(རྩོམ་སྔ་མའི་འཕྲོས་འཐུད།)

གཤེན་གྱི་དར་ལྡིང་ཞེས་པ་ན།
གཤེན་སྟོན་ནམ་མཁའ་རྒྱལ་པོ་ཞེས།
གསང་མཆོག་མཐར་ཐུག་ལྷ་ཞལ་ཁུམས།
ངུར་སྨྲིག་ཆས་འཛིན་འཕྲེང་བ་བསྣམས།
ཞལ་ནས་ཧུང་དང་ཕཌ་སྒྲ་སྒྲོགས།
སྡེ་བརྒྱད་ཚོགས་རྣམས་དབང་དུ་འདུས།
གསང་བའི་བོན་འཆད་བཀའ་འཁོར་བསྐོར།
གྲུབ་མཆོག་བླ་མར་གསོལ་བར་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས། གཙང་གི་དར་ལྡིང་ཞེས་པ་ན།  རྒྱལ་གཤེན་གདུང་གི་རྒྱུད་གྲོལ་བ།ནམ་མཁའ་རྒྱལ་པོ་ཞེས་རབ་བྱུང་གི་ཚུལ་འཛིན་འཕྲེང་བ་བསྣམས་པ། རྫུ་འཕྲུལ་གྲུབ་རྟགས་སྣ་ཚོགས་ལྡན་པ། ཐེག་གསུམ་ལྡན་གྱི་བླ་མ་དེ་ཉིད་སྐྱེས་རབས་བདུན་པའོ།

ཤར་ཕྱོགས་ཤར་རྫའི་གདན་ས་ན།
གྲུབ་ཐོབ་མཐོང་གྲོལ་སྙིང་པོ་ཞེས།
ཟབ་མོ་གཅོད་ལ་དབང་ཐོབ་ཅིང་།
སྐུ་ལུས་དུར་ཁྲོད་ཚོགས་སུ་འབུལ།
ངེས་མེད་སྤྱོད་པ་རྣལ་འབྱོར་ཚུལ།
ཕྱག་ན་ཌཱ་རུ་རྐང་གླིང་འཛིན།
སྦས་པའི་ཚུལ་འཛིན་བླ་མ་རྗེ།
རྣལ་འབྱོར་ཆེན་པོར་གསོལ་བར་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས། ཤར་ཕྱོགས་ཤར་རྫའི་གནས་ཀྱི་ཉེ་འགྲམ་དུ། གྲུབ་ཐོབ་ཆེན་པོ་གསང་མཚན་མཐོང་གྲོལ་སྙིང་པོ་ཞེས་བྱ་བ། རྣལ་འབྱོར་སྤྱོད་པའི་ཚུལ་འཛིན་ཅིང་།  ཐོད་རྒལ་སྣང་ཚད་ཀྱི་རྣལ་འབྱོར་ཆེན་པོ་སྐབས་རེར་ནམ་མཁའ་འཕུར་བ་དང་། ཧུང་ཕཌ་ཀྱི་སྒྲ་སྒྲོགས་པ། མ་ངེས་པའི་སྤྱོད་པ་མཛད་པའི་རྣལ་འབྱོར་ཆེན་པོ་དེ་ཉིད་སྐྱེས་རབས་བརྒྱད་པའོ།

གངས་དཀར་ཏེ་སེའི་གནས་མཆོག་ན།
རྟོགས་ལྡན་བོན་པོ་ནམ་མཁའི་མཚན།
བརྟུལ་ཞུགས་ཆེན་པོས་ཧུང་ཆེན་སྒྲོགས།
མ་ངེས་ཆས་འཛིན་གྲུབ་ཐོབ་རྗེ།
མ་རུང་བདུད་སྲིན་ཐོག་གིས་འདུལ།
ལྷ་འདྲེ་སྡེ་བརྒྱད་བྲན་དུ་བཀོལ།
ཉམས་དང་རྟོགས་པའི་མགུར་དབྱངས་ལེན།
འཁྲུལ་ཞིག་བླ་མར་གསོལ་བ་འདེབས།
བྱིན་རླབས་དབང་བཞི་དགོངས་རྒྱུད་མངོན་པ་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས། གངས་དཀར་ཏེ་སེའི་གནས་མཆོག་ན་ངེས་མེད་ཀྱི་རྣལ་འབྱོརམཁའི་མཚན་ཅན་འཆང་བ། དབུ་སྐྲ་ཐོད་དུ་བཅིང་ཞིང་རས་དཀར་གྱི་གཟན་དང་སྒོམ་ཐག་གསོལ་བ། ཕྱག་གཡས་སྡིག་མཛུབ་དང་གཡོན་པས་ཐོད་ཞལ་འཛིན་པ། གྲུབ་རྟགས་རྫུ་འཕྲུལ་དཔག་མེད་མངའ་ཞིང་། དར་དཀར་གྱི་ན་བཟའ་ལྷུལ་པོར་དཀྲི་བ།ཉམས་རྟོགས་མགུར་དབྱངས་སུའཐེན་པ་དེ་ཉིད་སྐྱེས་རབས་དགུ་པའོ།

