དུས་གསུམ་མུན་པ་གཞོམ་པའི་དཔལ་གཅིག་པུ།། ས་གསུམ་འགྲོ་བའི་ལམ་སྒྲོན་དམུ་རྒྱལ་སྲས།།
གནས་གསུམ་འཁོར་ལོའི་རྒྱན་དུ་རྟག་བཞུགས་ནས།། ཚད་གསུམ་ལུང་དང་རྟོགས་པའི་དངོས་གྲུབ་བསྩོལ།།
ཤེས་བྱའི་གནས་ལུགས་རབ་འབྱམ་མུ་མེད་མཁར།། མཁྱེན་བརྩེ་ཡེ་ཤེས་འོད་ཟེར་དྲྭ་བས་མཛེས།།
གདུལ་བྱའི་བློ་མུན་གཞོམ་ནས་བློ་གྲོས་ཀྱི།།
པད་ཚལ་རྒྱས་མཛད་ཡར་མེ་པ་ལ་འདུད།།
ཞེས་སྐབས་འདིར་བཀའ་སྡེ་སྣོད་ཀྱི་དོན་ཀུན་རབ་ཏུ་གསལ་བར་བྱེད་པ་རྗེ་བཙུན་ཡར་མེ་ཤེས་རབ་འོད་ཟེར་གྱི་རྣམ་ཐར་ཕྱོགས་ཙམ་བརྗོད་ན། སྔོན་དུས་གཤེན་རབ་སྟོན་པའི་མདུན་གཡུང་དྲུང་གཙུག་གཤེན་རྒྱལ་བ་དེ་རྗེས་རྟག་གཟིགས་ཀྱི་མཁན་རྒྱུད་ནང་ཚན་དྲང་སྲོང་རྫུ་འཕྲུལ་ཡེ་ཤེས་དང་དྲན་པ་ནམ་མཁའ་ལ་སོགས་སྔ་ཕྱིར་འགྲོ་དོན་ལ་བྱོན་པ་བསམ་གྱིས་མི་ཁྱབ་ན་ཡང་། འདིར་བརྗེ་བཙུན་ཉིད་འཁྲུངས་ཡུལ་ནི་ཡར་འབྲོག་སྟག་ལུང་ར་བ་དམར་པོ་བྱ་བར། ཡབ་གཡུང་དྲུང་གཉན་དང་། ཡུམ་གུར་ཟ་དར་རེ་གཉིས་ཀྱི་སྲས་སུ་རྟགས་དང་ལྟས་བཟང་མཚན་དཔེ་མཛོད་སྤུ་དང་བཅས་འཁྲུང་བས། ཡུལ་གྱི་མི་ཀུན་དད་པ་སྐྱེས། ཆུང་དུས་སུ་མཚན་རྣམ་གྲགས་ཞེས་གསོལ། མེས་པོའི་མདུན་ནས་འབྲི་ཀློག་དང་གདམ་པ་མང་པོ་གསན་པས་དགུང་ལོ་བཅུ་གཅིག་ནས་མཁས་པའི་སྙན་པ་བྱུང་ཟེར། སླར་ཡང་དགུང་ལོ་བཅུ་གཉིས་དང་བཅུ་གསུམ་གཉིས་ལ་ཞིང་བ་སྲུང་ས་ཉིད་དུ།དགེ་བཤེས་རྟ་སྟོན་གྱི་མདུན་ནས་གདམ་པ་མང་བར་གསན།དེ་རྗེས་སྐྱི་མཁར་དུ་བྱོན་ནས་ཞུ་སྐྱེ་སེ་ཆེན་པོའི་མདུན་ནས་མཆོད་གཏོར་དང་རྣམ་དག་རྣམས་ཞུས། དགུང་ལོ་ཉེར་གཅིག་ཉང་སྟོད་སྐྱི་མཁར་དུ་བྱོན་ནས།ཞུ་སྐྱེ་སེ་མཆོག་དགོངས་རྫོགས་ཀྱི་མཆོད་འབུལ་བདུན་ཚིག་བཞུགས་རིང་ལ་ཞུ་སྒྲོལ་བ་གཤེན་རྒྱལ་གྱི་མདུན་ནས་སེམས་སྡེ་གབ་པ་མཛོད་བཅས་གསན་བསམ་ལོ་གསུམ་ཙམ་ན་སྒྲོལ་བའི་མཁྱེན་ཚད་མངོན་པར་གསལ། དེ་ནས་གྲྭ་སར་ཕེབས་ནས་འཆད་ཁྲིད་མཛད་པས་སློབ་འཁོར་མང་དུ་འཕེལ། ཞག་རེར་བླ་མ་གསུམ་གྱི་སྐུ་མདུན་ནས་བོན་གསན་པ་དང་སློབ་བུ་རྣམས་ལ་བོན་ཐུན་དྲུག་རེ་གསུངས་བར་མཛད། དེ་སྔོན་སྒྲོལ་བ་གཤེན་རྒྱལ་གྱི་མདུན་ནས་དགེ་བསྙེན་གྱི་ཁྲིམས་ཞུས། དགུང་ལོ་ཉེར་བརྒྱད་ཐོག་རྨེའུ་སྒོམ་དམ་པ་དགོངས་མཛོད་ཆེན་པོའི་མདུན་ནས་གཙང་གཙུག་གི་ཁྲིམས་ཞུས་ནས་ཚུལ་མཚན་ཤེས་རབ་འོད་ཟེར་དུ་གསོལ།བླ་མ་དམ་པ་བྲུ་སྟོན་རྗེ་བཙུན་གཉིས་མཁན་སློབ་དབུ་བཞུགས་ཀྱི་སྐུ་མདུན་ནས་དྲང་སྲོང་ཉིས་རྒྱ་ལྔ་བཅུའི་ཁྲིམས་རྣམས་རྫོགས་པར་ཞུས། རྗེས་འབྲེང་རྣམས་ཀྱི་དོན་དུ་སོླབ་དཔོན་མཛད་ནས་ར་དམར་བྲག་ལ་སྒྲུབ་གནས་སུ་བཞུགས། སྟག་ལུང་གི་གདུལ་བྱ་རྣམས་ལ་བོན་འཁོར་མང་དུ་བསྐོར་རོ།། གཞན་ཡང་རྨེའུ་སྒོམ་དམ་པ་དགོངས་མཛོད་ཆེན་པོའི་ཐུགས་སྲས་བཀའ་བབས་བཞི་སྟེ། གཉལ་སྐྱེ་མེད་དྲང་སྲོང་། བཞག་སྒོམ་ཆེན་འབར་བ། ཕོ་སྒོམ་ཞིག་པོ། ཡར་མེ་ཤེས་རབ་འོད་ཟེར་བཅས་བཞི་ཡོད་པ་ལས་ཁོང་ལ་ཚིག་སྒྱུ་མ་ལ་དབང་བའི་བཀའ་བབས་པར་རྟེན། བཀའ་བརྟན་སྡེ་ལྔ་གཙོས་ལྟ་སྒོམ་སྤྱོད་གསུམ་བསྟན་བྱེད་ཀྱི་གཞུང་དང་ཀློང་རྒྱས་ཀྱི་འགྲེལ་བ། རྣམ་དག ཀུན་རིག ཀུན་སྣང་ཁྱབ་པའི་སྒྲུབ་སྐོར་དང་གཞན་ཕྱག་བཞེས་སོགས་གྲངས་མང་མཛད་པས་རྗེས་འཇུག་རྣམས་ལ་བཀའ་དྲིན་ཤིན་ཏུ་ཆེ་བ་ལགས། རྗེས་འཇུག་བུ་སློབ་ནི། སུམ་པ་ཇོ་ཚུལ་དང་གཤེན་སྟོན་ནམ་མཁའ་ཞུ་ཆེན་ཡེ་ཤེས་རིན་ཆེན་དྲང་སྲོང་གཡུང་དྲུང་ཡེ་ཤེས། དཔའ་འོད་གསལ་རྒྱལ་མཚན་སོགས་བྱོན་པའོ།།དགུང་ལོ་དོན་ལྔར་བཞུགས་ཤིང་མཐར་སློབ་འཁོར་རྣམས་ལ་བོན་གསུངས་བཞིན་པར་སྐུ་མི་རྟག་པའི་ཚུལ་གྱིས་དགོངས་པ་བོན་དབྱིངས་སུ་བསྡུས་སོ།། སླར་འགྲོ་དོན་དུ་འགྲོ་མགོན་བློ་གྲོས་རྒྱལ་མཚན་དང་རྒྱལ་བ་མཉམ་མེད་ཆེན་པོ་སོགས་སུ་སྤྲུལ་ནས་འགྲོ་དོན་མཛད་པའོ།།།།
སྐུ་མཆོག་མཚན་དཔེས་ས་ཆེན་མཛེས་པར་བྱས།།
གསུང་གི་ལེགས་བཤད་མཁས་དགུའི་རྣ་བར་འཇེབ།།
ཐུགས་རྗེས་ལུས་ཅན་འགྲོ་བ་སྐྱོབས་མཛད་པ།།
སྟོན་སྒོམ་གཉིས་ལྡན་ཉིད་ལ་རྟག་ཏུ་གུས།།
རིང་ནས་སྡུག་ཀུན་ནད་ཀྱི་མནལ་བའི་འགྲོ།།
མ་དག་དུག་ལྔས་བཅིང་བ་ལས་བཀྲོལ་ནས།།
ཡང་དག་བདེ་བའི་ལམ་མཆོག་ཉིད་ལ་སྦྱོར།།
རིང་མིན་རྫོགས་བྱང་མྱུར་དུ་ཐོབ་མཛད་གསོལ།།
ཅེས་ཡེ་ཤེས་གོང་འཕེལ་ནས་༢༠༡༡ ༩ ༤ཉིན་ལ་
- ཟིན་ཐོ་གོང་མ།རྨེའུ་སྟོན་སྒོམ་གཉིས་ཀྱི་བསྟོད་པ།།
- ཟིན་ཐོ་འོག་མ།རྗེས་དྲན་སིལ་སྙན་སྒྲ་དབྱངས།
ཟིན་ཐོ་ཡག་པོ་ཞིག་སྤེལ་འདུག ཐུགས་རྗེ་ཆེ།
