ལོ་ཟླ་དུས་ཀྱི་མཆོད་པའི་འབྲས་བུ།

ཤར་ལྷོ་ནུབ་བྱང་ལྷ་འདྲེའི་རྒྱུག་ལམ་མང་ཞིང་།།

ཤར་ནུབ་མི་རིགས་གཞན་གྱིས་ཡིད་སྨོན་འཆོར་བའི།།

ཤར་ཕྱོགས་ཞི་བདེའི་སྙིང་དབུས་གངས་རིའི་ཞིང་ཁམས།།

ཤར་གྱི་ཉི་མ་དྲོན་པོའི་འོད་ཐིགས་སྡད་ཡོད།།

ས་ལ་སྔར་མེད་གཏེར་གྱི་ནོར་རྫས་ཐོན་སོང་།།

ཕྱུགས་ལ་སྔར་མེད་སྟོབས་ཀྱི་ཤ་ཤེད་རྒྱས་སོང་།།

མི་ལ་སྔར་མེད་འཚོ་བའི་ལོངས་སྤྱོད་འཛོམས་སོང་།།

ཞིང་ལ་སྔར་མེད་ལོ་ཐོག་འཕེལ་ཁ་དར་སོང་།།

ཕོ་གསར་དཔུང་པ་སྦོམ་པོས་འཇོན་ནས་མ་རེད།།

སྨན་ཤར་སྣང་བ་མཐོ་པོས་འཛངས་ནས་མ་རེད།།

གཞུང་སའི་སྐུ་ངོ་རྫིག་པོས་བྱམས་ནས་མ་རེད།།

ང་ཡིན་ཁོ་ཡིན་གཏམ་གྱིས་བྱས་ཡུས་མ་བགྲང་།།

དཀར་དམར་མེ་ཏོག་བཀྲ་བའི་དབྱར་གཞུང་སླེབས་ཚེ།།

རྣམ་རྒྱལ་སྟོང་མཆོད་ཕུལ་ཞིང་གཏེར་བུམ་སྦས་པ།།

ཁ་བ་བུ་ཡུག་འཚུབ་པའི་དགུན་དུས་སླེབས་ཚེ།།

ཞི་ཁྲོ་ཁྲི་མཆོད་བླུག་ཅིང་ལྷ་ངོ་བསྟོད་པ།།

དུས་བཞི་ངེས་པ་མེད་པའི་བར་གསེང་རེ་ལ།

ཀུན་རིག་ལས་བཞིའི་རྒྱུན་ལྔའི་སྦྱིན་བསྲེག་ལ་སོགས།།

ཕ་ཁུ་བསོད་ནམས་ཅན་གྱི་རླབས་ཆེན་དགེ་ཚོགས།།

ལོ་ཟླ་དུས་ཀྱི་མཆོད་པའི་འབྲས་བུ་རེད་དོ།།