ཐམས་ཅད་རྫོགས་སངས་རྒྱས་པའི་ཐབས་དམ་པ།

ལོ་རབས་ཁྲི་ཡི་ལོ་རྒྱུས་གཟི་འོད་འཕྲོ།།

ཁྱད་འཕགས་ལམ་འབྲས་དུ་མའི་ཁྱད་བོན་གསལ།།

རྣམ་འདྲེན་གཤེན་གྱི་དགོངས་གཏེར་ཟབ་མོ་ཆེ།།

གྲུབ་མཐའི་རྒྱལ་པོ་གཡུང་དྲུང་བོན་བསྟན་རྒྱལ།།

འཕགས་མཆོག་ཐུབ་དབང་གཞོན་ནུའི་ཐུགས་དམ་མཐིལ།།

བོད་ཡུལ་གངས་རིའི་ཞིང་དུ་དྲངས་པ་ལས།།

མཚོ་སྐྱེས་རྒྱལ་བའི་ལུགས་བཟང་གཙོར་འཛིན་པའི།།

སྔ་འགྱུར་རྙིང་མའི་རིང་ལུགས་གུས་པའི་གནས།།

ཐུབ་པའི་ལྟ་དགོངས་སྤྱི་དང་ཁྱད་པར་དུ།།

ས་ཆེན་གོང་མའི་ཐུགས་བཞེད་སྙིང་པོའི་ནོར།།

ཀྱེེ་རྡོར་ལམ་འབྲས་ཉམས་བཞེས་སྲོལ་བཟུང་བའི།།

དཔལ་ལྡན་ས་སྐྱའི་པ་ཡང་བསྔགས་པར་འོས།།

ནཱ་རོ་པ་སོགས་པཎ་གྲུབ་དུ་མ་ནས།།

བརྒྱུད་པའི་བྱིན་རླབས་མ་ཉམ་ཆོས་དྲུག་གི།།

ཐུན་མིན་དགོངས་འཐིལ་གཙིགས་སུ་བཟུང་བ་ཡི།།

འགྲོ་མགོན་བཀའ་རྒྱུད་པ་ཡང་ཕྱག་གི་ཡུལ།།

ཤག་ཀྱཱའི་བཀའ་དགོངས་ཚང་ལ་མ་ནོར་བ།།

འདུལ་བ་མདོ་ཡི་འཆད་ཉན་ལྷུར་བཞེས་ཤིང་།།

ངུར་སྨྲིག་འཛིན་པའི་སྡེ་ཚོགས་ཆེས་འཕེལ་བའི།།

རི་བོ་དགེ་ལྡན་པ་ཡང་མཆོད་པའི་གནས།།

དཔལ་ལྡན་དུས་ཀྱི་འཁོར་ལོའི་བཤད་སྲོལ་སྲོག །

ཉམ་མེད་འཛིན་པའི་རྒྱལ་བ་ཇོ་ནང་དང་།།

གཞན་ཡང་ཞི་བྱེད་བཀའ་གདམ་བོ་དོང་སོགས།

ཐམས་ཅད་རྫོགས་སངས་རྒྱས་པའི་ཐབས་དམ་པ།།