བསྐལ་བཟང་ཉི༵་མ༵་ཤར་བ་བླ་མའི་དྲིན།

ཀུན་ཏུ་བཟང་པོ་རིག་སྣང་འོད་ཀྱི་རྒྱལ།

གདུལ་དཀའ་སྙིགས་མའི་འགྲོ་བ་འདུལ་བའི་སླད།

བྱ་ཁྱུང་ཀ་ར་ན་རུ་སྤྲུལ་ནས་སུ།

ལྷོ་གླིང་འཛིན་མའི་ས་ཆེན་འདི་རུ་བབས།

དེ་དུས་ཁྱུང་གི་སྟོན་པ་རྣམ་གསུམ་ཞེས།

ཞང་ཞུང་བྱར་ཐོགས་རྒྱལ་པོ་བཅོ་བརྒྱད་ཀྱིས།

སྤྱན་དྲངས་མཆོད་པའི་ཞིང་དུ་བཀུར་བའི་ཚེ།

བོན་སྲིད་ཉི་ཟླའི་སྣང་བས་ས་ཆེན་འགེངས།

དེ་རྗེས་ལྷ་སྲས་སྤུ་ལྡེ་གུང་རྒྱལ་གྱིས།

ཞང་ཞུང་གཤེན་བསྟན་དར་བའི་ཞིང་ཁམས་ནས།

སྟོན་པ་ཆེན་པོ་ཁྱུང་ནག་མུ་ཁྱུང་རྒྱལ།

བོད་ཡུལ་གངས་རིའི་ཞིང་དུ་ཆིབས་ཁ་བསུས།

དེ་ཡི་རྒྱུད་འཛིན་གསེར་རིའི་ཕྲེང་བ་ཡིས།

བོད་རྒྱལ་བཙན་པོ་རིམ་གྱི་བླ་མཆོད་མཛད།

ལུགས་གཉིས་མཛད་པས་བོད་འབངས་བདེ་ལ་བཀོད།

དམ་པ་ཁྱུང་ཞེས་མཚན་སྙན་སྲིད་རྩེར་ཁྱབ།

དེ་ཉིད་གདུང་འཛིན་རྨ་མེད་ལྷ་ཡི་སྲས།

ལྷ་གཉེན་མགོན་ཞེས་ཆེན་པོ་ཧོར་ཡུལ་ནས།

སྤུ་བླ་བྱང་རྩེ་སྒང་གི་ཡུལ་གྲུ་རུ།

བྱོན་ཚེ་ཀུན་གྱིས་ཡུལ་དེའི་བསྟན་བདག་བཀུར།

ཐོག་སེར་མཚོན་གྱི་འཇིགས་པ་མི་མངའ་བའི།

རྒྱལ་བའི་སྲས་པོ་ཁྱུང་རྒོད་ཐོག་རྡུག་དང་།

སྤྲུལ་པའི་སྐུ་མཆོག་ས་ལེ་རང་གྲག་སོགས།

མཁས་དང་གྲུབ་པའི་སྐྱེས་མཆོག་ཚར་དུ་དངར།

དེ་འདྲའི་ཐུན་མིན་ཡོན་ཏན་སྟོང་ལྡན་པའི།

ཁྱུང་ནག་སྤུ་བླའི་གདན་རབས་རིམ་བྱོན་གྱི།

རེ་རེའི་མཛད་པའི་རྣམ་ཐར་ནམ་མཁའི་མཐའ།

བློ་དམན་སྒམ་ཁྱེར་གཤོག་པའི་རྩལ་གྱིས་མིན།

འདི་ན་དེང་འདིར་མཚན་ལྡན་བླ་མ་རྗེའི།

སྐུ་ཚེའི་མཛད་འཕྲིན་ནམ་མཁའི་མཐའ་ལ་འགྲན།

ཆབ་འབངས་ཡུལ་ལུང་ཞི་བདེའི་དཔལ་ལ་རོལ།

གཙུག་ལག་ཁང་ཆེན་བཞེངས་གྲུབ་སྐལ་པ་བཟང་།

འདི་འདྲའི་རྟེན་འབྲེལ་སུམ་བརྩེགས་གཅིག་ཅར་དུ།

བདག་ཅག་བསོད་ནམས་དཔལ་དུ་ཤར་བའི་ཡིས།

བཀྲ་ཤིས་ཁ་གཡང་བརྗོད་ལ་དང་རེ་སྤྲོ།

བདེ་ལེགས་བྲོ་གར་བརྡུང་ལ་ཡིད་རེ་དགའ།

ལྷག་ཏུ་གནས་མཆོག་སྤུ༵་རྒྱལ་གངས་བཟང་འདབས།

རྗེ་བཙུན་བླ༵་མའི་མཛད་འཕྲིན་སྔར་བས་རྒྱས།

མ༵དོ་སྔག༵ས་བཤ༵ད་སྒྲུ༵བ་བསྟན་པ་སྔར་བས་དར།

བསྐལ་བཟང་ཉི༵་མ༵་ཤར་བ་བླ་མའི་དྲིན།

འདི་འདྲ་བསམ་ཚེ་ལུས་ཀྱི་བ་སྤུ་ལྡང་།

ངག་ནས་སྙན་པའི་གླུ་ཆུང་ལྷོད་ཀྱི་ཤོར།

ཡིད་ནས་དགའ་བའི་རྦ་རླབས་མཁའ་ལ་འཕྱུར།

ད་ནས་འདི་བཞིན་བསྐལ་པར་འཚོ་གྱུར་ཅིག