༧སྨན་རིའི་ཁྲི་འཛིན་རིན་པོ་ཆེའི་བརྟན་བཞུགས་རྒྱལ་བ་དགྱེས་པའི་མཆོད་སྤྲིན།།

དགའ་ལྡན་ལྷ་ཡི་ཡུལ་ལ་འགྲན་བཟོད་པའི།།

༧དཔལ་ལྡན་སྨན་གྱི་རི་བོའི་ཚལ་ཆེན་དུ།།

སུམ་ལྡན་བླ་མ་རྒྱལ་བ་མཉམ་མེད་པའི།།

དོན་ལྡན་མཛད་པའི་འཕྲིན་ལས་སྲིད་ཞིའི་རྒྱན།།

ལྷ་སྲས་གོང་དེའི་རྒྱལ་ཚབ་གསེར་གྱི་ཁྲིར།།

ལྷ་དང་སྲུང་མའི་ལུང་གིས་རབ་བསྔགས་པའི།།

ལྷ་མིའི་མགོན་གྱུར༧ཁྲི་འཛིན་སོ་གསུམ་པ།།

ལྷ་མཆོག་ཚེ་མཐའ་ཡས་ཀྱི་ངོ་བོར་བཞུགས།།

གངས་དཀར་ཁ་བའི་ཚེ་སྲོག་སླར་ལ་སྦྱིན།།

ཞྭ་དཀར་བསྟན་པའི་དབུ་འཕང་དགུང་དུ་བཏེགས།།

རྣམ་དཀར་དགེ་བའི་གཏེར་མཛོད་སྨན་རི་བ།།

པད་དཀར་འདབ་བརྒྱའི་ཁྲི་ལ་བརྟན་བཞུགས་གསོལ།།

༸སྨྲ་དབང་ཡོངས་འཛིན་རིན་པོ་ཆེའི་བརྟན་བཞུགས་དད་པའི་མེ་ཏོག

 སྨྲ་བའི་སེང་གེ་ཟུར་ཕུད་རྒྱན་དོར་ནས།།

སྨྲ་བ་མི་ཡི་ཟོལ་དུ་ཕེབས་པའི་མགོན།།

སྨྲ་དབང་ཡོངས་འཛིན་བསྟན་འཛིན་རྣམ་དག་རྗེ།།

སྨྲ་གསལ་སྙན་པའི་ངག་གིས་ལན་བརྒྱར་བསྔགས།།

འཆད་པའི་གསུང་གིས་འཁོར་བའི་མྱ་ངན་སངས།།

རྩོད་པའི་དཔའ་བས་ཕྱོགས་མཐའི་རྒོལ་ངན་གཞོམ།།

རྩོམ་པའི་གླེགས་བྲག་རིའི་གཏོས་དང་མཉམ།།

བསྟན་པའི་གསལ་བྱེད་ཁྱེད་ལ་གསོལ་བ་འདེབས།།

ཐོས་པའི་གྲུ་ཡིས་ཤེས་བྱའི་རྒྱ་མཚོར་བརྒལ།།

བསམ་པའི་འཕྲུལ་གྱིས་དཀའ་གནད་མདུད་བརྒྱ་བཀྲོལ།།

སྒོམ་པའི་སྤྱན་གྱིས་བོན་སྐུའི་རང་ཞལ་མཇལ།།

འགྲོ་བའི་འདྲེན་པ་ཁྱེད་ལ་གསོལ་བ་འདེབས།།