ངས་སྤུན་ཟླ་ཚོ་ལ་དྲི་བ་ཞིག་འདྲི།།

དཀོན་མཆོག་བློ་གཏད་བཅོལ་བ་བསྔགས་པར་འོས་ཀྱང་།།

ཡོད་ཚད་ལྷ་ཡིས་སྟེར་བའི་རེ་ཆེན་ཞིག་གིས།།

ལག་པ་གནམ་དུ་བཟེད་ནས་གཉིད་དུ་ཡུར་ན།།

འཛམ་གླིང་གོ་ལའི་གནས་ཚུལ་ག་དུས་ཐོས་སམ།།

ལས་འབྲས་གཙིགས་སུ་འཛིན་པ་གལ་པོ་ཆེ་ཡང་།།

ལས་ལ་ཁག་དཀྲི་བྱེད་པའི་ལུགས་སྲོལ་ཞིག་གིས།།

མི་ཚེ་བྲང་ལག་སྦྱར་ནས་སོས་དལ་བཞུགས་ན།།

དེང་རབས་སྤྱི་ཚོགས་ནང་དུ་ག་དུས་སླེབས་སམ།།

གཞན་ནས་ལེགས་ཆ་འཚོལ་བ་འོས་ཤིང་འཚམས་ཀྱང་།།

དོན་མེད་ཨ་གསར་ཆེ་བའི་གཤིས་ངན་དེ་ཡིས།།

གཞན་གྱི་ལད་ཟློས་ཁོ་ནའི་ལམ་དུ་སོང་ན།།

མི་རིགས་རང་གི་རིག་གཞུང་ག་ཚོད་གནས་སམ།།

ཆོས་ཀྱི་སྤང་བླང་ཤེས་པ་གནད་དུ་ཆེ་ཡང་།།

ཆོས་ལ་ཆོས་བཞིན་མི་སྤྱོད་ཆགས་སྡང་རུ་ཏྲས།།

སྒྲོ་སྐུར་ཉེས་པའི་ཕུང་ཚོགས་རི་བཞིན་བསགས་ན།།

འབྲས་བུ་ཐར་པའི་ས་ལ་ག་དུས་འཁོད་དམ།།