གོང་མའི་འཕྲོས་མཐུད།

 གསུམ་པ་ཡི་དམ་ལ་བསྲེ་བ་ལ་དང་པོར་ཕྱག་འཚལ་ཏེ། ཐམས་ཅད་སྐྱེད་བྱེད་འབྱུང་བ་ལྔའི་ངང༌། འདོད་པ་ཀུན་འབྱུང་ཡིད་བཞིན་ནོར་བུའི་ཚུལ། ཡངས་ཤིང་རྒྱ་ཆེ་ནམ་མཁའི་ངང་ཚུལ་ཅན། ཡིད་འོང་ཉམས་དགའ་ལྷའི་གཞལ་ཡས་ཁང༌། དཀྱིལ་འཁོར་གཞལ་ཡས་ཆེ་ལ་ཕྱག་འཚལ་ལོ། ཞེས་ཕྱག་འཚལ། དེ་ནས་ཞུ་བ་དབུལ་ཏེ། ཀྱཻ་དཔོན་གསས་བླ་མ་དགོངས་སུ་གསོལ། བདག་ཅག་ལས་ཀྱི་དབང་གིས་སྒྲིབ། ཆུ་བུར་མིག་གིས་དཀྱིལ་འཁོར་དོན་མ་ཁུམས། ཡེ་ཤེས་སྤྱན་མེད་ཡི་དམ་ལྷ་དང་འཛོལ། དཔོན་གསས་བླ་མའི་བྱིན་རླབས་ཀྱིས། དཀྱིལ་འཁོར་ལྷ་དང་འཕྲད་པར་མཛད་དུ་གསོལ། ཞེས་ཞུ་བ་དབུལ། དཔོན་གསས་ཀྱིས་ལན་དུ། བདེར་གཤེགས་ཡེ་ཤེས་ལྷའི་ཐུགས་རྗེ་དང༌། དཔོན་གསས་བླ་མའི་བྱིན་རླབས་དང༌། མར་མེ་གསལ་བའི་སྒྲོན་མ་ཡིས། ལས་ཀྱི་སྒྲིབ་པ་བྱང་ནས་ཀྱང༌། དཀྱིལ་འཁོར་ལྷ་དང་འཕྲད་འགྱུར་ཅིག ན་མ་ཨ་དཀར་ཤག་སལ་ལེ་ལྷན་ནེ་རྟེན་དུ་ཨཱོཾ། ཞེས་བྱའོ། དེ་ནས་ནང་གི་ཁྲུས་བྱ་སྟེ། འདི་སྐད་དོ། དབུས་ནས་རང་འབྱུང་གྲུབ་པའི་ལྷ། ཡེ་ཤེས་ཆེན་པོའི་ཁྲུས་གསོལ་བས། ཡིད་འོང་སྣོད་ལྡན་སློབ་མ་ཡི། ཞེ་སྡང་རྣམ་སྨིན་དག་འགྱུར་ཅིག དེ་བཞིན་དུ་ཤར་བྱང་ནུབ་ལྷོ་རྣམས་སུ། གཏི་མུག་ང་རྒྱལ་འདོད་ཆགས་ཕྲག་དོག་རྣམ་སྨིན་ལ་སོགས་ནན་གྲན་ནོ་༼འདྲེས་སོ༽། ཕྱི་ནང་གསང་གསུམ་གྱི་ཁྲུས་བཤད་དོ། དེ་ནས་མེ་ཏོག་སྐྱུར་ཏེ། སློབ་མ་དར་རས་གཙང་མས་སྤྱན་གཡོགས་ཏེ། ལག་དུ་མེ་ཏོག་ཐོགས་ལ་དཀྱིལ་འཁོར་ལྷོ་ནུབ་དུ་སྒྲིགས་ལ་མོས་གུས་བསྐྱེད་དེ་འདི་སྐད་དོ། བདག་གི་རིག་པའི་མེ་ཏོག་འདི། དཀྱིལ་འཁོར་ལྷ་ལ་འཕངས་པ་ཡིས། ཚེ་རབས་སྔོན་ནས་འབྲེལ་པ་ཡི། ཐུགས་རྗེས་སྐྱོབ་མཛད་ལྷ་དང་འཕྲད་པར་ཤོག སལ་ལེ་ལྷན་ནེ་འདུ་བརྟན་པར་ལྷན། ཞེས་བརྗོད་ལ་ཕོ་བྲང་དབུས་སུ་གཏོར་ལ་སྐྱུར་རོ། དེ་༼ནས༽སྒོ་དབྱེ་སྟེ་འདི་སྐད་དོ། ཨ་ཤར་གྱི་ཕྱོགས་ནས་སྒོ་འབྱེད་མ། ཐུགས་རྗེ་སེར་མོ་ཕྱག་རྒྱ་བཀྲོལ། ཕྱག་མཚན་ལྕགས་སྒྲོག་བརྒྱུད་མ་ཡིས། འཁོར་བར་སྐྱེ་བའི་སྒོ་ཆོད་ལ། ཨ་དཀར་འོད་ཀྱི་ལྡེ་མིག་གིས། མེ་ལོང་ཡེ་ཤེས་སྒོ་ཕྱེས་ལ། ཨ་དཀར་བསལ་བའི་དཀྱིལ་འཁོར་དུ། མངོན་རྟོགས་རིག་པ་ཤར་བར་ཤོག ཨཱ་ཨ་དཀར་སལ་ལེ་འོད་ཨ་ཡྃ་ཨཱོཾ་འདུ། ཨ་བྱང་གི་ཕྱོགས་ནས་སྒོ་འབྱེད་མ། གླང་ར་སྔོན་མོ་ཚེ་འཕེལ་མ། ཕྱག་མཚན་གླང་རེའི་འཁོར་ལོ་ཡིས། རྒས་ཤིང་རྒུད་པའི་སྒོ་ཆོད་ལ། ཨ་དཀར་འོད་ཀྱི་ལྡེ་མིག་གིས། མཉམ་ཉིད་ཡེ་ཤེས་སྒོ་ཕྱེས་ལ། ཨ་དཀར་གསལ་བའི་དཀྱིལ་འཁོར་དུ། བག་ཆགས་སྒྲིབ་པ་བྱང་བར་ཤོག ཨཱ་ཨ་དཀར་སལ་ལེ་འོད་ཨ་ཡྃ་ཨཱོཾ་འདུ། ཨ་ནུབ་ཀྱི་ཕྱོགས་ནས་སྒོ་འབྱེད་མ། ལེ་བར་དམར་མོ་འབྲས་བུའི་བདག