བོན་བརྒྱ་ཡབ་སྲས།

ནམ་མཁའི་མཐའ་མཉམ་འཕྲུལ་ངག་གཡུང་དྲུང་བོན། །

ཉི་ཟླ་ཆ་འགྲིག་བོན་བརྒྱ་ཡབ་སྲས་ཟུང་། །

འོད་ཟེར་བྱེ་བ་བྱིན་རླབས་དངོས་གྲུབ་མཆོག །

འཛོམས་གསུམ་འཛོམས་པ་གངས་ཅན་བོད་མིའི་རྒྱན། །

ཨ་སྔོན་དབྱིངས་ན་ཁྱུང་འབྲུག་གར་དུ་རྩེན། །

རྒྱ་རྫོང་ནགས་ན་སྟག་སེང་མཆོང་རྩལ་ངོམས། །

གངས་རིའི་ལྗོངས་ན་བོན་བརྒྱ་ཡབ་སྲས་ཟུང་། །

གཡུང་དྲུང་བོན་གྱི་འཁོར་ལོ་ཐོགས་མེད་བསྐོར། །

མཛེས་མཛེས་པདྨ་དཀར་པོ་སྐྱེ་མེད་སྐུ། །

ལྷང་ལྷང་ཁུ་བྱུག་དབྱངས་སྙན་འགག་མེད་གསུངས། །

ཟབ་ཟབ་ཆུ་གཏེར་སྔོན་མོ་གཉིས་མེད་ཐུགས། །

བརྗིད་བརྗིད་རིགས་དྲུག་བསོད་ནམས་དཔལ་དུ་བརྗིད། །

བོན་གྱི་སྒོ་མོ་བརྒྱད་ཁྲི་བཞི་སྟོང་ཆར། །

ཐོས་བསམ་སྒོམ་པས་རྟོག་པ་རང་སར་གྲོལ། །

འཆད་རྩོད་རྩོམ་པའི་འཁོར་ལོ་བསྐོར་བ་ཡིས། །

སྐལ་ལྡན་གདུལ་བྱའི་ཚོགས་རྣམས་ལམ་ལ་བཀོད། །