༄༅།  ཁྱུང་ཡུལ་མཛེས་པའི་ཡིད་སྨོན།  

༧ལྟ་བ་གནས་ལུགས་རྟོགས་པའི་རྒྱལ་གསས་དང་།།

སྤྱོད་པ་ཤེས་རབ་གསུམ་གྱི་དྲི་བཟང་ཕྱུག།

ལྟ་སྤྱོད་ཟུང་འབྲེལ་འདུལ་བྱ་ཐར་པར་འདྲེན།།

དམ་པ་ཁྱུང་གི་སྐྱེས་མཆོག་རྣམས་ལ་བསྟོད།།

གནའ་བོའི་ལོ་རྒྱུས་གསེར་རིའི་རྒྱན་ཆ་མཛེས།།

གཡུང་དྲུང་བོན་བསྟན་ཡིད་བཞིན་ནོར་བུ་འབར།།

ཐོས་བསམ་སྒོམ་སྒྲུབ་བྱེད་པས་རྣལ་འབྱོར་དང་།།

སྲིད་གསུམ་གྲགས་པའི་དཔོན་གསས་སེམས་དཔའ་འཁྲུངས།།

གཞུང་ལུགས་རིག་པ་སྨྲ་བས་མཁས་པ་དང་།།

བསླབ་གསུམ་རིན་ཆེན་ནོར་གྱི་བྱུ་བུར་གཏམས།།

འཆད་རྩོད་རྩོམ་པས་གྲུ་ཆར་ཕྱོགས་བཅུར་འཐོར།།

བཤེས་གཉེན་དགེ་བའི་དེད་དཔོན་བྱོན་པའི་ཞིང་།།

གྲགས་དཀར་སྙན་པའི་རྫ་རྔ་བརྡུངས་པ་བཞིན།།

ཤེས་རིག་ཡོན་ཏན་འོད་ཀྱི་སྣང་བ་དང་།།

བསྟན་སྲིད་མི་འགྱུར་གཡུང་དྲུང་ཐེག་དགུ་བཀྲ།།

ཁྱུང་རིགས་རྒྱུན་པ་གྲོལ་བའི་ངོ་མཚར་རྨད།།

གཤེན་བསྟན་འཛིན་སྐྱོང་སྤེལ་བས་བཤད་སྒྲུབ་འཕེལ།།

འཆད་རྩོད་རྩོམ་པས་ལུང་རིག་དགོངས་དོན་བཀྲལ།།

ཐོས་གསུམ་སྒོམ་པས་འགྲོ་ལ་ཐར་བདེ་སྟེར།།

རྒྱལ་གཤེན་བསྟན་པ་ཁྱུང་ཡུལ་དབུས་ནས་སྒྲེང་།།

རབ་གསལ་གངས་ཀྱི་ཕྲེང་བ་ཡངས་སུ་བསྐོར།།

མཛེས་སྡུག་རྣམ་པར་བཀྲ་བའི་ལང་ཚོ་སྨིན།།

ནགས་ཀླུང་མཁའ་གོས་ཅན་གྱི་ལྗོང་མདོག་མཛེས།།

ནད་སེལ་མཚོ་མོ་ཟུང་གི་རླབས་འཕྲེང་གཡོ།།

ཡིད་འོང་སྤངས་ལྗོངས་རྩྭ་ཐང་རྣམ་པ་མང་།།

ཕྱྭ་གཡང་ནོར་ལུག་ཕྱུགས་ཁྱུ་སྐར་ཚོགས་བཀྲ།།

འབྲུ་དྲུག་ལོ་ཏོག་རྣམ་སྲས་མཛོད་ལ་འདྲེན།། 

འབྱོར་ལྡན་དཔལ་ཡོན་བཞད་པའི་དགའ་སྟོན་རྫོགས།།