བོད་ཡུལ་དབུས་ཀྱི་གཙང་གི་ཡུལ་གྲུ་ན།
གཤེན་གྱི་གདུང་གྲོལ་གྲུབ་ཐོག་གཡུང་དྲུང་ཞེས།
སྦས་པའི་ཚུལ་འཛིན་སྣ་ཚོགས་སྤྱོད་པ་སྐྱོངས།
འབྲེལ་ཚད་ཐར་པར་འདྲེན་པའི་བླ་མ་ཆེ
གསང་བའི་གྲུབ་ཐོབ་ཆེན་པོར་གསོལ་བ་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།།
ཉམས་དང་རྟོགས་པའི་ཡེ་ཤེས་འབར་བར་མཛོད།
ཅེས། གཙང་གི་ཡུལ་གྲུ་དར་ལྡིང་ཞེས་པ་རུ། གཤེན་གྱི་གདུང་ལས་གྲོལ་བ་གྲུབ་ཐོབ་གཡུང་དྲུང་སྙིང་པོ་ཞེས། མ་ངེས་ཀྱི་སྤྱོད་པ་མཛད་པ། དབུ་སྐྲ་ལྕང་ལོ་འཁྱིལ་ཞིང་བེར་སྨུག་སྐུ་མནབས་པ། ཕྱག་ན་སྔགས་ཀྱི་གླེག་བམ་དང་སྡིག་མཛུབ་མཛད་པ།
སྔགས་དང་བརྟུལ་ཞུགས་ཀྱི་ནད་དང་རྐྱེན་ཐམས་ཅད་བཟློག་པ།སྦས་པའི་རྣལ་འབྱོར་དེ་སྐྱེས་རབས་བཅུ་པའོ།

ཁྱུང་པོ་ཡུལ་གྱི་གནས་མཆོག་ན།
ངེས་མེད་རྣལ་འབྱོར་སྨོན་ལམ་མཚན།
ཟབ་གཏེར་དགོངས་པ་ཀློང་བརྡོལ་ཅིང་།
གཟའ་བདུད་ཀླུ་སྲིན་དམ་ལ་བཏགས།
ཞང་ཞུང་མེ་རིའི་ལྷ་ཞལ་ཁུམས།
ཚུལ་གོས་རིས་དྲུག་མཛེས་པས་བརྒྱན།
ངེས་མེད་བླ་མར་གསོལ་བར་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས།ཁྱུང་པོ་ཡུག་དུ་ངེས་མེད་རྣལ་འབྱོར་སྨོན་ལམ་ཞེས་བྱ་བ། ཚུལ་གོས་རིས་དྲུག་གསོལ་ཞིང་རྟག་ཏུ་རི་ཁྲོད་འགྲིམས་པ།ཕྱག་གཡས་སེན་གོར་དང་གཡོན་པས་ཨ་དཀར་འཛིན་པ། དགོངས་པ་རང་དབང་ཐོབ་ཅིང་སྤྱོད་པ་དམན་པ་འཛིན་པ། ཉམས་བརྡོལ་གྱི་མགུར་མ་ལ་སོགས་པའི་ཟབ་གདམས་མང་དུ་གསུང་བ། ཞང་ཞུང་མེ་རིའི་ལྷ་ཞལ་མཇལ་ཞིང་།ལྗགས་མཆིལ་གྱིས་མཛེ་དང་ཤུ་བ་འཇིབས་པ། གྲུབ་པའི་རྟོགས་ལྡན་དེ་ཉིད་སྐྱེས་རབས་བཅུ་གཅིག་པའོ།

