‘‘མི་གོ་བ་ཅན་ལ་ཚིག་གཅིག’’

འཇིགས་རུང་རྩུབ་མོའི་མཚོན་རྩེ་སྐུ་ལ་གཏད་ཚེ།།

ཞི་དུལ་བརྩེ་བའི་འཛུམ་གྱིས་ལེགས་སྐྱེས་ཕུལ་ཏེ།།

སྟོབས་ཆེན་བདུད་རིགས་མཐའ་དག་འཁོར་དུ་བསྡུས་པའི།།

ཐབས་མཁས་ཐུགས་རྗེ་ཅན་དེ་གང་ན་བཞུགས་སམ།།

འདི་ན་ནགས་ཚལ་ཁྲོད་ཀྱི་རྔམ་ཆེན་སྟག་མོ།།

མི་ཁྲག་དམར་འཇང་བྱེད་པའི་ཧམ་སེམས་དེ་ཡིས།།

ངར་སྒྲས་རི་ཀླུང་བཀང་བའི་ཚུལ་དེ་གཟིགས་ན།།

སྐྱོ་བའི་སྤྱན་ཆབ་མི་འཆོར་རང་དབང་ཡོད་དམ།།

མཐོང་ཐོས་གཟུགས་སྟོབས་ཞན་པའི་བློ་ཆུང་རི་བོང་།།

ཡ་ཀའི་ཨ་སྔོན་གནམ་དེ་དེབ་ཀྱིས་དོགས་ནས།།

དོན་མེད་སྐད་ཅོར་རྒྱབ་པའི་བྱས་ཉེན་དེ་ཡིས།།

ལྷ་ཀླུ་གཞི་བདག་ཐམས་ཅད་ཁྲག་བཞིན་དཀྲུགས་སོང་།།

ཁྲེལ་མེད་གཡོ་སྒྱུ་ཅན་གྱི་མིག་སེར་འུག་པས།།

ཉིན་བྱེད་ནུབ་རིར་བཞུད་པའི་སྐབས་དང་བསྟུན་ཏེ།།

ཉམ་ཆུང་བྱ་རོག་འགྲོ་བའི་ཤུལ་ལམ་བཀག་དུས།།

རེ་བ་ལྷ་ལ་བཅོལ་ཡང་དོན་འབྲས་མ་སྨིན།།

ཁ་མཛེས་ཁོག་ནག་ཅན་གྱི་སྒམ་འཁྱེར་ཕ་ཝང་།།

བྱ་བརྒྱའི་མདུན་མ་གླེང་སའི་གྲོས་རར་སླེབས་དུས།།

ལྷག་བསམ་སྤྱི་སེམས་ཅན་གྱི་གདོང་འབག་གྱོན་ནས།།

ཉེས་མེད་སྒུམ་ཐུས་ཤིག་ལ་ཆད་པ་བཀལ་སོང་།།

ལྟས་ངན་ཁྭ་ཏ་རོག་པོའི་ཨག་སྐད་ཚ་བོས།།

སྒོམ་ཆེན་ཏིང་འཛིན་མལ་ནས་བཙན་ཕུད་བྱས་སོང་།།

ཕྲག་དོག་རྒྱ་མཚོའི་རྦ་རླབས་འཕྱུར་ཐེངས་གཅིག་གིས།།

རེ་བའི་ཕ་མཁར་དམར་པོ་རྨིང་ནས་བསྒྱེལ་སོང་།།

བློ་སྙིང་བྲང་གསུམ་གཏད་སའི་རི་རྒྱལ་མགུལ་ནས།།

ངམ་ནག་ཤྭ་འོད་དྲག་པོ་ཐོལ་གྱིས་བརྡོལ་ཏེ།།

སེམས་ཀྱི་བུ་ཆུང་འཁོར་སའི་གནས་གཞི་བརླགས་དུས།།

འདས་ལམ་ཕྱི་མིག་ཅེར་བཞིན་ཡི་ག་ལྡོག་སོང་།།

ཕྱི་མཛེས་འཇའ་ཚོན་བཀྲ་བའི་ཨ་བུ་ནེ་ཙོ།།

མ་ཏྲི་འུར་འདོན་བྱེད་པའི་བར་གསེང་རྣམས་སུ།།

འབུ་སྲིན་བསྟུན་མར་ཟ་བའི་ཚུལ་དེ་མཐོང་དུས།།

རྣམ་རྟོག་རི་བོ་ལྟ་བུ་ཐོལ་གྱི་ལྡང་བྱུང་།།

སྤྲིན་པ་ཅི་ཡང་མེད་པའི་བར་སྣང་དབྱིངས་ནས།།

ངར་ཆེན་འབྲུག་མོ་ཁྲོས་པའི་གད་རྒྱང་ཐོས་དུས།།

ལྷ་འདྲེ་གང་རུང་ཞིག་གི་ཆོ་འཕྲུལ་ཙམ་ལས།།

ཐོག་སེར་མགོ་ལ་ཁེལ་བའི་འཇིགས་སྣང་མ་བྱུང་།།

ལྷག་རླུང་གྲང་རེག་རྒོད་པའི་དགུན་གཞུང་ཞིག་ལ།།

མདངས་མཛེས་མེ་ཏོག་རྐང་གཅིག་ཧུབ་ཏེ་སྐྱེས་ཚེ།།

ཀླུ་བདུད་གདོལ་པ་འགྲས་པའི་སྔ་ལྟས་ཙམ་ལས།།

ལྷ་ལ་མཆོད་པ་འབུལ་བའི་རེ་བ་མ་བྱུང་།།

དམར་ནག་གྲ་ལོ་རྒྱས་པའི་ཝ་མོའི་མཇུག་མ།།

རྐྱེན་བཟང་རླུང་དང་འཕྲད་ཚེ་སྦོམ་མདོག་ཁ་ཡང་།།

ལན་གཅིག་ལག་ཏུ་འཆང་བའི་རང་གཤིས་གསོན་པོ།།

བསམ་བཞིན་སྤོབས་པ་ཞུམ་པའི་གོ་སྐབས་མ་བྱུང་།།

གངས་ཁྲོད་ལྷོད་པོར་འགྱིངས་བའི་སེང་ཆེན་དར་མ།།

ང་རྒྱལ་རལ་པ་མཐུག་པོས་མིག་གཉིས་སྒྲིབ་ནས།།

སྔ་ཕྱིའི་ལམ་བུ་མ་མཐོང་གཡང་ལ་མཆོང་ན།།

སྙིང་རྗེས་སྤྱན་ཆབ་འཆོར་བའི་གྲོགས་ཤིག་ཡོད་དམ།།

ལས་འབྲས་སྒྲུང་དུ་རློམས་པའི་སྤྱི་ཚོགས་འདི་ན།།

ལྷ་བདུད་འདྲེས་མའི་ཆོ་འཕྲུལ་སྣ་ཚོགས་ཤིག་གིས།།

མགོ་བོ་རྨོངས་སུ་འཇུག་པའི་གནས་ཚུལ་མཐའ་དག །

བྲིས་ན་གླེགས་བམ་བྲག་རིའི་དཔང་ལས་མཐོ་བ།།

ཇི་སྲིད་ཉོན་མོངས་ཆུ་རྒྱུན་མ་ཆད་བར་དུ།།

དེ་སྲིད་རྣམ་རྟོག་རླབས་ཕྲེང་རྫོགས་མཐའ་མེད་པ།།

འཇིག་རྟེན་འཁོར་བ་འདི་ཡི་གཤིས་སུ་སྣང་བས།།

མཐའ་དག་བདེན་པར་འཛིན་པ་སྨྱོ་བའི་རྒྱུ་ཡིན།།

ཞེས་སྤུ་བླ་གཡུང་སྐལ་དུ་འབོད་པས་མཐོང་ཐོས་ཀྱི་རྣམ་པ་དུ་མ་ཡིད་ལ་བྱས་ཏེ་རང་གནས་གཉིས་པ་བདེ་ལྡན་བསིལ་བ་ཚལ་གྱི་དབེན་གནས་སུ་བྲིས་པ་ཐ་ཚན་མུ་ཙུག་སྨར།  ཝེར་གྱེར་རོ།