དམ་པ་རི་ཁྲོད་པ་ལ་བསྟོད་པ་ལྷའི་རྔ་བོ་ཆེ་ཞེས་བྱ་བ།།

                                                           རང་སྟོན་གསུང་འབུམ་པོད་དང་པོ་ལས་དྲང་།

                             བླ་མ་དང་ལྷག་པའི་ལྷ་ལ་ཕྱག་འཚལ་ལོ།།

དགེ་ཚོགས་ཉི་མའི་དཀྱིལ་འཁོར་རབ་རྒྱས་པས།།

མ་རིག་མུན་པ་མ་ལུས་སེལ་བ་དང་།།

མཐའ་ཡས་གདུལ་བྱ་པདྨོའི་གཉེན་གྱུར་ཅིང་།།

ཏིང་འཛིན་སྦྲང་རྩི་ཡོངས་སུ་འཕེལ་བའི་རྒྱུ།།

དམ་པ་རྣམས་ཀྱིས་བསྟོད་པའི་སྒྲ་སྒྲོགས་ཤིང་།།

རི་བོའི་དབེན་གནས་ཚད་མེད་ཏིང་འཛིན་སྒོམ།།

གངས་རིའི་ཁྲོད་ན་རྣམ་འབྱོར་མཆོག་གྱུར་པ།།

ཐར་འདོད་རྣམས་ལ་ཕན་པའི་དགའ་སྟོན་འགྱེད།།

མི་རྟོག་ཏིང་འཛིན་ཕུལ་བྱུང་རབ་བརྙེས་ཤིང་།།

བྱིན་རླབས་འོད་ཀྱིས་འགྲོ་ཀུན་སྨིན་མཛད་པ།།

དམ་པ་རྣམས་ཀྱིས་བསྟོད་འོས་ཁྱོད་ལ་ནི།།

རྣམ་པ་ཀུན་ཏུ་དད་པས་ཕྱག་འཚལ་ལོ།།

དེ་ལྟར་བསྟོད་པའི་དགེ་བ་ལས།།

འགྲོ་ཀུན་ཀུན་མཁྱེན་ཐོབ་གྱུར་ཅིག།

ཅེས་རོང་སྟོན་ཆེན་པོས་དཔལ་ནྭ་ལེནྡྲར་སྦྱར་བའོ།།

མཁས་པ་དཔལ་ཆེན་ལ་བསྟོད་པ་དཔལ་གྱི་འབྱུང་གནས་ཞེས་བྱ་བ།

བླ་མ་དང་ལྷ་པའི་ལྷ་ལ་ཕྱག་འཚལ་ལོ།

གསུང་རབ་མང་དུ་ཐོས་པའི་སྨྲ་བ་པ།།

རིག་གནས་ཀུན་ལ་མི་འཇིགས་སྤོབས་པ་ཅན།།

ཉི་མའི་འོད་ཀྱི་སྐར་མའི་ཚོགས་བཞིན་དུ།།

རིག་པའི་སྟོབས་ཀྱིས་ཕས་རྒོལ་ཟིལ་གྱིས་གནོན།།

འཆད་པ་ཉི་མའི་འོད་ཀྱི་འདུལ་བྱ་ཡི།།

བློ་གྲོས་པདྨོ་རབ་ཏུ་རྒྱས་པ་དང་།།

སྐྱོན་བྲལ་རྩོམ་པ་མཁས་པ་དགའ་བྱེད་ཅིང་།།

དུས་རྣམས་རྟག་ཏུ་དགེ་བའི་རང་བཞིན་ཅན།།

སྤོབས་པ་མི་ཟད་མཁས་པའི་མཆོག་གྱུར་པ།།

བསྟན་པ་ཉིན་མོར་བྱེད་པའི་སྣང་བ་ཅན།།

ཀུན་ཏུ་རྣམ་པར་རྒྱལ་བའི་སྟོབས་མངའ་བ།།

འགྲོ་བའི་དེད་དཔོན་ཁྱེད་ལ་གུས་པས་འདུད།།

མཁས་པ་ཕུལ་ཕྱིན་ཁྱོད་རབ་བསྟོད་པས།།

མཁས་པའི་གོ་འཕང་མཆོག་ཏུ་བརྙེས་གྱུར་ཅིག།།

ཅེས་རོང་སྟོན་ཆེན་པོས་ནྰ་ལེནྡྲར་སྦྱར་བའོ།།