རྒྱལ་བ་གཤེན་གྱི་གདུང་འཛིན་པ།
གཤེན་སྲས་ནོར་བུ་དབང་རྒྱལ་ཞེས།
སྐུ་ལ་དར་སྔོན་ན་བཟའ་གསོལ།
ཞབས་གཉིས་འགྱིངས་སྟབས་ཆེ་བརྗིད་ཚུལ།
ཕྱག་གཡས་ཤེལ་གྱི་གཡུང་དྲུང་འཛིན།
གཡོན་པས་ཕུར་པ་ས་གནོན་མཛད།
ངེས་མེད་མཛད་པ་སྣ་ཚོགས་སྐྱོངས།
ལྟ་བ་ཐེག་ཆེན་དགོངས་རྒྱུད་རྟོགས།
སྒོམ་པ་ལམ་ཁྱེར་ཚད་མེད་འཛིན།
ལྔ་བརྒྱའི་འགྲོ་ཁམས་འདྲེན་མཛད་པ།
གདུང་འཛིན་བླ་མར་གསོལ་བ་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས།རྒྱལ་བ་གཤེན་གྱི་གདུང་གྲོལ་གཤེན་སྲས་ནོར་བུ་དབང་རྒྱལ་མཆོག་གི་སྐྱེས་རབས་ཀྱི་རྣམ་ཐར་རམ་གསོལ་འདེབས་རྒྱས་པ་ནི་ཕྱི་འདུལ་ཁྲིམས་ཀྱི་བརྒྱུད་པས་འགྲོ་དོན་གྱི་སྐྱེས་རབས་འཛིན་པ་དང་། ནང་གསང་སྔགས་ཀྱི་བརྒྱུད་པས་འགྲོ་དོན་གྱི་སྐྱེས་རབས་འཛིན་པ། གསང་བ་རིགས་སྔགས་ཀྱི་བརྒྱུད་པས་འགྲོ་དོན་གྱི་སྐྱེས་རབས་འཛིན་པ།   ཡངས་གསང་རྫོགས་པ་ཆེན་པོའི་རྣལ་འབྱོར་གྱིས་འགྲོ་དོན་གྱི་སྐྱེས་རབས་འཛིན་པ་ལ་སོགས་མ་ངེས་པའི་འགྲོ་བ་འདུལ་བའི་སྐྱེས་རབས་རྣམ་པར་ཐར་པ་བརྗོད་ལས་འདས་ཀྱང་། གསོལ་བ་འདེབས་པའི་ཚུལ་མདོར་བསྡུས་འདི་ནི་དཔལ་ལྡན་བླ་མ་མཆོག་གི་ཞལ་མཇལ་གསུང་ཐོས་པས་དད་པ་ཚད་མེད་པ་དང་བཅས་ཏེ་ཞིག་པོའི་རུས་ཐོབ་དུས་མཐའི་སྔགས་འཆང་བ་ཀུན་བཟང་བསྟན་འཛིན་ནམ་གསང་མཚན་ནམ་མཁའ་རང་གྲོལ་ཞེས་པ་དེ་ཉིད་ཀྱི་ཆ་ཤས་ཀྱི་དྲན་སྣང་ལས་བྱུང་འདི་བཞིན་ཡི་གེར་བཀོད་པ་ཡིན་པས་ཉེས་འཁྲུལ་ཅི་མཆིས་དཔལ་ལྡན་བླ་མ་རྒྱལ་བ་གཤེན་གྱི་གདུང་འཛིན་རིན་པོ་ཆེ་མཆོག་གི་སྐུ་གསུང་ཐུགས་ལ་མཐོ་ལོ་བཤགས་ཏེ་བཟོད་པར་གསོལ། འདི་བྲིས་དགེ་བས་གཡུང་དྲུང་བོན་གྱི་བསྟན་པ་རིན་པོ་ཆེ་ནུབ་མེད་སྲིད་མཐའི་བར་དུ་དར་ཞིང་རྒྱས་པ་དང་། རྒྱལ་གཤེན་གདུང་འཛིན་དམ་པ་སངས་རྒྱས་མི་ཡི་གཟུགས་སུ་བྱོན་པ་འཛམ་གླིང་ལྷ་སྐལ་ཞྭ་དཀར་བསྟན་པའི་སྐྱབས་མགོན་དམུ་གཤེན་ཡབ་སྲས་རྣམས་གསུམ་སྐུ་ཚེ་ཡུན་དུ་བརྟན་ཞིང་འགྲོ་དོན་མཐའ་རུ་ཕྱིན་པའི་སྨོན་ལམ་ལན་བརྒྱར་ཞུས་ཤིང་དག་སྣང་དང་བཅས་ཏེ་ཕུལ་བའོ།
  

སྤུ་རྒྱལ་བ་གཡུང་དྲུང་བསྟན་འཛིན་གྱིས་ཡི་གེར་ཕབས་པའོ།།
བཀྲ་ཤིས། །