དེ་འདྲའི་སེམས་པ་སྐྱོ་བ།

དེང་སང་བླ་སྤྲུལ་ཕལ་ཆེར་ཟབ་མོའི་ཉམས་ལེན་དོར་ནས།།

སྒོར་མོ་མོད་པའི་ཕྱོགས་སུ་འཁོར་དང་བཅས་ཏེ་ཆས་སོང་།།

ཉམ་ཆུང་གཤིན་པོའི་དགེ་རྫོང་ལམ་སྟོན་བླ་མ་མ་རྙེད།།

དད་འབངས་ཡིད་ཐང་ཆད་འདུག་ཅི་འདྲའི་སེམས་པ་སྐྱོ་བ།།

དེང་སང་གྲྭ་པ་ཕལ་ཆེར་ཐོས་བསམ་འཆད་ཉན་དོར་ནས།།

གྲོང་དང་གྲོང་ཁྱེར་ཀུན་ལ་སྲང་ཁྱི་བཞིན་དུ་འཁྱམས་སོང་།།

བཤད་སྒྲུབ་བསྟན་པའི་རྩ་ལག་གྲྭ་རྒྱུན་ཉིན་བཞིན་ཉུང་སྟེ།།

དགེ་རྒན་ཐུགས་སེམས་ཕམ་སོང་ཅི་འདྲའི་སེམས་པ་སྐྱོ་བ།།

དེང་སང་གསར་བུ་ཕལ་ཆེར་འབྲས་བརྩི་འཇོག་དོར་ནས།།

བུ་ཕྲུག་མིང་སྲིང་དུ་མའི་ཕ་མའི་འབྲེལ་བར་གྱུར་ཡང་།།

ད་དུང་མི་འགྲིག་ཟེར་ནས་ཁྱིམ་ཚང་ཁ་འཐོར་བཏང་ཏེ།།

ཕ་མ་སྡུག་ལ་སྦྱར་སོང་ཅི་འདྲའི་སེམས་པ་སྐྱོ་བ།།

དེང་སང་ཕྲུ་གུ་ཕལ་ཆེར་ཤེས་ཡོན་སློབ་རྒྱུ་དོར་ནས།།

བདུད་ལས་དང་དུ་བླངས་ཤིང་དུག་རྫས་ལོངས་སུ་སྤྱོད་ཤིང་།།

མ་ཡུམ་སློབ་གྲྭའི་སྒོ་ལ་མི་ལུས་ཕྲོག་བརླག་བཏང་སྟེ།།

མི་རིགས་རྐང་པ་འཐེན་སོང་ཅི་འདྲའི་སེམས་པ་སྐྱོ་བ།།