ཉི་ནུབ་ཀྱི་སེམས་གཞས།

                                 ཡེ་ཤེས་གོང་འཕེལ།།

མཐིང་མདོག་སྤང་ལྗོངས་ཁ་དོག་ཡལ་ཤུལ་ནས།།

ཉི་འོད་སྣང་བའི་མཛེས་སྡུག་རྒྱང་ལ་གྱེས།།

སྤྲིན་དཀར་སྟར་ཕྲེང་ཤར་མཐའིམཁར་བྱེར་དུས།།

ཉི་ནུབ་ཨ་མ་དྲན་པའི་གདུང་བ་འཕེལ།།

སྤང་རྒྱན་སྔོན་པོ་སྐྱོ་བའི་ཞལ་ཁ་ཟུམ།།

སྤང་རྩི་དོ་བོའི་མགོ་བོ་ཐོལ་གྱིས་མཐོར།།

ཤང་ཤང་ཆུ་མོས་དབྱངས་རྟ་ཐེན་ཙམ་ན།།

ཉི་ནུབ་ཨ་མ་དྲན་པའིི་གདུང་བ་འཕེལ།།

རྩྭ་ཕྲན་རླུང་གིས་བསྐྱོད་པས་ཤུ་གླུ་གྱེར།།

བྱ་བྱེའུ་ཚང་ལ་འགྲོ་བའི་ཀུ་ཅོ་འདོན།།

མིག་ཟུང་རབ་རིབ་རྒྱང་ལ་ཕྱོགས་པའི་དུས།།

ཉི་ནུབ་ཨ་མ་དྲན་པའི་གདུང་བ་འཕེལ།།

མཚམས་སྤྲིན་འོད་ཀྱི་ཏི་སེར་གསེར་མདངས་བྱུག།

དེ་ཡི་མཛེས་སྡུག་མཚོ་མོའི་ངོས་སུ་ལྷུང་།།

ངང་ངུར་མ་བུ་སྙིང་ནས་བརྩེ་བའི་ཚེ།།

ཉི་ནུབ་ཨ་མ་དྲན་པའི་གདུང་བ་འཕེལ།།

ཟླ་ཚེས་གསར་པ་སྤྲིན་དམར་ལྷུམ་ནས་འཛུམ།།

དེ་དང་མཉམ་དུ་སྐར་མའི་མཛེས་སྡུག་མཐོང་།།

སྨྲེང་སེམས་ཐག་རིང་ས་རུ་སྤྱོད་པའི་དུས།།

ཉི་ནུབ་ཨ་མ་དྲན་བཞིན་ཁེར་གཞས་བླང་།།