ཕྱག་མཚན་འཆིང་སྡོམ་ཞགས་པ་ཡིས། ན་ཞིང་གཅོད་པའི་སྒོ་ཆོད་ལ། ཨ་དཀར་འོད་ཀྱི་ལྡེ་མིག་གིས། སོར་རྟོགས་ཡེ་ཤེས་སྒོ་ཕྱེས་ལ། ཨ་དཀར་གསལ་བའི་དཀྱིལ་འཁོར་དུ། རང་རིག་ཡེ་ཤེས་མཐོང་བར་ཤོག ཨཱ་ཨ་དཀར་སལ་ལེ་འོད་ཨ་ཡྃ་ཨཱོཾ་འདུ། ཨ་ལྷོ་ཡི་ཕྱོགས་ནས་སྒོ་འབྱེད་མ། དབང་སྡུད་དཀར་མོ་ཕྱག་རྒྱའི་བདག ཕྱག་མཚན་ལྕགས་ཀྱུ་བརྟེན་མ་ཡིས། འཆི་འཕོས་འདོར་ལེན་སྒོ་ཆོད་ལ། ཨ་དཀར་འོད་ཀྱི་ལྡེ་མིག་གིས། བྱ་གྲུབ་ཡེ་ཤེས་སྒོ་ཕྱེས་ལ། ཨ་དཀར་གསལ་བའི་དཀྱིལ་འཁོར་དུ། ཐུགས་རྗེའི་དབང་རྣམས་རྫོགས་པར་ཤོག ཨ་དབུས་ཀྱི་ཕྱོགས་ནས་སྒོ་འབྱེད་མ། ནམ་མཁའ་གསལ་བྱེད་གདོས་བྲལ་མ། ཕྱག་མཚན་གསལ་བའི་སྒྲོན་མ་ཡིས། མ་རིག་མཚན་མའི་དངོས་པོ་འཇོམས། གསལ་བ་འཕྲུལ་གྱི་ལྡེ་མིག་གིས། ཡངས་ཤིང་གསལ་བའི་སྒོ་ཕྱེ་ནས། ཨ་དཀར་གསལ་བའི་དཀྱིལ་འཁོར་དུ། ཡངས་ཤིང་གསལ་བའི་དོན་རྟོགས་ཤོག མ་རིག་པ་ཡི་སྒོ་ཕྱེ་ནས། རིག་པ་ཡེ་ཤེས་ཀྱི་དོན་མཐོང་བར་བསམ། དེ་ནས་སྤྱན་དབྱེ་སྟེ་བླ་མ་ལ་འདི་སྐད་ཞུའོ། དཔོན་གསས་བླ་མའི་ཐུགས་རྗེ་ཡིས། བདག་གི་མ་རིག་ལིང་ཏོག་གསལ་དུ་གསོལ། ཅེས་ཞུའོ། དཔོན་གསས་ཀྱིས་ལན་དུ་འདི་སྐད་དུ་བརྗོད་དེ། ང་ནི་མཐོང་གསས་སྒྲོན་མ་སྟེ། ཕྱག་གཡས་ཡེ་ཤེས་རྩགས་ཁབ་ཀྱིས། མ་རིག་རྟོག་པའི་དྲྭ་བ་དབྲལ་ནས་ཀྱང། དཀྱིལ་འཁོར་ལྷ་ཞལ་བསྟན་པར་བྱ། གཡོན་པ་གསེར་གྱི་སྦུར་ལེན་གྱིས། ཆུ་བུར་ནང་གི་སྐྱོན་གསལ་ནས། ཡི་དམ་ལྷའི་ཞལ་མཐོང་ཤོག ང་ནི་ལི་ཤག་དམར་མོ་སྟེ། གཡས་པ་གསལ་བའི་སྒྲོན་མེ་སྣོམ། མངོན་རྟོགས་གསལ་བའི་སྒོ་ཡང་སོལ། གཡོན་པ་གསལ་བའི་མེ་ལོང་འཕྱར། ཡི་དམ་ལྷའི་ཞལ་ངོ་སྟོན། རྩེ་གཅིག་སངས་རྒྱས་སྒྲུབ་པའི་ཕྱིར། སྒྲོན་མ་མེ་ལོང་བལྟས་མཐོང་བས། བརྡ་དང་ཐབས་ཀྱིས་སྟོན་བྱེད་པ། མཐོང་གསས་སྒྲོན་མ་ཡབ་ཀྱི་མཁའ། ལི་ཤག་དམར་མོ་ཤེས་རབ་ཡུམ། ཐབས་ཤེས་གསལ་བ་ཡབ་ཡུམ་གྱི། དཀྱིལ་འཁོར་ལྷ་དང་འཕྲད་གྱུར་གཅིག དེ་ནས་སྤྱན་གཡོགས་གསལ་ལ་གདན་གང་ལ་བབ་པའི་ལྷ་དེ་ཡི་དམ་དུ་ཕོག སྙིང་པོ་སྦྱིན། གསང་མཚན་བཏགས་པ་ནི། འོག་ཏུ་བཤད་མོད་ཀྱང༌། འོན་ཀྱང་ལག་ལེན་སྟབས་བདེའི་ཕྱིར་གནས་སྐབས་འདིར་བཏགས་ཏེ། དེ་ཡང་གྲོགས་ཕོ་ཡིན་ན། ལྷ་ཡབ་ཀྱི་གསང་མཚན་ནམ་རིགས་མ་ཡོན་ཏན་གྱི་ཆ་དང་སྦྱར་ལ་བཏགས། གྲོགས་མོ་ཡིན་ན་ཡུམ་གྱི་གསང་མཚན་ནམ། རིགས་ཀྱི་ཆ་དང་སྦྱར་ལ་བཏགས། ཡང་ན་སྤྱིའི་གསང་མཚན་སྟེ་དྲུག་ནས་བོས་ཏེ། ལྷའི་གསང་མཚན་གཡུང་དྲུང་དག་པ་རྩལ། དཔོན་གསས་གསང་མཚན་གཡུང་དྲུང་སྐྱེས་ན་རྩལ། དཀྱིལ་འཁོར་གསང་མཚན་གཞལ་ཡས་དཔག་མེད་རྩལ། གྲོགས་པོའི་གསང་མཚན་གཡུང་དྲུང་འགྱུར་མེད་རྩལ། གྲོགས་མོའི་གསང་མཚན་གཡུང་དྲུང་ལྷོག་མེད་རྩལ༌། རྒྱུ་རྐྱེན་གསང་མཚན་གཡུང་དྲུང་ཡོན་ཏན་རྩལ། ནང་བྱེ་བྲག་གི་གསང་མཚན་དྲུག་ནི། གྲོགས་ཕོ་ལ་ཐབས་ཡེ་ཤེས་ཀྱི་ལྷ་གསུམ་དང་སྦྱར་ཏེ་འབོགས་པ་ནི་གཡུང་དྲུང་ཡེ་ཤེས་རྩལ། གྲོགས་མོ་ལ་དབྱིངས་ཀློང་ཤེས་རབ་ཀྱི་ལྷ་དང་སྦྱར་ཏེ། མ་ནི་ཤེས་རབ་དབྱིངས་ཉིད་རྩལ། ལས་མཁན་སྤྲུལ་པ་ཛ་དང་བྷོ་འབོད་པའི། དེ་ནས་དཔོན་གསས་ཀྱིས་མིང་གི་དབང་བསྐུར་ཏེ། འདི་སྐད་བརྗོད། དེ་རིང་ཕན་ཆད་རིགས་ཀྱི་བུ། གནས་གསུམ་གསལ་བའི་དཀྱིལ་འཁོར་དུ། འབྲུ་གསུམ་གསལ་བའི་སྙིང་པོ་ལ། ཐིག་ལེ་གསུམ་གྱི་ཆོ་འཕྲུལ་གྱིས། རིགས་དང་མཐུན་པའི་མཚན་བཏགས་པས། མི་བརྗེད་གཟུངས་དང་ལྡན་པ་ཡི། གཉིས་མེད་མཉམ་པ་མིང་གི་དབང་བསྐུར་བས། མ་འོངས་པའི་ཞིང་ཁམས་སུ། བདེ་བར་གཤེགས་པའི་མཚན་རྟགས་རྫོགས་པར་ཤོག ཅེས་སོ། དེ་ཡང་གསང་མཚན་ཞེས་བྱ་བ་ནི། ཤར་དྲི་ཟ། བྱང་གནོད་སྦྱིན། ནུབ་ཀླུ་དབང༌། ལྷོ་གཤིན་རྗེ། མི་དང་མི་མིན་ལ་སོགས། དབང་དང་དམ་ཚིག་མ་འདྲེས་པ་ལ་གསང་ཞིང་དམ་པར་བྱ་སྟེ། འདིར་རང་གི་མ་བརྗེད་པར་བྱས་པས། བར་དོར་མ་བརྗེད་ན། དེར་བར་དོའི་འཇིགས་པ་ཐམས་ཅད་ལས་སྐྱོབ་ཅིང༌། མཐར་ལྷ་དེའི་རིགས་སུ་སངས་རྒྱས་པའི་ཡོན་ཏན་དང་དགོས་དོན་ཡོད།

གཉིས་པ་དམ་ཚིག་བཤད་པ་ལ་དྲུག་སྟེ། དམ་ཚིག་གི་ངོ་བོ་ངེས་ཚིག་དང༌། བསྲུང་བའི་ཡུལ་དང༌། རྟེན་དང༌། དབྱེ་བ་དང༌། སྐྱོན་ཡོན་དང༌། དམ་ཚིག་གི་རང་བཞིན་བསྟན་པའོ། དང་པོ་ལ་ངོ་བོ་ནི་དགེ་མི་དགེ་ཐམས་ཅད། བདེར་གཤེགས་ཞི་ཁྲོའི་བཀའ་ལ་འདུས་ཤིང་དེའི་དོན་ལས་མི་འདའ་བའོ། ངེས་ཚིག་ནི་མ་བསྲུང་ན་རང་རྒྱུད་ཀྱི་ཡོན་ཏན་ཐམས་ཅད་ཚིག་ཅིང༌། ངན་སོང་གསུམ་དུ་ལྷུང་གིན་ཚིག་པས་ཚིག་ཞེས་བྱ་བ་ལ། བསྲུང་ན་ཕྱི་ནང་གི་དགྲ་བགེགས་དང་རང་རྒྱུད་ཀྱི་ཉོན་མོངས་པ་ཚིག་ནས་ཐར་པ་ཐོབ་པའོ། གཉིས་པ་ཡུལ་ནི། སྤྱིར་ན་འགྲོ་དྲུག་ལམ་ལྔ་དང་བཅས་པ་ཡིན་མོད་ཀྱིས་འོན་ཀྱང་གསང་སྔགས་ཀྱི་ལུགས་ཀྱི། ཡི་དམ་ཀྱི་ལྷ་དང་ཞལ་སྐྱིན་གྱི་རྟེན་དང༌། ལུང་འབོགས་པའི་དཔོན་གསས་དང། མཆེད་དང་གྲོགས་པོ་དང། ཡང་གསང་གི་ལྷ་དང་ལྔ་པོ་དེ་དག་ཡིན་ཏེ། ཡི་དམ་ལྷ་ནི་མི་སྤོང་རྟག་དུ་བསྒོམ། ཞེས་གསུངས་སོ། གསུམ་པ་བསྲུང་བའི་རྟེན་ནི། ཀུན་བཟང་ཐུགས་ཀྱི་ཐིག་ལེ་ལས། བག་ཆགས་གཡོས་ནས་སད་པ་ཡི། དགའ་དད་མོས་ནས་མདུན་སྤྱོད་པའི། གང་ཟག་རྐྱེན་གྱི་སད་པའོ། ཞེས་གསུངས་པས། གསང་སྔགས་ཀྱི་ལས་འཕྲོ་སད་ཅིང་དོན་ལ་མོས་པའི་གང་ཟག་ཡིན་ཏེ། འགྲོ་བ་གང་གི་རྒྱུད་ལ་སྐྱེ་རུང་པའོ། བཞི་པ་དབྱེ་བ་ལ་བཞི་སྟེ། རྩ་བ་དང༌། ཡན་ལག་དང༌། ཉིང་ལག་དང༌། ཁྱད་པར་གྱི་དམ་ཚིག་གོ དང་པོ་ལ་ལྔ་སྟེ། ཡིད་བཞིན་གྱི་ནོར་བུ་སྤྱི་གཙུག་ནས་མི་དབོག་ཅེས་བྱ་སྟེ། དཔོན་གསས་བླ་མ་མན་ངག་གི་རྩ་བ་ཡིན་པས་སྤྱི་བོའི་གཙུག་ཏུ་ཁུར་བ་དང༌། ཕོ་བྲང་གཞལ་ཡས་ཀྱི་མདངས་མི་འཕྲོག་ཅེས་བྱ་སྟེ། ཡི་དམ་བྱིན་རླབས་ཀྱི་རྩ་བ་ཡིན་པས། ལས་དམ་ཡེ་ཤེས་ཀྱི་དཀྱིལ་འཁོར་གསལ་བཏབ། ས་ཆུ་རྒྱུན་གྱི་འབྲེལ་མི་བཅད་ཅེས་བྱ་སྟེ། སྔགས་དང་ཕྱག་རྒྱ་ནུས་པའི་རྩ་བ་ཡིན་པས། བཅའ་བསྒྱུར་བཟླས་པ་རྒྱུན་མི་བཅད། དྲི་མེད་ལས་ལ་དྭོགས་མི་རྒོ་༼བགོ༽ཞེས་བྱ་སྟེ། གཡུང་དྲུང་ཁྱད་པར་གྱི་ཐེག་པ་ལ་འཇུག་པའི་ཐབས་ཁྱད་པར་ཅན་སྤྱི་དམ་གྱི་རྩ་བ་ཡིན་པས་བཀའ་ལུང་ལ་སྨད་པ་མི་བྱ་བ་དང༌། གསང་སྒོ་གཉེན་པོ་ཡན་པར་མི་བཏང་ཞེས་བྱ་བ་སྟེ། ཨུ་ཡ་བ་དངོས་གྲུབ་ཀྱི་རྩ་བ་ཡིན་པས་ཤིན་ཏུ་ཨག་ཐམ་པ་དང་ལྔ་ནི་ལུས་དང་སྲོག་ལ་བབ་ཀྱང་གཅེས་སྤྲས་སུ་བྱའོ། གཉིས་པ་ཡན་ལག་གི་དམ་ཚིག་ལ་བཅུ་སྟེ། གཏི་མུག་དཔོན་གསས་ཀྱི་ཡན་ལག་ཡིན་ཏེ། རིག་པ་ལྷག་མཐོང་གི་སྙིང་པོར་གྱུར་པས་མི་སྤང་བ་དང༌། འདོད་ཆགས་གསས་མཁར་གྱི་ཡན་ལག་ཡིན་ཏེ། འདོད་དགུ་ལོངས་སྤྱོད་ཀྱི་གཞི་མར་གྱུར་པས་མི་སྤང་བ་དང༌། ང་རྒྱལ་སྔགས་ཀྱི་ཡན་ལག་ཡིན་ཏེ། འདུ་བྱེད་ལས་ཀྱི་སྙིང་པོ་ཡིན་པས་མི་སྤང་བ་དང༌། ཕྲག་དོག་སྤྱི་དམ་གྱི་རྩ་བ་ཡིན་ཏེ། གཉིས་མེད་ལས་ཀྱི་སྙིང་པོ་ཡིན་པས་མི་སྤང་བ་དང༌། ཞེ་སྡང་གསང་བའི་ཡན་ལག་ཡིན་ཏེ། ཨུ་ཡ་བ་དངོས་གྲུབ་ཀྱི་ཡན་ལག་ཏུ་གྱུར་པས་མི་སྤང་བ་དང་ལྔ་ནི། དུག་ལྔ་རང་ཁར་སྤྱད་པ་མ་ཡིན་ཏེ། དུག་ལྔ་ལྷ་ལྔ་སྐུ་ལྔ་ཡེ་ཤེས་ལྔར་བསྒྱུར་ལ་ཉམས་སུ་བླང་ངོ༌། བདུད་ཀྱི་བྱང་སེམས་དཀར་པོ་རྣམ་ཤེས་ཀྱི་བདུད་བཅོམ་ནས། སྟོང་པ་ཉིད་ཀྱི་ཡེ་ཤེས་སུ་གྱུར་པའི་བདུད་ཀྱི་ཆེན་པོ་ཡིན་པས་མི་སྤང་བ་དང༌། གསང་ཤ་གལ་ཆེན་གཟུགས་ཀྱི་བདུད་བཅོམ་ནས། མེ་ལོང་ལྟ་བུའི་ཡེ་ཤེས་སུ་གྱུར་པས་མི་སྤང་བ་དང༌། བདུད་ཀྱི་དྲི་ཆེན་འདུ་བྱེད་ཀྱི་བདུད་བཅོམ་ནས་མཉམ་ཉིད་ཡེ་ཤེས་སུ་གྱུར་བའི་བདུད་རྩི་ཆེན་པོ་ཡིན་པས་མི་སྤང་བ་དང༌། བདུད་ཀྱི་དྲི་ཆུ་འདུ་ཤེས་ཀྱི་བདུད་བཅོམ་ནས། བྱ་བ་གྲུབ་པའི་ཡེ་ཤེས་སུ་གྱུར་བའི་བདུད་ཀྱི་ཆེན་པོ་ཡིན་པས་མི་སྤང་བ་དང༌། བྱང་སེམས་དམར་པོ་ཚོར་བའི་བདུད་བཅོམ་ནས། སོ་སོར་རྟོགས་པའི་ཡེ་ཤེས་སུ་གྱུར་བའི་བདུད་ཀྱི་ཆེན་པོ་ཡིན་པས་མི་སྤང་བ་དང༌། དེ་ལྟར་ལྔ་ནི་ཐབས་ཀྱི་རོལ་པར་སྤྱོད། ཞལ་ཟས་ཐམས་ཅད་བདུད་རྩི་ལྔའི་རང་བཞིན་དང༌། དམུ་ཡད་ཀྱི་ལོངས་སྤྱོད་དུ་རོལ་པར་བྱའོ། གསུམ་པ་ཉིང་ལག་གི་དམ་ཚིག་ནི། མི་དགེ་བ་བཅུ་སྤང་ཞིང་དགེ་བ་བཅུ་བླང་བ་སྟེ། དེ་ཡང་ལུས་ཀྱི་སྲོག་གཅོད་པ་སྤངས་ཏེ། བྱམས་པས་གསོ་ལ་དག་བའི་དགེ་བ་དང་དུ་བླང་བ་དང༌། ངག་འཁྱལ་བ་སྤངས་ལ། ངག་ཞི་ལ་