བཀའ་དྲིན་དྲན་གླུ།
ཀ་སྨད་སུམ་བཅུའི་རང་འགྲོས་མ་ཤེས་ཀྱི་བར་དུ།
ཁ་སྣབ་མི་གཙང་ཇི་སྙེད་ལྕེ་རྐན་གྱིས་འཇིབས་ཤིང་།
ག་ལེར་ལེགས་པའི་བྱ་བར་བསླབ་སྟོན་དེ་གནང་བའི།
ང་ཡི་དྲིན་ཅན་ཕ་མའི་བཀའ་དྲིན་དེ་དྲན་བྱུང།
ཅ་དག་ཤིས་པའི་ཚིག་གིས་བསྟོད་སྨོན་རང་ཉན་ཞིང་།།
ཆ་རྐྱེན་མཁོ་མཐུན་ཡོ་བྱད་འབེལ་པོ་ཡི་གསེང་ནས།།
ཇ་ཤ་མར་ཐུད་བཅུད་ཀྱིས་བུ་ཆུང་ངའི་ལང་ཚོ།།
ཉ་གང་ཟླ་ལྟར་རྒྱས་པ་ཕ་མ་ཡི་བཀའ་དྲིན།།
ཏ་ལའི་སྡོང་པོ་ལྟ་བུའི་ཟག་ཕུང་འདི་ཁུར་ཏེ།།
ཐ་ཆད་ཁྱི་ཕག་འདྲ་བའི་སྤྱོད་ལམ་ལ་མ་ཞུགས།།
ད་ལྟ་བསླབ་སེམས་དཔའི་གྲལ་མཐའ་རུ་སླེབས་ཤིང་།།
ན་ཆུང་གཏན་འདུན་འགྲུབ་པ་འདི་ཕ་མ་ཡི་བཀའ་དྲིན།།
པ་ནིའི་རྒྱུན་ལྟར་ཟད་མེད་གངས་ཅན་གྱི་གཞུང་ལུགས།།
ཕ་མཐར་སོན་དུས་དཀའ་བ་ཤེས་བྱ་ཡི་ཟབ་ཚད།།
བ་ཕྱུགས་དུད་འགྲོ་བཞིན་དུ་སློབ་བརྩོན་གྱི་སྐལ་པ།།
མ་ཆད་བཟང་པོར་ལྡན་པ་ཕ་མ་ཡི་བཀའ་དྲིན།།
ཙ་ཙེར་མི་སྐད་ཤེས་པའི་བྱིས་དུས་ནས་བཟུང་སྟེ།།
ཚ་གྲང་དཀའ་སྡུག་བཟོད་ནས་སློབ་བརྩོན་དེ་མེད་ཀྱང་།།
ཛ་ཡའི་བསྟན་ལ་ཐོས་བསམ་བློ་ཁ་དེ་ཕྱོགས་པ།།
ཝ་ལེར་བསམ་ན་འདི་ཡང་ཕ་མ་ཡི་བཀའ་དྲིན།།
ཞ་ལོང་འོན་ལྐུགས་མིན་པའི་དལ་རྟེན་ཞིག་རྙེད་ན།།
ཟ་འོག་གདུགས་ལྟར་བཀུར་འོས་ལྔ་རིག་གི་གཞུང་ལ།།
འ་ལེ་འོལ་ལེ་ཙམ་མིན་འབད་འབུངས་ཤིག་དགོས་པ།།
ཡ་ཆུང་སེམས་ལ་འཇགས་པའང་ཕ་མ་ཡི་བཀའ་དྲིན།།
ར་བ་གངས་ལྗོངས་འཛིན་མའི་སྒོ་ཐེམ་དེ་བརྒལ་ཏེ།།
ལ་ལུང་སྟོང་ཕྲག་མང་པོའི་ཕ་མཐའ་རུ་སླེབས་ཀྱང་།།
ཤ་ཞེན་རིགས་རུས་གཅིག་པའི་སྤུན་ཟླ་ལ་བཅངས་སེམས།།
ས་བོན་ཅུང་ཙམ་ཡོད་པ་ཕ་མ་ཡི་བཀའ་དྲིན།།
ཧ་ཅང་བསབ་པར་དཀའ་བ་ཕ་མ་ཡི་དྲིན་ལན།།
ཨ་ཙི་ས་མཐའ་འདི་ནས་ཡིད་ངོས་སུ་ཤར་དུས།།
ཧ་ལམ་མིག་ཆུའི་ཐིག་ཕྲེང་རྐང་རྩེ་ནས་འཐོར་བཞིན།།
དྲན་པའི་གླུ་དབྱངས་མགྲིན་པའི་འཕྲང་ལམ་ནས་ཐལ་སོང་།
ཕྱི་ལོ་༢༠༠༤། ཟླ་༩། ཚེས་༡༨། ཉིན་བལ་ཡུལ་ཁྲི་བརྟན་ནོར་རྩེར་བྲིས།།
- ཟིན་ཐོ་གོང་མ།གྲུབ་མཐའི་རྒྱལ་པོ།
- ཟིན་ཐོ་འོག་མ།ཉི་ཟླ་ཟུང་འབྲེལ།
