༅། རྒྱལ་གཤེན་གདུང་འཛིན་གྱི་སྐྱེ་རབས་གསོལ་འདེབས་ངེས་དོན་ལུང་གི་ཕྲེང་།།

སྐྱབས་གནས་ཀུན་འདུས་འདྲེན་མཆོག་བླ་མ་ལ།
སྒོ་གསུམ་གུས་པ་ཆེན་པོས་འདུད་བྱས་ཏེ།
གང་གི་རྣམ་ཐར་ཕྲེང་བ་ཞིག
སྒོ་གསུམ་གསོལ་བཏབས་ཚུལ་དུ་སྨྲས།

མཐོང་ལམ་དོན་གྱི་མངོན་ཤེས་མི་ལྡན་པས།
ཉེས་ཆ་ཅི་མཆིས་བླ་མ་རྗེ་ལ་བཤགས།
སྒོ་གསུམ་དག་སྣང་དད་པའི་སྟོབས་དང་བཅས།
ཆ་ལུགས་ལྔ་ལྡན་འདུག་ཚུགས་ཟབ་མོ་ཡིས།
སྙིང་དབུས་གདུང་ཤུགས་དྲན་པས་འདི་སྐད་བརྗོད།

ཨེ་མ་ཧོ། བོན་ཉིད་སྐྱེ་མེད་མེད་པ་ལྔ་ལྡན་ཞིང་།
གདོད་མའི་མགོན་པོ་ཀུན་ཏུ་བཟང་པོ་ཞེས།
དཀར་གསལ་རྒྱན་མེད་མཉམས་བཞག་གཅེར་བུར་བཞུགས།
སྤྲོལ་བྲལ་བོན་སྐུའི་བདག་ཉིད་བླ་མ་ལ།
སྒོ་གསུམ་དད་མོས་གུས་པས་གསོལ་བ་འདེབས།
བྱིན་རླབས་དབང་གཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས། སྤྲོས་བྲལ་བོན་ཉིད་སྐྱེ་མེད་ཞིང་ཁམས་ན། སྐྱབས་གནས་མཐར་ཐུག་བོན་གྱི་སྐུ། དཀར་གསལ་ཞལ་གཅིག་ཕྱག་གཉིསདཀྱིལ་ཀྲུང་བཞུགས། རྒྱན་མེད་གཅེར་བུ་མཉམ་ཉིད་དགོངས་པ་སྐྱོངས། བོན་སྐུ་ཀུན་ཏུ་བཟང་པོ་ལས་རྒྱུད་པའོ།

ལྷུན་གྲུབ་འོད་གསལ་རྫོགས་སྐུའི་ཞིང་ཁམས་ན།
གཤེན་ལྷ་འོད་དཀར་བདེར་གཤེགས་ཀུན་འདུས་ལྷ།
དཀར་གསལ་ལོངས་སྤྱོད་རྫོགས་སྐུའི་རྒྱན་གྱིས་བརྒྱན།
རྫོགས་སྐུ་ངེས་པའི་བླ་མར་གསོལ་བ་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས། སྐུ་དང་དཀྱིལ་འཁོར་ཞིང་ཁམས་རྫོགས་པ་ཡི། ལྷུན་གྲུབ་རྫོགས་སྐུའི་གཤེན་ལྷ་འོད་དཀར་ཞེས། ངོ་བོ་བོན་གྱི་སྐུ་ལས་མ་གཡོས་ཀྱང་། རང་བཞིན་མཚན་དཔེ་རྫོགས་པའི་སྐུ་རུ་བསྟན། ངེས་པ་ལྔ་ལྡན་བཀའ་བརྒྱུད་བོན་རྣམས་སྟོན། རྫོགས་སྐུ་བླ་མ་དེ་ལས་བརྒྱུད་པའོ།