གསུང་སྙན་པར་སྨྲ་བ་དང༌། ཚིག་རྩུབ་མོ་སྤངས་ལ་ཚིག་ཞི་དལ་དུ་སྨྲ་བ་དང༌། ཕྲ་མ་སྤངས་ལ་ཀུན་དང་མཐུན་པར་སྨྲ་བ་དང༌། རྫུན་སྤངས་ལ་དྲང་པོ་སྒྲོས་སྐུར་མེད་པར་སྨྲ་བ་དང༌། ཡིད་ཀྱི་མངན་སེམས་སྤངས་ལ། བརྩེ་སེམས་གདུང་བར་སེམས་པ་དང༌། གཞན་ལ་གནོད་པའི་སེམས་སྤང་་ཞིང༌། ཀུན་ལ་ཕན་པའི་ཐུགས་རྗེས་སེམས་ཅན་ཀུན་བཟུང་བ་དང༌། ལོག་པར་ལྟ་བའི་སེམས་སྤངས་ལ། བདེན་པས་དོན་ལ་སྤྱོད་པའི་དགེ་བ་དྭངས་དུ་བླང་ངོ༌། བཞི་པ་ཁྱད་པར་གྱི་དམ་ཚིག་ལ་ལྔ་སྟེ། སྤང་བར་བྱ་བ་དང༌། གསང་བར་བྱ་བ་དང༌། བསྒྱུར་བར་བྱ་བ་དང༌། སྤྱད་པར་བྱ་བ་དང༌། མི་འདའ་བར་བྱ་བའི་དམ་ཚིག་གོ དང་པོ་སྤང་བ་ལ་ཉི་ཤུ་རྩ་གསུམ་ཡིན་ཏེ། དེ་ཡང་ཐུགས་རྗེ་ཉི་མའི་སྒྲོན་མེ་མི་བསྣུབ། ཅེས་བྱ་སྟེ། གཡུང་དྲུང་བོན་གྱི་བསྟན་པ་ལ་གནས་པར་བྱ། སེང་གེ་དཀར་མོའི་ལྟག་པ་མི་བཅག ཅེས་བྱ་སྟེ། དཔོན་གསས་བླ་མའི་སྐུ་མི་སྨད། ནོར་བུ་རིན་པོ་ཆེ་གཙུག་ནས་མི་འབོགས། ཅེས་བྱ་སྟེ། བླ་མའི་ཐུགས་མི་བཀོལ་༼དཀྲུགས༽། གཡུང་དྲུང་གཏམས་པའི་རྫོང་མི་བཤིག་ཅེས་བྱ་སྟེ། གཤེན་གྱི་དཀོར་ལ་མི་རླམ། མེ་རི་འབར་བའི་འོབས་མི་དབྲལ་ཞེས་བྱ་སྟེ། གསང་བའི་མཚམས་མི་དབྲལ། མེ་མ་མུར་སྟན་དུ་མི་བཏིང་ཞེས་བྱ་སྟེ། དཔོན་གསས་དང་སློབ་མའི་ཡུམ་མི་བསླད། ཤེལ་འཕྲེང་དཀར་པོའི་ཐག་པ་མི་བཅད་ཞེས་བྱ་སྟེ། ལྷ་མཆོད་ཀྱི་ནང་དུ་མཁོན་མི་སྒུག༼བྱ༽། གཡུང་དྲུང་སྣོལ་པའི་དབལ་ཟུར་མི་བཅག་ཅེས་བྱ་སྟེ། ཕྱག་རྒྱའི་དགྲ་ཟུར་མ་ཉམས་པར་བྱ། གཡུ་འབྲུག་སྔོན་མོའི་སྒྲ་མི་བཅག་ཅེས་བྱ་སྟེ། སྙིང་པོའི་སྒྲ་མི་བཅག། མུན་པའི་སྒྲོན་མེ་མི་བསད་ཞེས་བྱ་སྟེ། ཏིང་ངེ་འཛིན་ཕྱལ་བར་མི་བཏང༌། ཁྲོ་ཆུ་ཁོལ་མ་སྐོམ་དུ་མི་བཏུང་ཞེས་བྱ་སྟེ། ཚོགས་འདྲེས་པའི་ནོར་མི་རྐུ། དུག་དང་འདྲེས་པའི་ཟས་མི་བཟའ་ཅེས་བྱ་སྟེ། དགེ་སྡིག་འཆོལ་པར་མི་སྤྱད། འདོད་པ་དགུ་འགྱུར་གྱི་ནོར་མི་རྐུ་ཅེས་བྱ་སྟེ། ཟབ་མོའི་བཀའ་ལ་དཔེ་རྐུན་མི་བྱ། བདུད་རྩིའི་ཆུ་བོ་རྒྱུན་མི་བཅད་ཅེས་བྱ་སྟེ། ཚོགས་དང་མཆོད་པའི་རྒྱུན་མི་བཅད། ཤེལ་གྱི་སྐྲས་པ་འོབས་སུ་མི་སྐུར༼སྐྱུར༽་ཞེས་བྱ་སྟེ། དད་པ་ཅན་གྱི་ཚོགས་མི་བཅག རག་ཤ་སྲིན་པོའི་བུ་མི་གསོ་ཞེས་བྱ་སྟེ། སྡིག་པ་ཅན་གྱི་གྲོགས་མི་བསྟེན། ཟ་མ་ཏོག་དུ་དུག་མི་སྤྱོད་ཅེས་བྱ་སྟེ། མཆེད་ལྕམ་ནང་དུ་མི་སླད། ཐབས་དང་ཤེས་རབ་ཡ་མི་འབྲལ་ཞེས་བྱ་སྟེ། ཐུགས་ཀྱི་ཐིག་ལེ་དཀར་དམར་དུ་སྤྲོ། རི་རབ་ཀྱི་རྩེ་མི་བཤིག་ཅེས་བྱ་སྟེ། ཕའི་ལུས་ལ་ཐོ་མི་འཚམ། རྒྱ་མཚོའི་གཏིང་དུ་དུག་མི་སྤྱོད་ཅེས་བྱ་སྟེ། མའི་ལུས་ལ་མངལ་མི་སྤྱད། ཡི་དམ་གྱི་ལྷ་ལ་འཁོན་མི་བྱ། དམ་ཚིག་གི་