གནས། སྣང་སྲིད་བོན་གྱི་རྒྱལ་པོར་གྱུར།  འཁོར་འདས་བོན་རྣམས་དབང་དུ་སྡུས། བོན་གྱི་ས་ཆེན་འདུལ་བར་བྱེད། སྟོབས་ཀྱི་བྱམས་མའི་ཕན་ཡོན་དུ། དགེ་རྒྱས་འབུམ་བཀླག་ཇི་བཞིན་འགྱུར། ཡོངས་སུ་དག་པའི་རྒྱལ་ཁམས་སྐྱེ། ཉོན་མོངས་དགྲ་ཚོགས་ཟིལ་གྱིས་གནོན། ཕས་ཀྱི་རྒོལ་བ་ཚར་ཐག་གཅོད། རང་ལ་སྟོབས་བཅུ་རྫོགས་པར་འགྱུར། ཕྱི་རོལ་སྣང་ཡུལ་ཀུན་ལ་མཁས། ཚེ་དང་སྲོག་དང་དབང་ཐང་འཕེལ། བུ་དང་ནོར་དང་འབྱོར་བ་ཐོབ། ནད་གདོན་གདུག་པ་མཛེ་རིགས་སོགས། སྡེ་བརྒྱད་འབྱུང་པོས་རླག་མི་རྙེད། ནང་གི་རིག་པའི་གནས་ལ་མཁས། བཞི་བརྒྱ་རྩ་བཞིའི་ནད་ལས་ཐར། འགོ་བའི་དལ་ཡམས་ཐམས་ཅད་ཐུབ། གསོ་བྱེད་སྨན་གྱི་རྒྱལ་པོ་འགྱུར། ཕས་ཀྱི་རྒོལ་བ་ཚར་གཅོད་ཅིང༌། བསྟན་ལ་སྡང་བ་ཐམས་ཅད་ཟློག གྲུབ་མཐའ་ངན་པ་སུན་འབྱིན་འགྱུར། དགེ་བའི་ཚོགས་རྣམས་མ་ལུས་འཕེལ། སྒྲིབ་པ་ཀུན་ལས་རྣམ་པར་ཐར། ཉོན་མོངས་ལས་ཀྱི་བདུད་དཔུང་འདུལ། ཡོངས་སུ་མ་དག་གནས་ངན་གཅོད། ཡོན་ཏན་རྣམས་དང་དགེ་བ་རྣམས། ཟད་པ་མེད་པའི་གཏེར་དུ་འགྱུར། སྨོན་ལམ་བྱམས་མའི་ཕན་ཡོན་དུ། འདུལ་བའི་འབུམ་ཀླག་ཇི་བཞིན་འགྱུར། སྡིག་པ་སྒྲིབ་པ་ཐམས་ཅད་དག ཡོན་ཏན་ཐམས་ཅད་རྒྱུད་ལ་སྐྱེ། ཉེས་པའི་སྐྱོན་གྱི་མ་གོས་ཤིང༌། འདམ་གྱི་པད་མ་ལྟ་བུར་གྱུར། ལུས་ལ་དཔལ་འབྱོར་ཚོགས་པ་དང༌། སེམས་ལ་བཅུད་ཀྱི་འགེངས་པར་བྱེད། འདོད་ཡོན་རྒྱ་མཚོ་ལྟ་བུར་འདུས། སྤྱོད་པ་ཆགས་མེད་གཞན་ལ་སྟོན། བདུད་ཀྱི་རྒྱལ་མཚན་སྙིལ་བ་དང༌། བོན་གྱི་རྒྱལ་མཚན་ཚུགས་པར་འགྱུར། སྙན་པ་ནམ་མཁའི་མཐའ་མཉམ་གྱིས། ལོག་ལྟ་སྐྲག་དུ་འཇུག་པ་དང༌། ཐུགས་ཉིད་ཞི་ཞིང་བདེ་བ་རྙེད། མ་ཞི་འཕྱར་བའི་ཉེས་ཚོགས་སེལ། སྣང་སྲིད་ཡོངས་ལ་དབང་བསྒྱུར་ནས། འགྲོ་བའི་དེད་དཔོན་སྟོབས་ཆེན་ཐོབ། ཀུན་གྱི་གདུགས་བཞིན་བསྐུར་བ་ཡིས། གཙུག་གི་མཆོད་གནས་ཉིད་དུ་གྱུར། ཐུགས་རྗེ་བྱམས་མའི་ཕན་ཡོན་དུ། དོན་འབུམ་བཀླག་པ་ཇི་བཞིན་འགྱུར། རང་གཞན་དབུལ་བ་སེལ་བ་དང༌། ལོངས་སྤྱོད་གཏེར་ཆེན་ཐོབ་པར་བྱེད། ཚུལ་ཁྲིམས་དྲི་མ་མེད་པ་དང༌། ཉེས་པ་ཐམས་ཅད་ཟད་པར་བྱེད། མ་རུང་སྡུག་བསྔལ་རང་སར་ཞི། ཡང་དག་བདེ་བའི་འབྱོར་བ་ཚོགས། ཡོན་ཏན་ཐམས་ཅད་སྡུད་པ་དང༌། དགེ་བའི་རྩ་བ་ཡིད་བཞིན་འགྲུབ། བདེ་ཞིང་དགེ་བའི་ས་ལ་གནས། ཡོན་ཏན་མཆོག་གི་དབང་པོ་ཐོབ། སྟོབས་ཆེན་གཞན་གྱིས་འགྲན་མི་ཚུགས། གཟི་བརྗིད་མདངས་དང་བཀྲག་རྣམས་རྒྱས། སྙིང་རྗེ་ཚད་མེད་རྒྱུད་ལ་སྐྱེ། སེམས་ཅན་གཞན་གྱི་དོན་བྱེད་ནུས། ཅི་བསམ་བྱ་བ་དྲན་པས་འགྲུབ། སྨོན་ལམ་བཏབ་པ་མཐར་ཕྱིན་འགྱུར། ལོག་རྟོག་དགྲ་དཔུང་གནས་སུ་ཞི། ལེགས་པའི་ཐབས་ཀྱི་ཐམས་ཅད་དུ། ལྷན་གཅིག་སྐྱེས་པའི་ཤེས་རབ་སྐྱེ། ཐོས་རྩོད་འཆད་པའི་ཤེས་རབ་འཕེལ། སེམས་ཅན་གཞན་དོན་རྒྱལ་པོར་འགྱུར། ཐབས་ཀྱི་བྱམས་མ་ལམ་འབུམ་གྱི། ཕན་ཡོན་ཐམས་ཅད་བསྟན་པ་ནི། སྨེ་མནོལ་ནལ་དང་མི་གཙང་སྐྱོན། སྒྲིབ་པ་ཐམས་ཅད་དག་པ་སྟེ། ལུས་ལ་ནད་མེད་བདེ་བ་དང༌། ཡན་ལག་མཛེས་སྡུག་བཟོ་རིག་བྱེད། དངོས་དང་མཚན་མའི་འཇིགས་པ་འཇོམས། ངག་སྙན་དབྱངས་བདེ་བོན་རྣམས་སྒྲོགས། ཡོན་ཏན་དྲི་ངད་ལྡན་པ་ཡིས། སེམས་ཅན་ཐམས་ཅད་བདེ་ལ་བཀོད། སྣང་སྲིད་བཅུད་ལ་དབང་བསྒྱུར་ཞིང༌། ཟས་དང་ལོངས་སྤྱོད་ཐམས་ཅད་འདུ། རིན་ཆེན་གཏཻར་གྱི་ནོར་ཐོབ་ནས། བསོད་ནམས་གཏེར་ལ་འགྲིབ་པ་མེད། ཤེས་རབ་གསལ་བའི་མཆོག་གྱུར་པ། རྨོངས་པ་མ་ལུས་གཏན་ནས་སྤངས། ཁམས་གསུམ་ཉོན་མོངས་སེམས་ཅན་ཀུན། འདྲེན་པའི་སྟོན་པ་བྱེད་པར་འགྱུར། གཞན་ཡང་དབང་པོ་ཚོགས་བརྒྱད་ལ། སྐྱོན་མེད་དག་པའི་མཆོག་ཐོབ་ནས། ལོང་ལྐུགས་འོན་འཐིབ་རྨཽངས་པ་རུ། ཚེ་རབས་ནམ་ཡང་མི་འགྱུར་རོ། གང་ཞིག་གསེར་གྱིས་བྲིས་བྱས་ཏེ། སྤྱི་བཽའི་གཙུག་ཏུ་བཏགས་བྱས་ན། གཟའ་དང་ཐོག་དང་ནད་མི་ཚུགས། མཐར་ཡང་འཁོར་ལོ་བསྒྱུར་རྒྱལ་ཐོབ། དད་པས་ངག་ཏུ་འདོན་པ་ཡིས། ཕལ་གྱི་རྐྱེན་རྣམས་ཟློག་པ་དང༌། ཚངས་པའི་དབྱངས་དང་ལྡན་པ་སྟེ། བོན་གྱི་རྒྱལ་སྲིད་སྟོན་པར་འགྱུར། འཆང་ཞིང་བཀུར་བསྟི་རིམ་གྲོ་བྱེད། རིན་ཆེན་གཏེར་འཆང་ལྟ་བུ་སྟེ། དགོས་འདོད་ཐམས་ཅད་བསམ་པས་འགྲུབ། ཡོན་ཏན་རྣམས་ཀྱི་མངའ་བདག་བྱེད། གང་ཞིག་མཉེས་པར་བྱེད་པ་རྣམས། ཐེག་པ་ཐམས་ཅད་གྲོལ་བ་ཡི། འབུམ་སྡེ་ལྔ་ཡི་དོན་རྟོགས་པས། ཐམས་ཅད་མཁྱེན་པའི་རྒྱལ་པོར་འགྱུར། སྒྲ་ཐོས་ཙམ་གྱིས་ངན་འགྲོར་ཐར། །མཐོ་རིས་ལྟུང་བ་ཁེགས་པ་དང༌། །ཉེས་པ་ཐམས་ཅད་སེལ་བར་ནུས། །འདི་ཐོས་དོན་བཞིན་བསྒོམ་པ་ན། །སངས་རྒྱས་ལྷག་པའི་སངས་རྒྱས་ཐོབ། ཅེས་སྟོན་པས་གསུངས་པ་ལ་ཡིད་ཆེས་པར་བྱ་དགོས་ཏེ། ལུང་ལས། ཉེས་པ་ཟད་པ་རྫུན་གྱི་ཚིག སྨྲ་བ་མི་འགྱུར་རྒྱུ་མེད་ཕྱིར། ཞེས་དང༌། རི་རབ་གཞན་དུ་འཕོ་བ་དང༌། རྒྱ་མཚོ་ཆེན་པོ་སྐེམས་པ་དང༌། ཉི་ཟླ་ཐང་ལ་ལྷུང་ཡང་སྲིད། སངས་རྒྱས་བཀའ་ཡི་བསླུ་མི་སྲིད། ཅེས་གསུངས་སོ། རྩ་བ་སྔགས་ཀྱི་བསྟོད་པ་ཉི་ཤུ་རྩ་གཅིག སྟོན་པས་གསུངས་པ་ལ་མངོན་པར་བསྟོད་དོ། ཞེས་པས་སོ། བྱམས་མ་རྩ་བའིམདོ་ལས་བྱུང་བའི་སྔགས་ཀྱི་བསྟོད་པ་ཕྱག་འཚལ་ཉི་ཤུ་རྩ་གཅིག་པ་སངས་རྒྱས་སྟོན་པས་གསུངས་པ་དེ་ལ་ཡེ་གཤེན་སེང་བཞི་སོགས་གཤེན་རབ་གཡུང་དྲུང་སེམས་དཔའ་རྣམས་དང༌། ལྷ་ཀླུ་མི་དང་དྲི་ཟར་བཅས་པའི་འཁོར་ཚོགས་ཀུན་གྱིས་མོས་པ་ཆེན་པོས་མངོན་པར་བསྟོད་ནས་རྗེས་སུ་ཡི་རངས་བྱེད་དོ། དོ་ཞེས་པ་ནི། རྫོགས་ཚིག་གོ། ཞེས་སོ། ཞེས་པ་འདི་ཡི་རྒྱུད་ཚུལ་ནི་སངས་རྒྱས་བསྟན་པའི་གཙོ་བོས། ཡེ་གཤེན་གཡུང་དྲུང་སེམས་དཔའ་རྣམས་ལ་གསུངས། བཀའ་བསྡུ་བ་པོ་གཤེན་ཐང་མ་འོད་རྒྱལ་གྱིས་མཛད་ནས། ལྷ་ཀླུ་མི་ཡི་གཤེན་སོགས་བླ་མ་ཆེ་དྲུག དེ་ནས་བར་གྱི་གདུང་བརྒྱུད་བཅུ་གསུམ་གྱི་ནང་ཚན། གྲུབ་རྩལ་ཐོགས་པ་མེད་པའི་གཤེན་དགུ་རྣམས་རིམ་པར་བརྒྱུད་ནས། རྒྱལ་གྲི་གུམ་གྱི་རིང་ལ་བོན་དར་ནུབ་བྱུང་ནས་གཏེར་དུ་གཤེགས། ཕྱིས་ཕྱྭ་སྲས་ཀེང་ཙེ་ལེན་མེད་ཀྱིས་ལུང་བསྟན། སྤྲུལ་པའི་སྐུ་མཆོག་རྗེ་བཙུན་ཁྲོ་ཚང་འབྲུག་ལྷས་གཏེར་ཞལ་ཕྱེས་ནས། དེ་ནས་རྒྱུད་འགྲེལ། གཞུང་ཆ་ལག་ཆ་རྐྱེན་དང་བཅས་པའི་དབང་ལུང་གི་རྒྱུད་པ་རྣམས། རྗེ་འབྲུག་ལྷ་ཉིད་ཀྱིས། ཨ་ད་ལྷ་སྲས་ལ་གཏད། དེས་ཨ་ད་ལྷ་བཙན་ལ་བརྒྱུད། དེས་ཨ་ད་ལྷ་རྒྱལ་ལ་བརྒྱུད། དེས་ཨ་ད་ལྷ་མགོན་ལ་བརྒྱུད། ལྷ་མགོན་གྱི་རིང་ལ། སྔོན་རྗེ་འབྲུག་ཆེན་པོའི་ཞལ་ནས་ལྷ་སྲས་ལ་གནང་སྐབས། ལྷ་ལུས་བོར་ནས་མི་ལུས་སྐྱེ། གཞོན་ནུས་མཚན་ཅན་རྣལ་འབྱོར་འབྱུང༌། མ་རྒྱུད་བོན་གྱི་སྐལ་པ་ལེན། ཚེ་དང་བསྟན་པ་མཐར་ཕྱིན་ཞིང༌། སངས་རྒྱས་འབྲས་བུ་ཐོབ་པར་འགྱུར། ཞེས་ལུང་བསྟན་པ་ལྟར། དམྱལ་སྟོན་གཞོན་རྩེ་ལ་དངོས་གྲུབ་འབབ། དེ་ནས་སྒོམ་པ་གཡུང་དྲུང་སྐྱབས་ལ་བརྒྱུད། དེས་སྒོམ་པ་རིན་དཔལ་ལ་བརྒྱུད། དེས་བཀའ་གདམས་ཡེ་ཤེས་རྒྱལ་མཚན་ལ་བརྒྱུད། དེས་ཞང་སྟོན་བསོད་ནམས་དཔལ་ལ་བརྒྱུད། དེས་ཞང་སྟོན་བསོད་རྒྱལ་ལ་བརྒྱུད། དེས་རྗེ་མཉམ་མེད་ཤེས་རབ་རྒྱལ་མཚན་ལ་བརྒྱུད། དེས་རྒྱལ་ཚབ་རིན་ཆེན་རྒྱལ་མཚན་ལ་བརྒྱུད། དེས་ནམ་མཁའ་ཡེ་ཤེས་ལ་བརྒྱུད། དེས་ཀུན་བཟང་རྒྱལ་མཚན་ལ་བརྒྱུད། དེས་རིན་ཆེན་རྒྱལ་མཚན་ལ་བརྒྱུད། དེས་ཚུལ་ཁྲིམས་རྒྱལ་མཚན་ལ་བརྒྱུད། དེས་བསོད་ནམས་ཡེ་ཤེས་ལ་བརྒྱུད། དེས་བསོད་ནམས་གཡུང་དྲུང་ལ་བརྒྱུད། དེས་ཤེ་ཙུ་དྲུང་མུ་ལ་བརྒྱུད། དེས་ཤེས་རབ་འོད་ཟེར་ལ་བརྒྱུད། དེས་གཡུང་དྲུང་རྒྱལ་མཚན་ལ་བརྒྱུད། དེས་ཤེས་རབ་བློ་གྲོས་ལ་བརྒྱུད། དེས་ཤེས་རབ་འོད་ཟེར་ལ་བརྒྱུད། དེས་གཙུག་ཕུད་འོད་ཟེར་ལ་བརྒྱུད། དེས་མཁས་གྲུབ་གཡུང་དྲུང་ཚུལ་ཁྲིམས་ལ་བརྒྱུད། དེས་བྲུ་སྟོན་རིན་ཆེན་རྣམ་རྒྱལ་ལ་བརྒྱུད། དེས་སྐུ་མདུན་རིན་ཆེན་ལྷུན་གྲུབ་ལ་བརྒྱུད། དེས་བྲུ་སྟོན་ལྷུན་གྲུབ་དབང་རྒྱལ་ལ་བརྒྱུད། དེས་སྐུ་མདུན་ཤེས་རབ་དབང་རྒྱལ་ལ་བརྒྱུད། དེས་དྲང་སྲོང་གཡུང་དྲུང་བསྟན་འཛིན་ཚུལ་ཁྲིམས་ལ་བརྒྱུད། བླ་མ་དེ་ཉིད་ཀྱི་དྲུང་ནས་སྐམ་བླ་མ་ཤེས་རབ་ཕུན་ཚོགས་ལ་བརྒྱུད། དེས་མཁས་གྲུབ་གཡུང་དྲུང་ཉི་རྒྱལ་ལ་བརྒྱུད། དེས་བདག་ལ་གནང་བའོ།

ཅེས་བྱམས་མའི་བསྟོད་འགྲེལ་འདི་ཡང་ཞིབ་རྒྱས་སུ་བསྟན་པར་ནུས་ན། ལྷ་ཡི་མཚན་དང་ལུང་དང་རིག་པ་སྦྱར་ན། ལེའུ་ཚན་ཆེན་པོ་ཉེར་གཅིག་བྱས་ན་པོ་ཏི་དུ་མར་ལོན་པ་འདུག་ཀྱང༌། ཕྲན་རང་ཚེ་དཔག་མེད་ཀྱི་ལུང་ལས། ཚེ་ཟད་པ་བསྲིང་བ་ནུས་ཀྱང་ལས་ཀྱིས་རྣམ་པར་སྨིན་པ་ནི་གང་ལ་ཡང་མ་གཏོགས་སོ། ཞེས་གསུངས་པ་ལྟར། ལས་རྐྱེན་ཟུང་འབྲེལ་གཟུགས་གཞི་ཤིན་ཏུ་མི་བདེ་བའི་གཙེས་པའི་ཚེ་འདི་ཡི་སྐལ་པ་ཐོབ་ལོང་ཙམ་དུ་སྒོ་བཙུན་ཉི་མིང་པས་བྲིས། ཉེས་འགལ་ནོར་འཁྲུལ་སོང་ན་མཁའ་འགྲོ་གཉན་ལ་མཐོལ་བཤགས་ཕུལ་ནས། སྨྲས་པ། བདག་ཀྱང་འདི་ནས་ཚེ་རབས་ཐམས་ཅད་དུ། །བདག་ལྟ་འཁོར་བའི་ས་བོན་གཏན་སྤངས་ནས། །བདག་མེད་དོན་རྟོགས་སྟོང་ཉིད་མངོན་འགྱུར་ཏེ། །བདག་གཞན་དོན་རྣམས་ལྷུན་གྲུབ་མཐར་ཕྱིན་ཤོག། ཐ་ཚན་མུ་ཙུག་སྨར་རོ། བཀྲ་ཤིས།