ངོས་ཀྱིས་འདིར་བཤད་ཡོད།

དེ་ཡང་ངོས་ནི་ཆེས་རླབས་ཆེ་བའི་བོན་གྱི་མདོ་སྔགས་གཞུང་ལུགས་དང་ཐུན་མོང་རིག་གནས་གང་ལ་ཡང་ཧ་ཅང་མིག་དཔེར་འོས་པའི་སྦྱོང་བརྩོན་གྱི་བགོ་སྐལ་ལེན་ཐུབ་མིན་ལ་མ་ལྟོས་པར་༸གདན་ས་ཆེན་མོ་འདིའི་སློབ་གཉེར་བའི་སྒྲིག་ཁྲིམས་ཀྱི་ལྕགས་རི་བཙན་པོའི་ནང་ཚུད་ཀྱིན་ཡོད་སྟབས། ཞོར་ལས་ཀྱི་གོ་སྐབས་ཀྱང་དེ་ཙམ་ཞིག་མེད་པས་རྒྱལ་ཁབ་ཕྱི་ནང་གི་དྲ་གནས་ཁག་ཏུ་ཧ་ཅང་བལྟ་ཉུལ་བྱ་མྱོང་མེད།  དེ་ནི་ཕྱོགས་གཅིག་ནས་བལྟས་ན་གནོང་འགྱོད་འོས་པའི་གནས་སུ་བརྩི་ཆོག་ཀྱང་།  ཕྱོགས་གཞན་ཞིག་ནས་བསམ་ན་སྐབས་ཐོབ་ཀྱི་བྱ་བ་གང་ལ་འཇུག་ཀྱང་དེ་ཉིད་མཐུས་ཤོར་ཏུ་འགྲོ་བའི་ལས་རིགས་ཀུན་དགག་བྱར་བཟུང་དགོས་པ་ནི་སྤྱི་ཁྲིམས་ཤིག་ཡིན་པའི་ཆ་ནས་ངས་དེ་དག་ནི་ཇི་མི་སྙམ་པའི་ངང་དུ་བཞག་ལོས་ཆོག   དེ་རིང་འདིར་(ཧི་བོན་ཟིན་བྲིས་)སུ་དགོས་པ་དང་རྒྱུ་མཚན་ལ་གཞིག་ནས་(རྒྱལ་སྲས་སྤུ་ལྡེའི་བླ་མཁར་)ཞེས་པའི་གནས་མལ་ཞིག་བཟུང་ཡོད། འོན་ཀྱང་གྲུ་ཟུར་འདི་ནས་ངས་རང་ཉིད་ཀྱི་ཟིན་ཐོའི་གྲངས་འབོར་ཙམ་ལ་རྔམས་ནས་རང་གི་ཉིན་ཐོ་ཡན་ཆད་ནས་དེ་སྔོན་དུས་དེབ་དང་ཚགས་ཤོག་སོགས་ལ་ཨ་བཀོད་ཡང་བཀོད་མྱོང་བའི་རྩོམ་ཐོར་ཚུད་ཆད་ཡོད་ཚད་བསྡུ་གྲུག་བྱས་ཏེ་འདིར་སྤུངས་པའི་འཆར་གཞི་མེད་ལ།  གཞན་གྱི་གནང་བ་ཡོད་མེད་ལ་མ་ལྟོས་པར་རང་ལ་མི་དབང་པའི་པར་རིས་དང་རྩོམ་རིགས་སྣ་ཚོགས་བཀོལ་སྤྱོད་བྱ་ནས་རང་ཉིད་རྣལ་མའི་ངོ་བོ་དེ་ལས་ཚད་མཐོ་བའི་ས་རུ་སླེབས་པའི་རེ་སྙེགས་ཀྱང་ཅི་ཡོད། དེ་བཞིན་རྣམ་པ་ཀུན་ཏུ་(རྒྱལ་སྲས་སྤུ་ལྡེའི་བླ་མཁར་)འདིའི་ནང་དྲ་གྲོགས་ཚོ་ལ་ནད་ལ་ཕན་པའི་སྨན་གྱི་རིལ་བུ་ལྟ་བུའི་རྩོམ་རིགས་གསར་པ་རྐྱང་པའི་མཛོད་ཞིག་ཏུ་བཞེངས་སྐྲུན་ཐུབ་པའི་དམ་བཅའ་དང་འདང་རྒྱག་ཀྱང་དེ་བས་མེད།    དེར་མ་ཟད་ད་དུང་རྟག་ཏུ་འདི་ནས་བྱ་ར་དང་འཚོ་བརྫི་བྱ་བའི་གོ་སྐབས་ཀྱང་མེད་པ་ནི་སྨོས་ཅི།

