ཡིད་སྐྱོ་བའི་ནང་དམེ་མཚམས་འཇོག་གྱིས།

དགུན་ཟླ་གསུམ་རྩ་བའི་བླ་མའི་མདུན།།

བོན་སྔོན་འགྲོ་དངོས་གཞིའི་མཆེད་གྲོགས་དེ།།

དཔྱིད་ཟླ་གསུམ་དབྱར་རྩྭ་འབུ་སྒྲུག་དུས།།

ཁྲེལ་ངོ་ཚ་མེད་པའི་དགྲ་བོ་རེད།།

དབྱར་ཟླ་གསུམ་བཙོན་ཁང་སྨན་ཁང་ནང་།།

རྒྱུ་སྒོར་མོའི་འགྲོ་སོང་བཏང་བཏང་ནས།།

དགུན་ཟླ་གསུམ་ཕ་མ་ནང་མི་རྣམས།།

དཔལ་བདེ་སྐྱིད་ཀྱི་འཚོ་བ་རླུང་ལ་བསྐུར།།

ཡུལ་མི་གཅིག་ས་མཐའི་འཁྱམས་པོ་ཀུན།།

གྲོགས་ཚོང་ཤག་ཟེར་ཞིང་རྒྱབ་དཔུང་འཁྲིད།།

ནང་ཁྱིམ་མཚེས་རུ་སྡེའི་འགྲིམས་ལམ་ན།།

མཚོན་མདའ་གྲི་བཟུང་ནས་འགག་སྒོ་བཀག  །

ལྷ་བླ་མ་གཅིག་གི་དགེ་ཕྲུག་དང་།།

མགོན་སྟོན་པ་གཅིག་གི་རྗེས་འཇུག་གཉིས།།

ཐབས་བསྟན་པ་གཅིག་གི་སྒོར་ཞུགས་གསུམ།།

ཡིད་སྐྱོ་བའི་ནང་དམེ་མཚམས་འཇོག་གྱིས།།

གངས་རིའི་ལྗོངས་ཀྱི་གཞས་པ་ཞིག་གི་རེ་དོན་ལྟར་རང་ཤག་ཏུ་མགྱོགས་པར་བྲིས།