དྲན་གདུང་གི་རྨ་ཁ།

ཨ་ཅེ། ཉིན་འདི་གར་ངས་ཏག་ཏག་ཁྱེད་ཁོ་ན་དྲན་བཞིན་ཡོད་ཨང་། ཁྱེད་ཀྱིས་མྱངས་པའི་མི་ལོ་དྲུག་ཅུའི་སྡུག་བསྔལ་རེ་རེ་ལ་བསམ་གཞིགས་ཀྱི་འཁོར་ལོ་བསྐོར་བཞིན་ཡོད་ལ། ཁྱེད་ཀྱིས་རྒུམ་པའི་ཁེར་རྐྱང་གི་གདུང་བ་རེ་རེའི་ཟབ་ཚད་ལ་ལག་སྙོབ་བྱེད་ཀྱི་ཡོད།

མི་ལོ་དྲུག་ཅུའི་རིང་། ཕྱི་ལུས་ཀྱི་ན་ཚས་ཁྱེད་ལ་གུ་ཡངས་བཏང་མ་མྱོང་ལ། ནང་སེམས་ཀྱི་རྨ་ཁས་ཁྱེད་ལ་སྐྱིད་སྣང་བྱིན་མ་མྱོང་། མི་ཚེ་སྡུག་བསྔལ་དང་འགྲོགས་པའི་ཁྱེད་རང་འདི་ལྟར་འཇིག་རྟེན་གཞན་དུ་བཞུད་དགོས་པའང་སྔོན་ལས་ཤིག་ཡིན་སྲིད་ཨང་།

ལས་དབང་གིས་ཁྱེད་ཀྱི་ཞལ་སྒོ་ལ་ཆག་གྲུམ་བཟོས་ཤིང་། ཁྱེད་ཀྱི་ཕྱི་ནང་ཡོངས་རྫོགས་ན་ཚའི་རྒྱུན་ཐག་གིས་དཀྲིས། འདི་དག་ཐམས་ཅད་རྐྱེན་གང་གིས་ཀྱང་བཟློག་མ་ནུས་པས། ཁྱེད་རང་འདི་ལྟར་ཁུ་སིམ་མེར་ཞིང་ཁམས་གཞན་ཞིག་ཏུ་གཤེགས་དགོས་སོང་།

ཨ་ཅེ་ལགས། ད་ནི་སུ་ཡང་སོང་མ་མྱོང་ལ་སུའང་འགྲོ་དགོས་པའི་མཐར་ཐུག་གི་ལམ་སྣེ་དེར་བསྙེགས་ཟིན་པས། བག་མ་འཁུམས། མི་ཕྱེད་པའི་དད་པས་གསོལ་བ་རེ་ཐོབས་དང་། འུ་ཅག་ལ་སྐྱབས་གནས་ཡོད་ལ། འུ་ཅག་ལ་ལྷ་ཚོགས་ཡོད་པས། མི་མངོན་པའི་དབྱིངས་ན་ཁྱེད་ལ་མགོན་སྐྱོབ་གནང་མཁན་ཡོད་ལ། ཕ་བླ་མས་ཀྱང་མི་གཡོ་བའི་འཕོ་བ་རེ་གསུངས་ན། འཇིགས་སྐྲག་གི་སྡུག་བསྔལ་རྨང་ནས་སེལ་ཞིང་། བདེ་ཆེན་གྱི་ཐར་ལམ་ས་ལེར་སྟོན་ཡོང་བས། ཞེད་མ་འགྲོ བར་དོའི་འཇིགས་པ་ཐམས་ཅད་རང་སེམས་འཁྲུལ་བའི་སྣང་བ་ཙམ། ངས་ཀྱང་གྱ་ནོམ་གྱི་རྫོངས་པ་རེ་བྱས་ན། བར་དོའི་འཕྲང་རིང་ནས་ཅིས་ཀྱང་ཁྱེད་ལ་འཕྲོད་ངེས་པས། སེམས་མ་སྐྱོ། བར་དོའི་འགྲུལ་བཞུད་ཡོད་ཚད་རང་སྣང་འཁྲུལ་བའི་རྨི་ལམ་ཙམ།

ཨ་ཅེ་ལགས། ཁྱེད་ཀྱི་བཞུད་སྟངས་དེ། ང་ལ་མཚོན་ན་དྲན་གདུང་གི་རྨ་ཁ་ལྕི་མོ་ཞིག་ཡིན་ཡང་། ཁྱེད་ལ་མཚོན་ན་ཐར་བ་ཆེན་པོ་ཞིག་གི་གོ་འཕང་རེད་ཨང་།