ཐེག་དགུ་དཀྱིལ་འཁོར་རྫོགས་པའི་ཞིང་ཁམས་ནས།
གསང་བའི་བདག་པོ་གསང་བ་འདུས་པ་ཞེས།
མཐིང་སྔོན་ནམ་མཁའི་མདོག་ལྡན་རྫོགས་སྐུའི་ཆས།
གཡས་པས་རལ་གྲི་གཡོན་པས་ཐོད་ཞལ་འཛིན།
སྐུ་སྟོད་དར་ནག་རྒྱན་དང་ཐོད་འཕྲེང་བརྒྱན།
སྐུ་སྨད་སྟག་ཤམས་ཞབས་གཉིས་ཕྱེད་དཀྱིལ་ཚུལ།
དཀྱིལ་འཁོར་ཀུན་འདུས་གསང་བའི་བདག་པོ་སྟེ།
གསང་འདུས་ངོ་བོ་བླ་མར་གསོལ་བ་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས། གསང་བའི་བདག་པོ་གསང་བ་འདུས་པ་ཞེས། གསང་བ་སྔགས་ཀྱི་སྐུ་དང་དཀྱིལག་འཁོར་ཞིང་ཁམས་ཐམས་ཅད་རང་བཞིན་
གྱིས་གཟུངས་ཐོབ་པ། གསང་སྔག་རྒྱུང་སྡེ་རྒྱ་མཚོའི་མཐར་ཐུག་གི་བོན་སྟོན་པ།གསང་བ་འདུས་པ་དེ་ཉིད་སྐྱེས་རབ་དང་པོའོ།

ལྷོ་ཤར་བདུད་འདུལ་སྔགས་ཀྱི་གླིང་ཆེན་ན།
སྔགས་ཀྱི་བདག་པོ་གཡུང་དྲུང་བདུད་འདུལ་ཞེས།
སྐུ་མདོག་མཐིང་ནག་ཁྲོ་ཚུལ་སྨྲང་ར་འཁྱིལ།
ཕྱག་གཡས་ཕུར་པས་འདྲེ་སྲིན་བདུད་གསུམ་བསྒྲལ།
གཡོན་པས་ཐོད་ཞལ་བདུད་རྩིས་བཀང་བ་བསྣམས།
ཞལ་ཆབ་གཏོར་བས་མེ་དཔུང་ཐོག་ལྟར་འཕྲོ།
སྔགས་ཀྱི་བདག་ཉིད་བླ་མར་གསོལ་བར་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས། འོལ་མོ་ལུང་རིང་གི་ལྷོ་ཤར་ན། བདུད་འདུལ་སྔགས་ཀྱི་གླིང་ཆེན་ན། སྔགས་ཀྱི་བདག་ཉིད་གཡུང་དྲུང་བདུད་འདུལ་ཞེས། མཐིང་ནག་ཁྲོ་གཏུམ་འཇིགས་པའི་ཆ་ལུགས་ཅན། དར་སྔོན་བེར་དང་སྟག་གི་གཡང་གཞི་མནབས། གཡས་པས་ཕུར་བ་གཡོན་པས་ཐོད་ཞལ་འཛིན། ཞལ་ཆབ་གཏོར་བས་མེ་དཔུང་ཐོག་མཚོན་འཕྲོ། བདུད་དང་སྲིན་པོ་མ་རུང་གྱི་གྲན་ཀུན། དྲག་པོས་ཚར་གཅོད་སྔགས་ཀྱི་དཔའ་བོ་ཆེ། གསང་བའི་ཡུམ་ཆེན་མ་དང་ཐབས་ཀྱི་རོལ། སྔགས་གྲུབ་ཆེན་པོ་སྟོང་དང་ཉིས་བརྒྱས་བསྐོར། གསང་སྔགས་གཡུང་དྲུང་བདུད་འདུལ་ཞེས་བྱ་བ་དེ་ཉིད་སྐྱེ་རབས་གཉིས་པའོ།

ཞང་ཞུང་ཡུལ་གྱི་གྲོང་ཁྱེར་ཆེན་པོ་ན།
སྦས་པའི་ཚུལ་འཛིན་གཤེན་བོན་རྒུ་སྐྱ་ཞེས།
སྣ་ཚོགས་སྤྱོད་པ་མ་ངེས་བརྟུལ་ཞུགས་སྐྱོངས།
གྲུབ་པའི་རྟགས་འདྲེན་སྤྲུལ་པ་ཐོགས་མེད་བསྒྱུར།
གསང་བའི་གྲུབ་ཐོབ་བླ་མར་གསོལ་བར་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས། ཞང་ཞུང་གི་གྲོང་ཁྱེར་གཡུ་སྟེང་པདྨ་བདལ་ཞེས་པ་ན།དམུ་གཤེན་ཆེན་པོ་རྐུ་སྐྱ་ཞེས་ཞེས་བྱ་བ།སྔགས་ཀྱི་བླ་མའང་ངེས་མེད་ཀྱི་ཚུལ་བསྟན། སྟག་ཞུ་དང་སྟག་བེར་མནབས་ཤིང་། ཕྱག་ན་མདའ་གཞུ་འཛིན་པ། སྐབས་རེར་རྔོན་པ་དང་ཤན་པའི་ཚུལ་བསྟན་པ། སྐབས་རེར་སྐུ་ལས་ཞི་ཁྲོའི་ལྷ་ཚོགས་དུ་མར་སྤྲུལ་ནས་ཚོགས་ཀྱི་འཁོར་ལོ་བསྐོར་བ། སྦས་པའི་གྲུབ་ཐོབ་ཆེན་པོ་དེ་ཉིད་སྐྱེ་རབས་གསུམ་པའོ།