ལྷ་ལ་དབྱེ་མི་བསྣོལ། ལས་ཀྱི་ལྷ་ལ་ར་ཆོད་མི་བྱའོ། གཉིས་པ་གསང་བར་བྱ་བ་ནི་དགུ་སྟེ། གནས་ནི་གསར་རྙིང་ཕྱོགས་མཚམས་མ་ལོག་པ། མཚན་དང་ལྡན་པ་ཨ་དཀར་ལོངས་སྤྱོད་རྒྱན་གྱི་གནས་ལྟ་བུ་དེ་གསང་ངོ༌། དུས་གསང་བ་ནི། ལོ་དུས་སྟག་སྤྲེལ་ཕག་སྦྲུལ་བཞི་ལ་འཇུག་ཅིང་ཐོན་པ་དེ་གསང༌། ཟླ་བའི་དུས་ར་བ་བཞི་ལ། ཞག་དུས་རབ་ལོ། འབྲིང་ཟླ་བ། ཐ་མ་ཞག་དུ་སྒྲུབ་པ་དང༌། ཟ་མའི་དུས། སྔ་གྲོ། དགོང་མོ། ཉིན་གུང་མཚན་གུང་བཞི་ལ་འཇུག་ཅིང་ཐོན་པ་དང༌། གཟའ་སྐར་གྱི་དུས་བཟང་ཞིང་དར་བ་ལ་འཇུག་ཅིང་ཐོན་པ་རྣམས་གསང་བའོ། ལྷ་གསང་བ་ནི་ཡི་དམ་གྱི་ལྷ་དང༌། ལས་ཀྱི་ལྷ་ལས་སོགས་འདི་ལྟ་བུ་ཡིན་ཞེས་གསང་ངོ༌། རྫས་གསང་བ་ནི་མཆོད་རྫས་དང་རྟེན་རྫས་བསྐང་རྫས་ལས་སོགས་པ་དོན་ཆེད་འདི་ལྟ་བུ་དགོས་ཞེས་གསང་བ་དང༌། རྟེན་གསང་བ་ནི་ཕྱི་རྟེན་གྱི་སྐོས་ལྔ་དང༌། ནང་རྟེན་གྱི་བཅུད་དགུ་དང༌། གསང་བའི་རྟེན་དྲུག་ལ་སོགས་འདི་ལྟ་བུའི་རྟེན་ཡིན་ཞེས་པ་གསང་བའོ། ལས་གསང་བ་ནི། ཞི་རྒྱས་དབང་དྲག་བཞིའི་ལས་གསང་བ་དང༌། རྒྱུ་རྐྱེན་གསང་བ་ནི་གདུང་བ་སྟོང་གི་སྙིང་ཁྲག་དང༌། རྔམ་པ་དགུའི་ལྟག་ཤ་དང༌། འབྲུ་སྣ་དགུའི་ངར་ཕྱེ་ལ་སོགས་གསང་ངོ༌། རྐྱེན་ནི་འཚོ་བ་ཟས་ཀྱི་རྐྱེན་དང༌། དུག་འཇོམས་སྨན་དང༌། དགྲ་ཟློག་མཚོན་དང༌། རྐྱེན་ཟློག་ཟང་ཟིང་ཡས་སྟེགས་ཀྱི་རྐྱེན་ལས་སོགས་པ་གསང་བའོ། འབྲས་བུ་གསང་བ་ནི། དུས་འདིེར་ཐོབ་པའི་འབྲས་བུ་ཚེ་རིང་ནད་མེད། བཙན་ཕྱུག་བཀྲ་ཤིས་ཡིད་འོང་མཐུ་བྱིན་ལྡན་པ་རྣམས་ཐོབ་པས་དབང་མ་ཐོབ་པ་ལ་གསང་བ་དང༌། ཕྱི་མར་ཐོབ་པ་མཐར་མཐུག་གི་འབྲས་བུ་ཕྱག་རྒྱ་ཆེན་པོ་རིག་འཛིན་གྱི་ས་ཐོབ་པ་དང༌། སར་ཆུད་པ་དང༌། སར་གྲོལ་བ་དང༌། སྨིན་པ་ཕྱིར་མི་ལྡོག་པའི་ས་ནོན་པ་ལ་སོགས་པ་གསང་བའོ། རྟགས་གསང་བ་ནི། དངོས་དང་ཉམས་དང༌། རྨི་ལམ་ལ་སོགས་པ་མཆོག་དང་ཐུན་མོང་ལ་སོགས་ཀྱི་རྟགས་རབ་འབྲིང་གང་ཡང་གསང་བ་དང་དགུའོ།

 གསུམ་པ་བསྒྱུར་བར་བྱ་བ་ལ་ལྔ་སྟེ། སྟོང་གསུམ་ལྷའི་གཞལ་ཡས་ཁང་དུ་བསྒྱུར་བ་དང༌། ཁམས་གསུམ་ལྷ་དང་ལྷ་མོར་བསྒྱུར་བ་དང༌། དུག་ལྔ་ཡེ་ཤེས་ལྔ་རུ་བསྒྱུར་བ་དང༌། དུག་གསུམ་སྐུ་གསུང་ཐུགས་དང་མཁའ་ཀློང་དབྱིངས་གསུམ་དུ་བསྒྱུར་བ་དང༌། ཕུང་པོ་བཅིང་གྲོལ་ལྷའི་ཕྱག་རྒྱར་བསྒྱུར་བའོ། བཞི་པ་སྤྱད་པར་བྱ་བ་ལ་ལྔ་སྟེ། མཚན་ལྡན་གྱི་རྒོད་ལྕམ་ལ་ཐབས་ཤེས་རབ་ཀྱི་རོལ་པར་སྤྱད་པ་དང༌། བདུད་རྩི་རྣམ་པ་ལྔ་ལ་ལྟ་བ་ཡེ་ཤེས་ཀྱི་རོལ་པར་སྤྱད་པ་དང༌། མཆོད་པ་དང་གཏོར་མ་ལ་སོགས་དབྱིངས་སུ་མཆོད་ཅིང་དངོས་གྲུབ་ཀྱི་ཞལ་ཟས་ཟད་མེད་གཡུང་དྲུང་གི་ལང་ཚོར་སྤྱད་པ་དང་ལྔའོ། ལྔ་པ་མི་འདའ་བའི་དམ་ཚིག་ནི། ཐུགས་རྗེ་དྲང་རྒན༼མཁན༽་གྱི་བཀའ་མི་འདའ་ཞེས་བྱ་སྟེ། བསྙེན་སྒྲུབ་ཡི་དམ་གྱི་ལྷ་ཡིས་མ་ཁྲེལ་བ་དང༌། ཁྱུང་མཆོག་རླབས་པོ་ཆེའི་དཔུང་ལས་མི་འདའ་ཞེས་བྱ་སྟེ། སྤྱོད་པ་ལྷ་སྲིན་དྲེགས་པས་མ་ཁྲེལ་བ་དང༌། སྤུ་གྲི་ནགས་ཚལ་གྱི་སོ་མི་འདའ་ཞེས་བྱ་སྟེ། སེམས་བསྐྱེད༼ཅན༽་སོ་སོ་སྐྱེ་བོས་མ་ཁྲེལ་བ་དང༌། ཐུགས་རྗེ་ཉག་ཐག་གི་རྒྱང་ལས་མི་འདའ་ཞེས་བྱ་སྟེ། བརྩེ་གདུང་ལྷ་དང་མཆེད་ལྕམ་གྱིས་མ་ཁྲེལ་བ་དང༌། ཡེ་སྲིད་རྒྱལ་པོའི་བཀའ་མི་འདའ་ཞེས་བྱ་སྟེ། རྩ་བ་རང་སེམས་ཀྱིས་མ་ཁྲེལ་བར་བསྲུང་བ་དང་ལྔའོ། དམ་ཚིག་དེ་དག་ཐམས་ཅད་ཀྱང་བསྡུས་ན། སྐུ་གསུང་ཐུགས་ཀྱི་དམ་ཚིག་གསུམ་ལ་འདུས་ཏེ། སྐུའི་དམ་ཚིག་མི་སྤང་ཞིང༌། གསུང་གི་དམ་ཚིག་རྒྱུན་མི་བཅད། ཐུགས་ཀྱི་དམ་ཚིག་མ་ཡེངས་པའི། ཞེས་གསུངས་པ་དང༌། རྩ་རྒྱུད་ཉིད་ལས་ཀྱང༌། རྩ་བ་ཡན་ལག་དུ་མར་གསུངས་ཀྱངརྩ་བའི་ནང་འདི་ལྟར་གསལ༌།རྩ་བ་ཡན་ལག་ཅི་སྨྲོས་ཀྱང༌། ལུས་ངག་ཡིད་དང་གསུམ་པོ་ནི། ཉེས་པ་ཀུན་གྱི་རྩ་བ་ཡིན་ཞེས་གསུངས་པའོ། ལྔ་པ་བསྲུང་ཐུབ་ཀྱི་སྐྱོན་ཡོན་ལ་གཉིས་ལས། དང་པོ་ཉམས་པའི་སྐྱོན་ནི། ལུས་ཀྱི་དམ་ཚིག་མ་ཐུབ་སྟེ་ཉམས་ན། འདིར་ཡང་ཚེ་ཐུང་ནད་མང་དབུལ་ཞིང་འཕོངས་པར་འགྱུར་ལས༼ལ༽། དེས་བྱས་ནས་ཕྱི་མར་མི་ཁོམ་པའི་གནས་བརྒྱད་ལྟ་བུར་ལྷུང་ཞིང༌། མཐར་ངན་སོང་གསུམ་པོ་ཉམས་སུ་མྱོང་བར་འགྱུར་རོ། ངག་གི་དམ་ཚིག་མ་ཐུབ་སྟེ་ཉམས་ན། འདིར་ཡང་ངག་གི་ནུས་པ་ཟད་ཅིང༌། སྨྲས་ཚད་ལོག་པར་འགྱུར་པ་དང༌། དེས་བྱས་ནས་ཕྱི་མར་ཡང་ངག་གིས་མི་དགེ་བ་སྤྱོད་པ་དང། ལྐུགས་དང་མི་བདེན་པ་སྨྲ་བའི་རྟེན་དུ་གྱུར་ཏེ། མཐར་དམྱལ་བ་ནས་ལྕེ་ལ་ཞིང་རྨོ་བའི་གནས་སུ་སྐྱེས་ནས་སྦྱོང་བར་འགྱུར་རོ། ཡིད་ཀྱི་དམ་ཚིག་མ་ཐུབ་སྟེ་ཉམས་ན། འདིར་ཡང་བསམ་པ་མི་འགྲུབ་ཅིང་དབང་པོ་མི་གསལ་བ་དང༌། སྙིང་རླུང་ཅན་ལ་སོགས་སུ་འགྱུར་ལ། དེས་བྱས་ནས་ཕྱི་མར་ཡང་བསམ་པ་མི་འགྲུབ་ཅིང༌། སྟབས་བསྣོལ་ལ་སོགས་པ་ཁོ་ནར་འགྱུར་ལ། མཐར་བྱོལ་སོང་དང༌། དམྱལ་བ་ལ་སོགས་ཀྱི་སྡུག་བསྔལ་ཉམས་སུ་མྱོང་བར་འགྱུར་བ་སྟེ། དམ་ཚིག་ཉམས་པའི་སྔ་ལྟས་ནི། འདི་རུ་མི་བདེ་སྣ་ཚོགས་འབྱུང། ཕྱི་མར་མནར་མེད་དམྱལ་བར་སྐྱེ། ཞེས་གསུངས་པས་སོ། གཉིས་པ་བསྲུང་པའི་ཡོན་ཏན་ལ། ལུས་ཀྱིས་མ་ཉམས་པ་ཐུབ་ན། འདིར་ཡང་ཚེ་རིང་ནད་མེད་དཔལ་དང་འབྱོར་པ་ཕུན་གསུམ་ཚོགས། དེས་བྱས་ནས་ཕྱི་མར་དལ་འབྱོར་ཁྱད་པར་ཅན་གྱི་རྟེན་ཐོབ་ནས། མཐར་ཡང་འགྱུར་བ་མེད་པ་གཡུང་དྲུང་གི་སྐུ་ཐོབ་པར་འགྱུར་རོ། ངག་གི་མ་ཉམས་ཏེ་ཐུབ་ན་འདིར་ཡང་ཅི་སྨྲས་བདེན་པ་དང༌། གཞན་ལ་བཀའ་གཉན་པ་ལ་སོགས་ངག་གི་ནུས་པ་དང་ལྡན་ཅིང༌། དེས་བྱས་ནས་ཕྱི་མར་ཡང་ངག་གི་ཡོན་ཏན་དུ་མ་དང་ལྡན་ནས། མཐར་རང་བཞིན་མེད་པའི་གསུང་ཐོབ་པར་འགྱུར་རོ། ཡིད་ཀྱི་མ་ཉམས་ཏེ་ཐུབ་ན། འདིར་ཡང་ཅི་བསམ་འགྲུབ་ཅིང་རྟོགས་པའི་མཆོག་ཏུ་འགྱུར་ལ། དེ་བྱས་ནས་ཕྱི་མ་ལ་ཡང༌། ཡིད་ཀྱི་ཡོན་ཏན་དུ་མ་དང་ལྡན་ཅིང༌། མཐར་འཁྲུལ་པ་མེད་པའི་ཐུགས་ཐོབ་པར་འགྱུར་རོ། དྲུག་པ་དམ་ཚིག་གི་རང་བཞིན་ནི། སེམས་ཡེ་ནས་ཀུན་ཏུ་བཟང་པོའི་དོན་རྟོགས་ན། ཡེ་བསྲུང་ཆེན་པོར་འགྱུར་བས། བསྲུང་མཚམས་ཀྱི་སྐྱོན་ཡོན་དང་བྲལ་བ་སྟེ། སེམས་གཡུང་དྲུང་འཆི་མེད་སྐྱེས་ན་བརྩན་ལ། སྲོག་ཅེས་བྱ་བ་ཡང་མེད་ལ། དེ་མེད་པས་སྲོག་བཅད་དུ་ཡང་མེད་པས། བསད་གསོ་གཉིས་མེད་ཀྱི་དམ་ཚིག་ཅེས་བྱའོ། འདོད་དགུ་རང་ལ་བྱུང་ཙམ་ན། དེ་ཡིས་གཞན་ལ་བྱིན་པ་ཡང་མེད་ལ། ཐམས་ཅད་རང་ལ་བྱུང་བས་བླངས་པ་མེད་པས་སྦྱིན་བླང་གཉིས་མེད་ཀྱི་དམ་ཚིག་ཅེས་བྱའོ། བོན་ཐམས་ཅད་སྒྱུ་མའི་དཔེ་བརྒྱད་ལྟ་བུ་མིང་དང་ཚིག་དུ་བཏགས་པ་ཐམས་ཅད་མ་ངེས་ཏེ་ཀུན་རྫོབ། དོན་དམ་པར་ཀུན་རྫོབ་ལ་རང་བཞིན་མེད་པ་བདེན་རྫུན་གཉིས་མེད་ཀྱི་དམ་ཚིག་ཅེས་བྱའོ། ཀུན་ཏུ་བཟང་པོ་ཐུགས་ཆགས༼པ༽་མེད་པའི་དོན་ལ་གནས་ཏེ། ཐབས་ཆེན་རོལ་པས་ཆགས་སྡང་གཉིས་མེད་ཀྱི་དམ་ཚིག་ཅེས་བྱའོ། དམ་ཚིག་གི་ངེས་ཚིག་ནི། དམ་ནི་གསས་མཁར་གྱི་སྤྱི་དམ་ལས་མི་འདའ་བས་དམ། ཚིག་ནི་བསྲུང་ན་ལས་དང་སྒྲིབ་པ་ཚིག་ལ། མ་བསྲུང་ན་རང་གི་རྒྱུད་ཚིག་པའོ། དེ་ལྟར་རྩ་བཞི་རང་སར་གྲོལ་ནས་ཁྱད་པར་ཆེན་པོ་ངོ་མཚར་ཆེ་བས་ན་མཆོག་ཅེས་བྱའོ། གསུམ་པ་གསང་མཚན་ནི་རྒྱས་པར་གོང་དུ་བསྟན་པ་ལྟར་རོ། གསུམ་པ་རྙིང་པ་བསྣན་པ་ནི། དམ་ཚིག་རྙིང་པ་ལ་ཡི་དམ་བསྲེ་བ་དང༌། གསང་མཚན་བཏགས་པས༼པ༽་གཉིས་མི་དགོས་ཀྱིས་གཞན་རྣམས་སྔར་དང་འདྲ་བས་གསེར་ལ་བརྩི་བསྣན་པ་དང་འདྲ་བས་ཡོན་ཏན་གོང་ནས་གོང་འཕེལ་དུ་འགྱུར་རོ། གལ་ཏེ་ཉམས་པ་ཅན་ཡོད་ན་ཚོགས་དང་བཤགས་པ་བྱས་ལ་བསྐྱར་རོ། དེ་ལྟར་གསང་སྔགས་དབང་ཆེན་ངོ་མཚར་རྒྱས་པའི་འཇུག་ཆོག་བསྲེ་བསྣན་རྒྱས་མིན་བསྡུས་པ་ཡི་གེར་བཀོད། དགེ་དེས་འགྲོ་བ་གསང་སྔགས་མཆོག ལམ་བགྲོད་རྫོགས་སངས་རྒྱས་པར་ཤོག གསང་སྔགས་ལམ་གྱི་འཇུག་ཆོག་མུ་ཏིག་འཕྲེང་བ་ཞེས་བྱ་བ། འ་ཞྭ་བློ་གྲོས་རྒྱལ་མཚན་ལ་མེ་ཉག་བསོད་རྒྱལ་གྱི་སྐུལ་ཏེ་སྦྱར་ལ་འདུས་པར་བཀོད་པ་རྫོགས་སོ། འདི་ལ་བློ་གྲོས་ཀྱིས་བཀོད་པ་ལས། སེམས་བསྐྱེད་རྗེས་སུ་འདུག་པ། གོ་རྗེས་ཤིང་སྐྱབས་འགྲོ་རྗེས་སུ་བྱས་ཤིང༌། ཕྱི་ནང་གི་ཁྲུས་གཉིས་དང་གསང་མཚན་དང་མིང་གི་དབང་བསྐུར་སྒོ་དབྱེ་སོགས་ལོགས་སུ་བླང་མི་དགོས་པར། ཡང་སྟོན་དཔལ་བཟང་བདག་གི་རྒྱུད་ལུང་དང་མི་འགལ་བར་བཅུག་ནས་ཁྲིགས་ཅན་བྱས་ཡོད། དགེའོ། བཀྲ་ཤིས།།