༄༅། དད་སེམས་ཡིད་ཀྱི་མཆོད་ཀ །

 ལྟ་བ་ཁྱུང་ཆེན་གཤོག་ཟུང་བླ་ན་འཕགས།།

ལྟ་བའི་འོད་བརྒྱ་སྲིད་ཞིའི་གླིང་ལ་ཁྱབ།།

ལྟ་བ་སྒྲིབ་གཉིས་རང་བཞིན་ཀ་ནས་དག།

འགྲན་པའི་ཟླ་བྲལ་མཉམ་མེད་བླ་མ་རྨད།།

 སྤྱོད་པ་བླང་དོར་བཟང་བས་མཚན་སྙན་འབར།།

སྤྱོད་པ་ཚུལ་ཁྲིམས་གཏེར་གྱི་རྣ་ཆ་མཛེས།།

སྤྱོད་པ་གཞི་ཡི་གནས་ལུགས་ལྷན་ནེ་རྟོགས།།

འགྲན་པའི་ཟླ་བྲལ་མཉམ་མེད་བླ་མ་རྨད།།

 སྒོམ་པ་མ་རྩལ་ལྷུན་གྱིས་འབྱུང་བ་དང་།།

སྒོམ་པ་གཡོ་མེད་ཏིང་འཛིན་ཡོངས་ཀྱིས་ཕྱུག།

སྒོམ་སྒྲུབ་བསླབ་གསུམ་ནོར་མངའ་བདག་ཅན།།

འགྲན་པའི་ཟླ་བྲལ་མཉམ་མེད་བླ་མ་རྨད།།

འཆད་པས་གཞུང་ལུགས་སྟོང་གི་འབྲུག་སྒྲ་སྒྲོགས།།

འཆད་པས་མ་རིག་རྨོངས་པའི་དྲྭ་བ་གཞོམ།།

འཆད་པས་འགྲོ་ལ་བོན་ཆར་རྟག་ཏུ་འཇོ།།

འགྲན་པའི་ཟླ་བྲལ་མཉམ་མེད་བླ་མ་རྨད།།

རྩོད་པས་གནམ་ལྕགས་ཐོག་གིས་བྲག་རི་འཇོམས།། 

རྩོད་པས་ལོག་སྨྲའི་ཁྱུ་ཡི་ངག་སྒོ་སྡོམ།།

རྩོད་པས་ཐལ་ངག་རིག་པའི་འཕྲུལ་འཁོར་བསྐོར།།

འགྲན་པའི་ཟླ་བྲལ་མཉམ་མེད་བླ་མ་རྨད།།

རྩོམ་པས་བཀའ་ལུང་བྱེ་བའི་དགོངས་དོན་བཀྲལ།།

རྩོམ་པས་གཤེན་བསྟན་མི་ནུབ་རྒྱལ་མཚན་སྒྲེངས།།

རྩོམ་པས་ཚད་གསུམ་བོན་གྱི་འདུས་སྡེ་རྒྱས།།

འགྲན་པའི་ཟླ་བྲལ་མཉམ་མེད་བླ་མ་རྨད།།

རྨད་བྱུང་མཚན་དཔེའི་སྐུ་མཆོག་མངོན་པར་བཞད།།

བཞད་བཞིན་ཡ་མཚན་རྟེན་འབྲེལ་བཟང་པོ་ཉིད།།

ཉིད་སྐུ་རྐང་གཉིས་སྤྲུལ་ནས་འགྲོ་དོན་མཛད།།

མཛད་པས་བསོད་ལྡན་ཁྱུ་ཚོགས་ཐར་ལམ་བཀོད།།

ཀོ་རྒྱལ་དགོན་ནས་ཁྱུང་བསྟན་རབ་པས། ༢༠༠༩ ༡༢ ༥ ཉིན་བྲིས།།

ཁྱུང་ཆེན་རིག་པའི་གཤོག་རླབས་དེབ་གཉིས་པའི་སྟེང་དུ་བཀོད།