འོན་ཀྱང་གནའ་སྔ་མོ་དུས་རབས་བདུན་པའི་ཡས་མས་ཤིག་ནས་བཟུང་བོན་བན་གྱི་ཆོས་ལུགས་དབར་འགལ་ཟླ་ཛ་དྲག་ཅན་དུ་གྱུར་ཏེ་མི་བསོད་ཁྲག་སྦྱོར་གྱི་ལས་བརྩམས་པ་ནས་བཟུང་བོན་བན་ཕན་ཚུན་སྡང་ཟུག་གི་རྩོད་གླེང་མུ་འཐུད་དེ་བྱུང་ཡོད་ལ།  དེ་དག་ལས་འགའ་ཞིག་གིས་བོན་ལ་བརྡོལ་འཁྱར་བསྒྱུར་གསུམ་དང་། དཀར་ནག་དབྱེ་བ། དམར་མཆོད་འབུལ་རབས་སོགས་གཞི་མེད་ཀྱི་སྐུར་འདེབས་དང་ངན་སྨྲས་ཚད་ལས་འདས་པ་རྒྱུད་བསྒྲགས་བྱས་ཏེ་གངས་རིའི་ཁྲོད་ཀྱི་གཡམ་རྒྱུགས་ལ་དགའ་བ་ཕལ་ཆེར་ལོག་ལམ་སུ་ཁྲིད་མྱོང་ཡོད།  ད་ལྟའི་ཆར་གཡུང་དྲུང་བོན་གྱི་མདོ་སྔགས་སེམས་གསུམ་གྱི་གླེགས་བམ་དཔེ་དཀོན་ཇི་སྙེད་ཅིག་འཕྲུལ་དཔར་དུ་བཏབས་ཏེ་ཕྱི་ནང་གི་རྒྱལ་ཁབ་གང་སར་ས་ཁྱབ་རྡོ་བརྡལ་དུ་གྱུར་པ་ནི་ཉི་མ་རྒྱབ་ཤར་ལག་པས་མི་ཁེབས་པའི་དཔེ་ལྟར་ཡིན་མོད་ཀྱང་།  དེ་དག་ལ་མིག་ཞགས་ཙམ་ཡང་མི་འཕེན་པར་ད་དུང་སྔོན་མའི་ངན་རྟོགས་དེ་དག་གི་རྒྱུན་འཛིན་པའི་འབྲི་གུང་དཀོན་རྒྱམ་དང་།  དར་ཐང་ཨོ་བརྩོན།  མཁན་པོ་ཚུལ་བློ་སོགས་བོན་ལ་བརྡོལ་འཁྱལ་བསྒྱུར་གསུམ་གྱི་རྣམ་བཞག་མེད་པར་མ་རྟོགས་པའི་རིགས་དང་། བོན་པོས་གཞན་སྲོག་འཚེ་ནས་དམར་མཆོད་ཁྲག་སྦྱིན་བྱེད་པར་ལོག་རྟོག་ཞུགས་པའི་རིགས་དང་། གཡུང་དྲུང་བོན་ལ་ལས་འབྲས་ཀྱི་རྣམ་བཞག་ཡོད་མེད་ལ་ཐེ་ཚོམ་ཅན་གྱི་རིགས་དུ་གཏོགས་པ་དུ་མ་ཞིག་གིས་མི་རིགས་མཐུན་སྒྲིལ་དང་རྒྱལ་ཁབ་རྩ་ཁྲིམས་ཁ་ནས་སྒྲོག་བཞིན་དུ་བོན་ལ་སྒྲོ་སྐུར་གྱི་ཚིག་ངན་བརྒྱ་ཕྲག་རང་གི་སློབ་མའི་ཚོགས་ལ་སློབ་བཞིན་པས་མ་ཚད།   དཔེ་ཚོགས་དུ་དཔར་དུ་བསྐྲུན་ཏེ་འཛམ་གླིང་ཤར་ནུབ་གང་སར་འགྲེམ་སྤེལ་དང་དྲིལ་བསྒྲགས་བྱེད་བཞིན་པ་ནི་ཧ་ཅང་གི་ཚད་གཞི་ལས་བརྒལ་བའི་རྩུབ་སྤྱོད་ཅིག་ཏུ་ཚོར།   

