ང་ཡི་་བླ་མ།

དུས་གསུམ་རྒྱལ་བའི་ངོ་བོ།།

མི་ཡི་གར་གྱིས་མཛེས་པ།།

བསླབ་གསུམ་མཚུངས་ཟླ་བྲལ་བའི།།

ང་ཡི་བླ་མ་ཡིན་སོང་།།

ཚོགས་གཉིས་ཟབ་མོའི་འབྲས་བུ།།

གཟུགས་སྐུའི་རྣམ་པར་རོལ་བ།།

ཕན་དང་བདེ་བའི་འབྱུང་གནས།།

ང་ཡི་བླ་མ་ཡིན་སོང་།།

མཐའ་ཡས་འགྲོ་བའི་དོན་དུ།།

སྐུ་ངལ་ཁྱད་དུ་བསད་ནས།།

དུས་ཀུན་གཞན་དོན་བརྩོན་པ།།

ང་ཡི་བླ་མ་ཡིན་སོང་།།

རྒྱལ་བ་ཀུན་གྱི་ཡེ་ཤེས།།

ངུར་སྨྲིག་མདངས་སུ་འཕོས་པ།།

མཁྱེན་དཔྱོད་འགྲན་ཟླ་བྲལ་བ།།

ང་ཡི་བླ་མ་ཡིན་སོང་།།

དུས་ཀྱི་འཐོར་རླུང་གསེང་ནས།།

ཐུགས་བསྐྱེད་འོད་དུ་མཚེར་བ།།

གཤེན་རབ་བསྟན་པའི་བླ་སྲོག།།

ང་ཡི་བླ་མ་ཡིན་སོང་།།

འཛམ་གླིང་ཡུལ་གྲུ་ཀུན་ཏུ།།

གཤེན་བསྟན་ཕྱོགས་མཐར་སྤེལ་བའི།།

སྲིད་འདིའི་ཞི་བདེའི་སྲོག་ཤིང་།།

ང་ཡི་བླ་མ་ཡིན་སོང་།།