གྲུབ་མཐའི་རྒྱལ་པོ་ཐེག་ཆེན་གཡུང་དྲུང་བོན།།

རྒྱལ་བ་ཀུན་ཏུ་བཟང་པོའི་དགོངས་ཀློང་ཟབ་མོ།།

སྤྲུལ་སྐུ་དྲིན་ཅན་གཉིས་ཀྱི་ཉམས་ལེན་སྙིང་པོ།།

གསང་ཆེན་བླ་མེད་ཐེག་པའི་ལམ་ལ་བརྟེན་ནས།།

འཇའ་ལུས་འཕོ་ཆེན་ཉེར་བཞི་ཁད་ཀྱིས་ཕེབས་སོང་།།

འཆི་མེད་ཡུམ་སྲས་གཤེན་གསུམ་བཀའ་ཡི་བསྡུས་དོན།།

དབལ་བོན་སྟག་ལ་མེ་འབར་ཐུགས་ཀྱི་ཉིང་ཁུ།།

ཟབ་དཀར་སྔགས་ཀྱི་ཐེག་པ་ཉམས་སུ་བཞེས་ཏེ།།

གྲུབ་ཆེན་རིག་འཛིན་བརྒྱད་ཅུ་དག་ཞིང་གཤེགས་སོང་།།

སྐལ་ལྡན་རིག་པ་ཅན་གྱི་ཚེ་ལུས་གཅིག་ལ།།

རྣམ་གྲོལ་གདོད་མའི་མགོན་པོའི་བཙན་ས་ཟིན་པའི།།

མྱུར་ལམ་མན་ངག་འདི་འདྲ་ཞང་བོད་ལྗོངས་ལས།།

ཕྱོགས་མཐའི་ཡུལ་གྲུ་གཞན་ནས་བྱུང་རབས་མི་འདུག  །

སྤྱི་མཐུན་འགྲོ་བའི་བསོད་ནམས་འཕར་འབུབ་དབང་གིས།།

གྱེར་བསྟན་དར་གུད་བསྣོལ་མའི་སོ་མཚམས་ཤིག་ནས།།

སྒྲ་བསྒྱུར་ལོ་པཎ་མཁས་པའི་དྲིན་ལ་བརྟེན་ཏེ།།

ཤར་ནུབ་རྒྱལ་ཁམས་གཞན་ལ་སིམ་འཛུལ་བྱས་ཡོད།།

རྒྱལ་བ་གཤེན་གྱི་ཐུགས་རྗེའི་ན་བུན་མ་ཡལ།།

རྒྱུད་གསུམ་བླ་མའི་བྱིན་རླབས་ཉག་ཐག་མ་ཆད།།

རིས་མེད་གྲུབ་འཛིན་ཕལ་གྱིས་གཙུག་ཏུ་བཀུར་བས།།

གྲུབ་མཐའི་རྒྱལ་པོའི་མཚན་གྱི་ཅོ་པཎ་ཐོགས་ཡོད།།