ཁེར་རྐྱང་གི་ཟླ་བ།

 

མཁར་ནག་སྐལ་བཟང་རྒྱ་མཚོ།།

 

ཁོར་ཡུག་མུན་པའི་སེང་རས་ཀྱིས་བསྒྲིབས་འདུག

གསང་བ་ལྐོག་གྱུར་གྱི་མཛེས་སྡུག་ཁྲོད།

རྒྱུ་སྐར་ཚོ།    བྱིས་པ་པྲ་ཚག་ནང་བཞིན།

མིག་འབྱེད་བཙུམ་གྱིས་རང་གི་འོད་སྣང་ངོམ།

 

དབང་ཕྱོགས་ཀྱི་རྫ་རི་སྨུག་པོས་སྟོབས་ཤུགས་ཡོད་ཚད་བཏོན་ནས།

འདེགས་ཐེངས་གཅིག་གིས་ཉ་གང་གི་ཟླ་བ་མཁའ་རུ་བསྐྱལ།

དངུལ་དཀར་གྱི་མེ་ལོང་བཞིན་གསལ་བའི་ཟླ་བས།

འོད་དཀར་ཀྱི་སྣང་བ་འཛེམ་མེད་དུ་སྤྲོས།

 

རང་གི་འཇོན་ཐང་ལ་གནོད་ཀྱིས་དོགས་ནས།

རྒྱུ་སྐར་ཚོས་ཕྲག་དོག་གི་དམོད་པ་བྱེད་བཞིན་རྒྱང་དུ་བཀྱེད།

དཀར་ཆིལ་ཆིལ་གྱི་ཟླ་བ་ཁེར་རྐྱང་དུ་ལུས་པ་འདི།

མ་གཞི་རང་དང་མཉམ་པའི་རིགས་མཐུན་ཞིག་ད་བར་དུ་མ་སྙེད་པས་རེད།

 

ཆེན་པོ་རྣམས་ཀྱིས་རང་གི་འཇོན་ཐང་ཅུང་ཟད་མ་སྦས་ཚེ།

ཁེར་རྐྱང་དུ་གནས་དགོས་པ་ནི་ཆོས་ཉིད་ཡིན་དེ།

མི་བདེན་ན་ཉི་མ་ལའང་ལྟོས་དང་།།