དབལ་རམ་འབུམ་པའི་བསྐྱེད་རྫོགས་མངའ་བརྙེས་ཤིང་། །

ཟག་མེད་མངོན་ཤེས་ཐོབ་པའི་གྲུབ་ཆེན་པ། །

སྤྱི་རྟིང་འཁོར་ལོ་རིག་འཛིན་ཀུན་གྱི་གཙོར། །

སྒོ་གསུམ་མི་ཕྱེད་དད་པས་སྙིང་ནས་འདུད། །

གསེར་ལྗོངས་ནོར་འཛིན་དགའ་མའི་ཕང་བ་རུ། །

གཡུང་དྲུང་བོན་གྱི་འཁོར་ལོ་བསྐོར་སླད་དུ། །

མི་བསྲུན་དུག་གི་སྡོང་བོ་ཟན་གྱིས་གཏོར། །

སྨིན་གྲོལ་ལམ་ལ་འགོད་མཛད་ཁྱུང་དཀར་བ། །

མདོ་སྨད་བྱང་ཕྱོགས་ཨཀྟ་རོང་གི་གཞིར། །

བརྒྱད་ཁྲི་བཞི་སྟོང་འཕྲུལ་ངག་གཡུང་དྲུང་བོན། །

ལེགས་པར་འདྲེན་མཛད་རྒྱལ་བའི་སྲས་པོ་མཆོག །

གྲུབ་ཆེན་ངོ་མོ་ཡེ་ཤེས་མཚོ་རྒྱལ་བསྔགས། །