གངས་ཕྲུག་གི་སྐྱོ་དབྱངས།

ས་ཡ་དྲུག་གི་བོད་འབངས།།

ཆོལ་ཁ་ཆོས་ལུགས་ཟེར་ནས།།

ནང་འཁྲུགས་འཁོར་ལོ་བསྐོར་སོང་།།

ཆིག་སྒྲིལ་ཡོང་ཐབས་མི་འདུག །

བུ་ཕྲུག་སྐྱོང་བའི་ཕ་མས།།

མདུན་ལམ་མེད་རབས་བཤད་ནས།།

སློབ་གྲྭའི་སྒོ་ཆེན་བཀག་སོང་།།

ཤེས་ལྡན་བཙའ་ཐབས་མི་འདུག

ན་གཞོན་ཕོ་མོ་ཕལ་ཆེར།།

བདེ་སྐྱིད་འཚོ་བ་ཟེར་ནས།།

ཤོ་བག་མི་ཚེ་བསྐྱལ་སོང།།

གསར་གཏོད་ཡོང་དོན་མི་འདུག །

ཕྱི་ནང་སྤུན་ཟླའི་མི་རིགས།།

ང་ངར་ཁོ་རྫིག་ཟེར་ནས།།

སྒེར་དོན་བསྒྲུབ་ལ་བྲེལ་སོང་།།

སྤྱི་ཆུས་འགྲུབ་ཐབས་མི་འདུག །

གསར་གཏོད་བྱ་བ་ཕར་ཟད།།

ཡོད་པའི་རིག་གཞུང་ཉམ་སོང་།

ཏིང་འཛིན་ཐུན་ལས་གྲོལ་དང་།།

གཏི་མུག་གཉིད་ལས་སད་དང་།།

ཀྱེ་ཀྱེ་རིགས་གཅིག་སྤུན་ཟླ།།

མགོ་བོ་ཡར་ལ་དགྱེ་ནས།།

ཤར་ནུབ་གཞན་ལ་ལྟོས་དང་།།

བག་ཕེབས་ཉལ་ཐབས་འདུག་གམ།།