དེ་དང་ཕྱོགས་མཚུངས་སྔ་ཕྱི་བར་གསུམ་དུ་བོན་བསྟན་དང་བོན་འབངས་ཀྱི་གནས་སྟངས་ལ་དཔྱད་ཞིབ་བྱེད་ཚེ་ད་ནས་ང་ཚོ་བོན་གྱི་སྨྱུག་ཐོགས་པ་ཡོངས་ཀྱིས་ཆོས་ལུགས་གང་ཞིག་དང་མི་བུ་ཟུར་པ་ཞིག་པ་ལ་ཕོག་ཐུག་མ་སོང་བའི་སྒོ་ནས་ལོག་ལམ་དུ་འཕྱན་པ་དག་ལ་བདེན་པ་བོན་གྱི་གནས་ལུགས་ངོ་མའི་རང་ཞལ་མངོན་དུ་བཅུག་རྒྱུ་ནི་གལ་འགངས་ཆེ་བའི་འགན་འཁྲི་ཞིག་ཏུ་མཐོང་།   ངེས་ཚིག་བདེན་པར་བཤད་ཀྱང་མི་ཉན་སྐུར་པ་འདེབས་པའི་བླུན་པོའི་རིགས་ལ་ནི་ཅིས་ཀྱང་བཅོས་སུ་མེད་སྟབས་མཚམས་འདི་ནས་ང་ཚོས་ངར་ངར་རྫིག་རྫིག་བྱེད་དགོས་པའི་རྒྱུ་མཚན་ཅང་མེད་མོད།   སྤྱིར་དགག་བཞག་གི་བྱ་བར་ཞུགས་ཚེ་དམོད་པ་དང་ཁོང་ཁྲོ་བྱེད་པ་ནི་བླུན་པོའི་ལུགས་ཡིན་པར་དམ་པ་གོང་མས་གསུངས་ཤིང་།   སྒོས་སུ་དེང་སྐབས་འཛམ་གླིང་གི་ཁ་ཕྱོགས་འགྱུར་འགྲོས་དང་། ཡང་སྒོས་སུ་ང་ཚོ་བོད་མི་རིགས་ཀྱི་གནས་བབས་ལ་བསམ་ཚེ་མཐུན་སྒྲིལ་ལ་གནོད་པའི་དོན་མེད་ཀྱི་ཚིག་ངན་དང་དམའ་འབེབ་སོགས་སྤོང་ཅི་ཐུབ་བྱ་དགོས།   ད་དུང་ཧི་བོན་དྲ་བའི་དམ་ཚིག་སོགས་ལའང་དགོངས་བཞེས་ལོས་དགོས།  འོན་ཀྱང་ལུང་རིག་དཔང་དུ་བཞག་ནས་གོ་འཛོལ་ལ་མཛུབ་མོ་བཙུག་ཚེ་སུ་ཞིག་སྡུག་ནས་ངུས། ཁྲོས་ནས་ཤི་ཡང་སྙིང་རྗེ་དང་འཇིགས་ཞུམ་སོགས་ཀྱང་སྤོང་བྱ་ཞིག་ཡིན་པར་འདོད།  

དེས་ན་ངས་ཀྱང་དུས་ཁོམས་ཀྱི་སྐབས་དང་བསྟུན་ནས་གཙོ་བོར་གནད་དོན་འདིའི་རིགས་ལ་ཚད་མའི་བཀའ་ལུང་དང་རང་གི་རིག་པ་ཟུང་འབྲེལ་གྱི་ཐབས་ལམ་ལ་བརྟེན་ནས་དཔྱད་ཞིབ་ཀྱིས་བདེན་དོན་དཀར་སར་བསྐྱལ་བའི་བྱ་བ་ལ་མཉམ་ཞུགས་བྱ་རྒྱུ་ནི་དམིགས་ཡུལ་དང་པོར་བཟུང་ཡོད།  ཡང་འདི་ལྟ་བུའི་དྲ་ཚིགས་སུ་ཞུགས་ཚེ་ངོས་ཀྱི་འདོད་བློ་དང་མི་མཐུན་པའི་རིགས་དག་གིས་འཕྲིན་ལས་རྣམ་བཞིའི་གསུངས་གླེང་གང་འདྲ་ཞིག་གནང་མིན་ལ་དཔག་ཏེ་དུས་ནས་དུས་སུ་གྲིབ་ནག་འདྲེ་རུ་མི་བཟུང་བའི་ཕྱིར་དུ་ཁ་གསོང་པོའི་ལམ་ནས་གཏམ་བཤད་ཀྱང་ལོས་བྱ།  ཞོར་དུ་མི་ལོ་ཁྲི་སྟོང་གི་ལོ་རྒྱུས་མངའ་བའི་གཡུང་དྲུང་བོན་གྱི་ཆོས་ལུགས་དང་འབྲེལ་བ་ཆེས་ཆེར་ལྡན་པའི་རྟག་གཟིགས་ཞང་བོད་ཀྱི་ཤེས་རིག་དེ་དག་རང་ཅག་ཁ་བ་རི་པའི་མི་རིགས་དང་ཁ་བྲལ་ཐབས་མེད་པའི་འཚོ་གནས་ཀྱི་ཆ་རྐྱེན་ཞིག་ཏུ་གྱུར་ཡོད་སྟབས། འདི་ནས་དེ་དག་ནི་སུ་ཞིག་གིས་ཨ་གསར་དང་གཡམ་རྒྱུགས་འོག་ནས་ཁ་ཆག་སྣ་རལ་དུ་གཏོང་མི་འཇུག་པར་བསྲུང་སྐྱོབས་བྱ་རྒྱུའི་སྐུལ་མའང་བྱ་དགོས་སྙམ།  དེ་མིན་ཡང་རིས་སུ་མ་ཆད་པའི་བླ་སྤྲུལ་སྐྱེས་ཆེན་རྣམས་ཀྱི་གསུང་རྩོམ་ལས་གལ་ཆེའི་གདམ་ཟབ་སོགས་དཔེ་དཀོན་གྱི་རྩོམ་རིགས་ཐར་ཐོར་རེའང་བཏུས་ཏེ་བཀོད་ན་དགོས་པ་དང་དགེ་མཚན་མང་དུ་སྣང་།   ད་དུང་མཚམས་རེར་ཡིད་འཕྲོག་སྒེག་པའི་ཉམས་ཀྱིས་སྙན་ངག་གླུ་རུ་གྱེར་ཞིང་།  མཚམས་རེར་དྲག་ཤུལ་ཁྲོས་པའི་ཉམས་ཀྱིས་སྙན་ངག་མདའ་ལྟར་འཕེན་བཞིན་སྐྱིད་སྡུག་བསྣོལ་མའི་གླིང་ཁ་དུ་མར་ཉུལ་སྙིང་ཡང་ཅིས་ཀྱང་འདོད།  གཞན་ཡང་དྲ་གནས་འདིའི་ཀློག་པ་པོ་ཚོས་(རྒྱལ་སྲས་སྤུ་ལྡེའི་བླ་མཁར་)ཞིག་རལ་འདི་ནས་ཕྱོགས་ཀྱི་རྒྱལ་ཁམས་དུ་མའི་གནས་འཕྲིན་གསར་པ་གང་མང་མཁྱེན་རྟོགས་ཡོང་རྒྱུའི་ཐབས་ལམ་ལའང་བརྩོན་ངེས་ཡིན་པ་བཅས་སྤུ་བླ་གཡུང་དྲུང་སྐལ་བཟང་གིས་རང་སྤྱིལ་ནས་ཕྱི་ལོ་༢༠༡༢། ཟླ་༧། ཚེས༩། དགོངས་མོར་ཕུལ།