རྟ་ནག་དུང་ཕོར་གསང་གནས་ན།
བརྟུལ་ཞུགས་ཆེན་པོས་འགྲོ་བ་འདུལ།
རྔོན་དང་ཤན་པའི་ཚུལ་འཛིན་ཅིང་།
གཏེར་གྱི་བདག་ཉིད་གྲུབ་པའི་མཆོག
གུ་རུ་རྣོ་རྩེ་ཞེས་བྱ་བ།
གྲུབ་ཐོབ་ཆེན་པོར་གསོལ་བར་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།
ཅེས། རྟ་ནག་དུང་ཕོར་གསང་བའི་གནས་མཆོག་ན། གྲུབ་ཐོབ་ཆེན་པོ་གུ་རུ་རྣོན་རྩེ་ཞེས། དམར་སྨུག་དར་ནག་ཨང་ག་ར་མནབས་ཅིང་། གཡས་པས་མདའ་བཞུ་གཡོན་པས་ཐོད་ཞལ་འཛིན། མཁའ་མགྲོ་ཨ་བྷི་ར་ཞེས་གཉིས་མེད་འཁྲིལ། རྔོན་དང་ཤན་པའི་ཚུལ་འཛིན་འགྲོ་བ་འདྲེན། ཟབ་མོ་གཏེར་གྱི་བོན་སྡེ་གྲངས་མེད་འཆད། བརྟུལ་ཞུགས་ཀྱི་གྲུབ་ཐོབ་ཆེན་པོ་དེ་ཉིད་སྐྱེས་རབས་བཞི་པའོ།

ཞུ་ཡི་གདུང་གྲོལ་འཁྲུལ་མེད་ཞིག་པོ་ཞེས།
དཀའ་ཐུབ་ཆེན་པོས་རྡོ་ལ་བཅུད་ལེན་མཛད།
གཙོ་མཆོག་ཁྲོ་བོ་ལྷ་ཞལ་དངོས་སུ་མཇལ།
མཐར་ཐུག་འཕོ་ཆེན་ལུས་རྒྱ་བདག་མེད་གཤེགས།
གྲུབ་པའི་རྟོགས་ལྡན་བླ་མར་གསོལ་བ་འདེབས།
བྱིན་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།

ཅེས།གཙང་གི་གཡས་རུ་ཞེས་པ་ན། གྲུབ་ཐོབ་ཞུ་སྒོམ་འཁྲུལ་ཞིག་ཞེས། སྐུ་ལུས་དར་དཀར་གཟན་གྱིས་གཡོག ཕྱག་ན་དྷར་ཀང་སིལ་སྙན་འཛིན། སྐྱིད་མཁར་རི་ཞིང་གསང་ཕུག་ན། གཙོ་མཆོག་ཁྲོ་བའི་ལྷ་ཞལ་ཁུམས། བཅུད་ལེན་དཀའ་ཐུབ་ཆེན་པོ་མཛད། མི་མིན་ལྷ་འདྲེ་བོན་འཆད་སྐྱོངས། དཀའ་ཐུབ་ཀྱི་རྣལ་འབྱོར་ཆེན་པོ་ཆེན་པོ་དེ་ཉིད་སྐྱེས་རབས་ལྔ་པའོ།

ཞང་ཞུང་རྒྱལ་གྱི་གདན་ས་སྟེ།
དྭང་ར་ཁྱུང་རྫོང་ཞེས་པ་ན།
སྤྲུལ་སྐུ་ཤེས་རབ་རིན་ཆེན་ཞེས།
དགོངས་པ་ཚད་ཕེབས་དོན་གྱི་བདག
བཟང་ངན་སེམས་རྟོགས་མངོན་ཤེས་གསལ།
བྱ་བྲལ་ཚུལ་འཛིན་རི་ཁྲོད་འགྲིམས།
པད་ལོ་རིས་དྲུག་སྐུ་ལ་གསོལ།
གྲུབ་ཆེན་བླ་མར་གསོལ་བ་འདེབས།
བྱིན་རླབས་དབང་བཞི་དགོངས་རྒྱུད་མངོན་པར་འཕོ།
ཉམས་དང་རྟོགས་པའི་ཡེ་ཤེས་འབར་བར་མཛོད།